رواية خيانه زوجيه الفصل الاول والتاني والتالت والرابع والخامس بقلم عادل عبدالله حصريه وجديده
انا بحب واحده تانيه وهتجوزها.
: ده اخر كلام عندك ؟
: ايوه ده اخر كلام .
: طب وانا وعيالك هتعمل معانا ايه؟
: انا اسف بس هى مش عايزه ضره ف انا هطلقك ومتقلقيش العيال هيكونوا معاكي وانا كل فترة هاجي ابص عليهم ومصروفهم هبعتهولك كل اول شهر .
: انا مش عاوزة مصروف العيال انا عاوزاك انت تفضل معانا .
: اسف ده قرار نهائي . )
خرج جوزي وقعدت مع نفسي افتكر كل حاجة حصلت من اول يوم عرفته فيه لحد دلوقتي .
*****
فلاش باك
طول عمري وانا اكتر حاجة بخاف منها هي الخيانة .
تبدأ قصتي لما استلمت شغلي في الشركة الجديدة ومن اول لحظة دق قلبي اول ما شوفت رأفت . حبيته بدون تردد حتي من قبل ما اعرف هو مين !!
رأفت اكتر واحد ساعدني في الشغل وبمجرد ما شوفته اول مرة بصراحة جذبني جدا ذوقه واخلاقه ووسامته كل حاجة فيه تجنن .
ومن اول يوم و حسيت اني مش غريبة علي المكان ، حسيت اني بين اهلي وناسي .
كل زمايلي في الشركة كانوا لطاف جدا واستقبلوني استقبال ممتاز وبدأوا يتعاونوا معايا في فهم الشغل .
رأفت هو رئيسي المباشر في الشغل ، هو مش اكبر مني بكتير حوالي سبع سنين لكن علشان هو متميز في عمله وعلي قدر كبير من المسئولية قدر يثبت نفسه و يترقي بسرعة في الشركة .
لاحظت انه لابس دبلة في ايده الشمال فعرفت انه متجوز ، زعلت بصراحة كان فيه كل مواصفات فتي احلامي و نفسي يكون من نصيبي لكن الحمد لله علي كل حال يمكن يكون نصيبي لسه مش وقته .
يوم الاجازة روحت عند سارة صاحبتي الأنتيم ، سارة اقرب صاحبة ليا تعتبر اختي وهي كