اسكريبت 🍁
اطلعي ع الميزان..
هو انت فكرك اني مش عارفه وزني كام
_ ششش اطلعي ع الميزان يا أمنيه
لا مش هطلع يا ادهم علشان دي مش اول مره تهين فيا كداا هو انت مبتزهقش
ادهم: انتي عاجبك شكلك كداا عاجبك وزنك الي كل يوم بقا يزيد كيلو واتنين
أمنيه: هو بمزاجي ما انت عارف اني تعبانه نفسيآ وغصب عني وزني بيزيد ومش عارفه السبب انت كرهتني في نفسي ومبقتش عارفه اتقبل شكلي
ادهم: واناا زهقت مبقتش عارف اتقبل شكلك كداا
أمنيه: دا ع اساس انك بتوافق تخرج معايا
من ساعه وزني مازاد وانت رافض نبان سوا قدام حد وخاصتآ قدام الكاميرات
امال اي ما انت خايف علي شكلك قدامهم لما الاعلام يقول دي زوجة الاستاذ ادهم صاحب اشهر شركه للموضه والموديل الي بيتأمر علي عارضات الازياء بتوعو ومانع عنهم اكل كتير وممشيهم علي حميه غذائيه ومراتو تخينه ومش عارف يمشي كلمتو عليهاا
ادهم: ايوا مش عاجبني وزنك علشان انا شاب رياضي وعندي فورمه وانتي شبه الغوريلا وعاوزك تشوفي حل لشكلك داا وللخطوط المقرفه الي بقت تظهر في جسمك
أمنيه بكسره: انت مبقتش تحبني يا ادهم..؟
ادهم: اطلعي ع الميزان!!
أمنيه: مش هطلع..
ادهم: اطلعي ع الميزان يا أمنيه
أمنيه: اهووو ياك ترتاااح
ادهم: 120 كيلو انتي شاااايفه نفسك...عايش مع فيل انا
دي حاجه تقرف انا هسيبلك البيت لمده شهر ارجع الاقيكي خسيتي او بتخسي لو رجعت لقيتك كداا انتي حره
أمنيه: طلقني
ادهم: نعم
أمنيه: طلقني ودلوقتي حالا
ادهم: هو انتي فاكره ان كلمتك دي هتلوي دراعي واقولك خلاص خليكي تخينه
أمنيه بصوت عالي طلقني انا زهقت منك ومن العيشه معاااك كفايه اهانه لحد كدااا طلقنيييي
ادهم بصوت أعلي انتي طالق يا أمنيه وخرج ورزع الباب
أمنيه وقعت علي الارض وبتعيط مش هسمحلك تهين فيا اكتر من كداا مش هسامحك علي اي كلمه قولتهالي وكسرت قلبي بيهاا مش هنسي اي موقف احتاجتك فيه وملقتكش والله لهندمك واخليك ترجعلي وتطلب السمااح ومش هسامحك يا ادهم مش هسامحك
اخدت شنطتي وخرجت من الڤيلا سبت تليفوني ومفتاح عربيتي والاكسسوارات والدهب وكل حاجه اشتراها بفلوسو سبت اي حاجه تفكرني بكلامو
فضلت ماشيه في الشارع تعبانه نفسيآ وجسديآ ومش عاوزه ارجع ل اهلي الي طول عمرهم واقفين جنبو ومشجعينو ومش بيقفو قدامو علشاان شغالين عندو وبيخافو منو
روحت علي مكان كنت بروح ليه زمان الكورنيش
قربت من استراحه موجوده وقبل ما اقعد سمعت صوت طفل بيقولي
طنط هو انتي فعلا بتاكلي الاطفال زي ما الواد دا بيقولي
بصيت مكان ماشاور لقيت 4 اطفال بيضحكو مكانش ليا حق ازعل ان اهلهم مربوهمش لان دول اطفال عايشه في الشارع ومعظمهم ملقاش حد يعلمو ويربيه عيوني دمعت وقربت منو علشان احضنو لاني كنت محتاجه حد يحضني او يطبطب علياا بس هو خاف وفكرني هاكلو زي مابيقول لقيتهم طلعو يجرو ويقولو بتاكل الاطفال اجروو
دموعي نزلت اكتر وقعدت وفضلت اعيط بصوت عالي يارب انا اتجرحت ساعدني
+ تعرفي ان الأكل علاج الزعل والاكتئاب
رفعت راسي للصوت لقيت شاب طويل ومبتسم ف قولت مين حضرتك
+ انا محمد
أمنيه: انا اعرفك يعني
محمد: لا بس لقيتك بتعيطي ف حبيت اجي اتكلم معاكي يمكن اقدر اساعد وبعدين شكلك جعانه ف لو معندكيش مانع اقعد معاكي وناكل سواا ولو هترفضي ف هسيبلك الاكل وامشي مش هاخدو معايا متقلقيش
بصيتلو بإبتسامه وقولت اتفضل اقعد
مش عارفه لي وافقت بس يمكن علشان كنت محتاجه حد يحسسني انو جمبي
محمد: بصي دول اتنين برجر واحد لحمه وواحد فراخ تحبي اني امم مش عارف لي حاسك بتحبي الفراخ
أمنيه: انا فعلا بحب الفراخ بس دا أكلك مش هقدر اخدو
محمد: لا انا هاكل ساندويتش واحد والتاني بجيبو دايما للأطفال الي كانت بتقعد هناا بنعمل قرعه كدا وكل يوم بدي ساندويتش لواحد منهم ف النهارده كنت جاي ملقتهمش ف لقيتك قولت يبقا من نصيبك
أمنيه: هما فعلا كانو قاعدين بس خافو مني وجريو
محمد: طيب بما انك خوفتيهم ف عقاب ليكي هتاكليه اتفضلي
أمنيه بإبتسامه لو كل العقاب أكل بس ف اهلا بالعقاب
محمد بضحك: الاكل داا تاني أحلي حاجه في العالم
أمنيه: واي اول حاجه
محمد: البنات
أمنيه بتضحك
محمد: اه والله البنات دي ألطف حاجه في الدنياا تحسي انهم محلين الدنياا
أمنيه: ياريت كل الناس زي تفكيرك
محمد: ياريت ع الاكل مكانش هيبقا في طلاق ولا قله ادب ولا اغتصاب ولا ذل واهانه
أمنيه: معاك حق
محمد: احكيلي لو حابه
أمنيه: احكي اي
محمد: احكيلي سبب الدمعه الي متعلقه في رموشك دي
أمنيه: إطلقت النهارده بسبب الاهانه والذل
محمد: انا اسف اووي والله ماكنت اعرف ولا كنت بلقح عليكي انا كنت بقول مثال بس
أمنيه: وانت اي ذنبك علشان ازعل منك هو انت الي هنتني وطلقتني
محمد: والله انا عمري ماهعملها ف لا مكنتش ههينك ولا هطلقك
أمنيه بضحك انت دمك خفيف اوي
محمد: ربنا يخليكي
أمنيه: انا همشي بقاا عن اذنك وشكراا علي الأكل
محمد: ليكي بيت
أمنيه بتفكير: لا مليش
محمد: طيب هتروحي فين
أمنيه: هتصرف متشغلش بالك ممكن اقعد في فندق
محمد: طيب انتي ممكن تيجي معايا
أمنيه: افندم
محمد: لا استني صفي النيه انا حاليا قاعد في فندق لحد ما شقتي تجهز ف ممكن تيجي معايا الفندق تحجزي اوضه هناك
أمنيه: ااه فهمت كداا طيب هو مكانو فين
محمد: اخر الشارع دا
أمنيه: طيب يعني هو
محمد بيقرب منها ويطلع مصحف صغير من جيبو
والله العظيم ما هقرب منك ولا هئذيكي والله نيتي خير وهوديكي الفندق علشان مسبكيش لوحدك في الشارع لان الوقت متأخر
أمنيه بإبتسامه صدقتك ربنا يخليك اتفضل
روحنا الفندق وحجزت اوضه لمده 3 ايام لحد ما اشوف هعمل اي ودفع هو الحساب ومرضيش ياخد مني فلوس قال اعتبريها بدايه صداقه حقيقيه
كان قدامي حجات كتير اوي بفكر فيهاا منها أجر شقه من الفلوس الي في حسابي في البنك والفلوس دي من شغلي مع ادهم في شركتو لكن بعد ماوزني بدأ يزيد تدريجيا منعني انزل الشركه وقالي وقتها مش عاوز حد يشوفك كداا
قررت ان اول قرار هاخدو هو اني مفكرش فيه تاني ولا افضل اضايق نفسي بكلامو الي كان بيقولهولي
تاني يوم نزلت علشان افطر في الفندق كالعاده اكل انواع واشكال كل الي نفسك فيه بس انا مش بحب الاكل اوي مش رقم واحد في حياتي انا عارفه ان الكل هيفكر ان وزني دا بسبب الاكل بس هو في الحقيقه علاج اخدتو عملي مايه تحت الجلد + التعب النفسي + ارهاق وعدم حركه حجات كتير اووي ويبقي الاكل اخرهاا بس محدش هيفهم
بصيت نظره سريعه ع الاكل الي قدامي ومسكت طبق وحطيت سلطه فواكه وسلطه خضرا وجرجير وخس
وقعدت أفطر بعد ثواني
محمد: اي داا انتي عيانه ولا اي سلطه وجرجير وخس
هو في حد هنا عامل داايت اركني الطبق داا كدا وبصي جبتلك اكل معايا بيض ولانشون وكيري وطحينه وتوميه وبرجر شايفه الاكل
أمنيه: داا انت عاوزني اتخن بقاا
محمد: ومتتخنيش ليه هو التخن حرام ولا عيب
أمنيه: معاك حق
محمد: هاا ناويه تعملي اي
أمنيه: في اي
محمد: يعني هتشتغلي ولا هتسافري هتشتري بيت ولا هتأجري هتبقي قويه ولا ضعيفه هتبصي لقدام ولا لورا
أمنيه: وليه افكر في كل داا
محمد: علشان انتي خرجتي من علاقه خسرانه ف مينفعش تكملي في الخساره دي لازم تقفي علي رجلك وتكملي وتبصي لفوق ومفيش مانع تبصي تحت شويه علشان متقعيش علي وشك
أمنيه بضحك حااضر ياعم هبص لفوق وتحت شويه علشان ما اقعش علي وشي
محمد: طيب يالا نشوفلك شقه
أمنيه: مش هشتري هأجر
محمد: يبقا بردو يالا نتفرج ونختار شقه حلوه كدا تليق بيكي
أمنيه بفرحه تليق بياا ازاي
محمد: تليق بقلبك الطيب ولروحك الحلوه
أمنيه: كلامك بيفرحني وبيدعمني
محمد: طيب يالا وياستي اوعدك اني هفضل افرحك وادعمك كداا
بعد يوم طويل أخيراا لقينا شقه حلوه عجبتني
أمنيه: هعمل حفله بمناسبه الشقه دي
محمد: هتعزمي مين علشان مبحبش الزحمه
أمنيه: معنديش صحاب غيرك
محمد: كفايه عليكي اووي اي مش مالي عينك
أمنيه: لا مالي ياعم
عدا اسبوعين ومحمد بيشجعني في اي تفكير بفكر فيه حتي لو كانت الفكره تافهه بيطبلي ويقولي براڤو فكرتي فيها ازااي دي كان بيحسسني بقيمتي اووي الي ضاعت مني زمان
كنت بشوف اخبار ادهم في الجرايد وعرفت انو اتجوز واحده من عارضات الازياء الي شغاله عندو وطلقهاا وحاليا متجوز واحده تانيه اسمها ليناا بس مكنتش بهتم وكأنو كان عابر سبيل في حياتي
أمنيه: هو انا شكلي وحش
محمد: متقوليش كداا انتي حلوه جداا
أمنيه: تعرف اني بكره جسمي اووي
محمد: جسمك دا نعمه من ربنا احمدي ربنا عليها مهما كانت في ناس بتتمني تعرف تمشي ذيك وتتكلم ذيك وتسمع ذيك وتشوف ذيك
أمنيه: عندي خطوط في جسمي شكلها وحش مبحبش اغير هدومي علشان بشوفها
محمد: ارسمي عليها
أمنيه: ازاي داا
محمد: اعتبريها حنه واقعدي ارسمي ورق شجر عليها واشكال حلوه وخليها بدل ما كان شكلها مش عاجبك بقت حلوه وهتعجبك
أمنيه: فكره حلوه اوي
في مطعم
ادهم ومراتو ليناا معزومين علي العشا مع صاحب شركه تانيه
الجارسون تطلبو اي حضرتكم
اخد الطلبات من الكل وسئل ليناا تطلبي اي حضرتك
لينا بتمسك المينيو اا عاوزه
ادهم: هاتلها شوربه وسلطه خضراا وكاس مايه لو سمحت
لينا: انا مش هاكل الاكل دا
ادهم: هدي صوتك والي اقولو يتنفذ انتي اي عاوزه تتخني كفايه تخنتي نص كيلو الاسبوع داا
لينا: انت بقيت اوڤر وانا زهقت كل يوم اطلعي ع الميزان يا ليناا انت تخنق يا أخي وسابتهم ومشيت
اما ادهم كمل السهره معاهم ولما رجع اتخانق معاها
لينا: طلقني انا زهقت منك ومبقتش اطيق العيشه معاك
ادهم: كل دااا علشان بحافظ علي جسمك
لينا: انت بتدخل في ادق تفاصيل حياتي نفسي اخرج براحتي واكل براحتي حرام دي مش عيشه ابداا انت متجوزني انا ولا متجوز الميزان
ادهم: لو طلقتك هتندمي
لينا: طلقني يا ادهم انا مش طايقاك
ادهم: انتي طالق
أمنيه: محمد انا عاوزه اخس
محمد: ليه جسمك كدا حلو علفكراا وبعدين انا حابب شكلك كداا مش عارف هتأقلم مع شكلك ازاي وانتي رفيعه
أمنيه: بس انت عمرك ما وقفت قدامي في قرار
محمد: مش عارف حاسس انك كدا احلي بكتير
أمنيه: بس وانا رفيعه كنت أحلي
محمد: مشوفتكيش وانتي رفيعه علشان احكم + ان الوزن الزايد داا مش بيليق مع اي بنت
سبحان الله دايما البنات المليانه بيكون دمهم خفيف وتحسيهم بانداا كدا عسل
أمنيه بضحك بانداا انا بانداا
محمد: بصي هو القرار قرارك طبعاا بس رائيي متحاوليش تخسي وانتي مجبوره علشان مش هتلاقي اي نتيجه وهيجيلك احباط
أمنيه: بس انا فعلا عاوزه اخس وعاوزاك تدعمني زي كل مره ولو جالي احباط شجعني وخليك في ضهري
محمد: رغم اني هفتقد شكلك كدا بس هحاول ادعمك
أمنيه: شكراا
في الچيم
محمد: دا الچيم الي بتدرب فيه ودي كابتن اماني لطيفه جداا وشاطره وهترتاحي معاها
أمنيه: يارب
محمد: لما تخلصي هكون مستنيكي تحت في العربيه تمام
أمنيه: تمام
أماني: احسن براڤو كويس جداا بالنسبه ل اول يوم نتقابل بعد بكره ان شاء الله
محمد: يومك كان عامل ازاي
أمنيه: تعبت اوووي
محمد: اي داا حاسك خاسه كدا
أمنيه: بجد
محمد: ايوا مش عارف وشك خاسس
أمنيه: الله معقول النتيجه ظهرت من اول يوم كداا انا فرحانه
محمد بيضحك علي شكلها وانو كدب عليها علشان يفرحها
بعد شهر في الچيم
أمنيه: تعالا بس عملالك مفاجأه
محمد: طيب افتح عيني
أمنيه: فتح
محمد: جيبالي ميزان هديه هي دي المفاجأه
أمنيه: هديه اي ياعم المفاجأه هي وزني بقا كام
محمد: كام
أمنيه طلعت ع الميزان
محمد: لولولوي ياختي حلوه بقيتي 90 كيلو
أمنيه: انا مبهووووره اووي انا خسيت 30 كيلو انت متخيل
محمد: بجد براڤو عليكي وبعدين مش محتاج ميزان علشان اعرف اد اي بقيتي رشيقه وجسمك حلو جداا
أمنيه: اممم حاسه ان شكلي دلوقتي بقا احلي سيكاا
محمد: بأمانه انا كنت بحب الباندا اكتر
أمنيه بضحك طيب امشي يامحمد
محمد: يالا الحفله النهارده علي حسابي
بعد شهرين
أمنيه واقفه ع الميزان وفاتحه بوقهاا انا بقيت 60 كيلو
محمد ساند علي الحيطه ومبتسم
أمنيه: حاسه اني بحلم
محمد: مبروك عليكي انتقامك يا أمنيه
أمنيه: انتقاام..؟
محمد: العند والاراده الي كانو عندك من 3 شهور دول مكنوش حاجه عاديه دول انتقاام صحيح معرفش بتنتقمي من مين وليه بس الي واثق منو انك بتجري ورا حقك ومش هتستسلمي الا لما تاخديه وانا هناا هدعمك لاخر نفس اذا كنتي معايا او مع غيري
أمنيه: لا ثانيه يعني اي كنتي معايا او مع غيري
محمد: يوم ما اتقابلنا مكانتش صدفه ابدااا
مكانتش صدفه اقابل واحده لسه مطلقه وبائسه وعندها احباط من الدنياا
والاغرب اني انا كمان كنت مطلق وخارج من علاقه خسرانه بس انا مكنتش بائس ولا عندي احباط ف حسيت انها اشاره ب اني حاسس نفس احساسك وكنت واثق اني الوحيد الي هقدر اساعدك وواقفك علي رجلك من تاني
صحيح كنت ناوي اني هبقا مجرد صاحب بس مشاعري خانتني ف دي مكانتش مجرد صدفه دا النصيب جمعناا
مش هقولك اي حاجه عن مشاعري علشان ما اقفش في طريقك كملي يا أمنيه وانجحي في نظر نفسك لانك في نظري ناجحه اووي بس لازم تثبتي لنفسك داا
أمنيه: طيب ليه قولتلي انك مش عاوزني اخس
محمد: علشان كنت عاوزك انتي تقتنعي بداا انك هتخسي علشاانك مش علشاني او لغيري كان لازم اعرفك ان في شخص بيحبك كداا مش الكل رافضك لو كنت قولتلك خسي مكنتش هتخسي وكنتي هتعاندي اكتر لو كنت كرهتك في نفسك مكنتيش هتنجحي كان لازم احببك في نفسك علشان تاخدي القرار الصح بالنسبه ليكي
أمنيه: طيب من وجهه نظرك انت أمنيه دلوقتي احسن ولا البانداا احسن
محمد بإبتسامه: شوفتك بانداا وحبيتك بانداا ف بالنسبالي زمان كان جميل ودلوقتي اجمل
أمنيه: شكراا اوي بجد
محمد: هاا الخطه الجايه اي
أمنيه بعيون لامعه اشتغل في شركه ادهم المصري للموضه
محمد بإبتسامه امم طليقك يعني
أمنيه: لا دا انت عارف كل حاجه بقاا
محمد: لا مش اوي عارف حجات بسيطه المهم انك لازم تنجحي الاول والشركه هي اللي تطلبك مش تروحي تقدمي طلب للشغل هناك
أمنيه: طيب ودا ازاي
محمد: بسيطه لياا اخ بيفهم في الموضه والموديل وكان شغال مع واحد كويس ومشهور هكلمهولك
أمنيه: الله بجد
وبعد شهر
في شركه ادهم... بالتحديد في مكتبو
السكرتيره الجديده: دول ملفات العارضات الي اتشهرت اوي الفتره الي فاتت ومن رأيي اننا نمضي عقد معاهم
ادهم: وريني كداا
بيبدأ يقلب في الملفات لحد مابيتصدم لما شاف صوره امنيه
ادهم: الملف داا جديد ولا قديم
السكرتيره: جديد يافندم
ادهم: ازااي امنيه كانت بتشتغل معايا من فتره وبعدين اعتذلت الموضه خالص
السكرتيره بتقلب في الايباد لا حضرتك جديده وبقالها شهر في المجال واشتغلت مع كذا شركه ومشهوره
ادهم: خوديلي ميعاد معاها فوراا
السكرتيره: للأسف يافندم الجدول بتاعها مقفول لمده اسبوع
ادهم بغل يعني اي
السكرتيره: هاخدلك ميعاد معاها الاسبوع الجاي
ادهم: انا هتصرف واقابلها
محمد: طلب انو يشوفك
أمنيه: بجد واديتو ميعاد
محمد: لا طبعاا خليتو يستني اسبوع وقولت ان الاسبوع دا مشغوله مش بالسااهل كدا يشوفك
أمنيه: انت عبقري
ادهم بيحاول يوصلهاا لكن مش عارف ف اضطر يستسلم ويستني اسبوع
في ڤيلا أمنيه
ادهم: اهلا وسهلا بالنجمه
أمنيه: اتفضل
ادهم: مصدقتش انك خسيتي وبقيتي قمر كداا
محمد واقف هيفرقع
أمنيه: بتبص علي محمد احم وانا مصدقتش انك واخد ميعاد معايا
ادهم: طيب اي رائيك نتكلم علي انفراد
أمنيه: مفيش حد غريب اتكلم
ادهم: بس
أمنيه: للأسف عندي ميعاد مهم بعد 10 دقايق
ادهم: اا احم طيب انا طالب منك السماح
أمنيه: مش مقبول
ادهم: انا ندمت يا أمنيه ومحتاجك معايا
أمنيه: وقتك خلص اتفضل
ادهم: اديني فرصه
أمنيه: اتفضل
ادهم: طيب داا عقد شغل بينا هبقا مبسوط لو حضرتك قبلتيه
أمنيه: سيبو علي الترابيزه لما افضي هبقا اشوفو
ادهم بإحراج اه تمام عن اذنك
محمد: هتوافقي
أمنيه: ايواا بس هركنو شويه
محمد: طيب يالا بسرعه علشان انا حاجز الڤيلا دي 3 ساعات بس والوقت خلص صاحبها هيقتلنا
أمنيه بضحك اقتنع انها بتاعتي صح
محمد: لا انتي الي عشتي الدور اووي وكأنها بتاعتك فعلا
بعد 3 اسابيع
السكرتيره: أمنيه هانم وافقت تمضي العقد معانا
ادهم: كويس جداا
بعد اول حفله لأمنيه في شركه ادهم
الكاميرات كلها كانت حواليها وأمنيه كانت مبسوطه
ادهم بيقرب منهاا ويحط ايدو علي كتفهاا
محمد كان بيحاول يتمالك اعصابو وبيجز علي سنانو
أمنيه: شيل ايدك
ادهم: بصوت هادي بس انا جوزك وليا حق المسك براحتي محدش يعرف اننا اطلقنا اصلا
أمنيه بعدت ايدو عنهاا وسابت المكان وخرجت هي ومحمد
وادهم حاول يداري الكسفه الي اتكسفها قدام الاعلام
محمد: هو بيلمسك لييه ازاي يتجرأ كدا
امنيه: انا اسفه والله حقك علياا
محمد بيتمالك اعصابو انا كويس متقلقيش اتعصبت شويه بس لما شوفتو بيحط ايدو عليكي
أمنيه: مش هتتكرر تاني تمام انا اسفه
محمد: طيب ارجعي الحفله وانا شويه وهاجي
أمنيه: لا مش هرجع تولع الحفله تعالا نخرج سواا
بعد اسبوع في شركه ادهم
ادهم: أمنيه حبيبتي انتي دلوقتي بقيتي مراتي
أمنيه: افندم
ادهم: ايوا انا رجعتك لياا
أمنيه: بس انا مش موافقه
ادهم: مش مهم ياحبيبتي المهم اننا دلوقتي مع بعض
أمنيه: انت تخرس خالص واياك تنطق اسمي تاني
ادهم: قدام الكل احنا متجوزين وانا رديتك وقانوناا انتي مراتي ويالا بقاا نرجع بيتنا
أمنيه: علي جثتي انت فاكرني هبله ومش عارفه انك عمال تقرب مني قدام الصحافه علشان تاخد شرف النجاح الي انا وصلتلو وبتتباهي اوي قدام الكل اني مراتك نسيت احنا اطلقنا ليه طب لعلمك بقاا اني خسيت علشان انتقم منك واخليك تندم وهرجع اتخن تاني علشان تعرف ان الست لما بتحب تعمل حاجه هتعملهاا
ادهم: قولتلك اني دلوقتي جوزك ومش بمزاجك انك تتخني علفكرا وطلاق مش هطلق
أمنيه بضحكه استهزاء ماشي يا ادهم هنشوف
محمد: انتي متأكده
أمنيه: ايواا الي زي داا لازم يتأدب بالفضيحه لازم اعمل الحاجه الي بيخاف منهاا وهو طول عمرو بيخاف يتفضح
عند ادهم
السكرتيره: الظرف دا جه لحضرتك
ادهم بيفتحوو وبيقوم من مكانو في فزع ايييييه قضيه خلع
عند امنيه
محمد: ادهم برا ومتجنن
أمنيه بفرحه دخلوو
ادهم: امنيه حبيبتي انا عارف اني مش ههون عليكي صح اسحبي القضيه دي انا هطلقك بالمعروف بس بلاش فضايح
أمنيه: لا ماهو انا عاوزه فضايح يابيبي
ادهم: هتستفادي اي طيب انتي عارفه ان الاعلام بيحب المشاكل والفضايح اسحبيها علشان خاطري وهعملك كل اللي بتتمنيه سامحيني علي اللي عملتو فيكي زمان انا اسف حقك علياا كانت ساعه شيطان ارجوكي سامحيني
انا بحبك اووي يا أمنيه
أمنيه: مش هسامحك يا ادهم اسفه اخدت عهد علي نفسي اني هندمك واخليك ترجع تتذلل قدامي كداا زي ماذلتني قدامك بكلامك الي يحرق الدم مش هقدر اسامحك
واذا ع الحب ف انا اكتر واحده كانت بتحبك وضحكت كتير علشاانك قولتلك انك اول حب في حياتي متخلنيش اندم علي الحب داا بس انت خلتني ألعن اليوم الي شوفتك فيه...
في اخر حفله ل أمنيه
الاعلام: حضرتك رفعتي قضيه خلع علي الاستاذ ادهم المصري اي السبب
أمنيه: علشان كان مريض
الاعلام: اي نوع من المرض الجسدي ولا النفسي
أمنيه بضحك لا مرض الميزاان
الاعلام بإستغراب مرض الميزان..؟
أمنيه: ايواا ومش هيفهم كلامي غير الي كانو متجوزينو
الاعلام: طيب في اعمال تانيه لحضرتك قريب
أمنيه: لا انا هعتذل الشغل
الاعلام: ليييه
أمنيه بتبص لمحمد الي واقف جمبهاا ومأنكچاه علشان هسافر انا وخطيبي ومش محتاجه الشغل دا تاني
علي الكورنيش
محمد قابلتك هناا من 5 شهور ولحد الان مبعدتش عنك لحظه وزي ماوعدتك في المكان داا اني هفضل ادعمك وافرحك دايماا
أمنيه: بحبك اووي يا أحلي حاجه حصلتلي في حياتي
محمد: بموت فيكي يا أجمل باندا شوفتها في حياتي
أمنيه: فرحانه اني قريب هكون مراتك انت اكتر واحد حسسني بقيمتي وكنت دايما واقف معايا وفي ضهري انت العوض الجميل من ربناا..
الحب ليس للحبيب الأول، الحب لمن اهتم بك وأوفي، ولمن اذا اردته في كُــل مره أتي..
الحُب للحبيب الأفضل وليس الأول.♡
النهايه..♥
كان في بنوته طلبت مني اسكريبت بإسم أمنيه ومحمد داا اهداء ليها زي ماوعدتهاا ♥
روقه
♕بقلم يارا غزلان♕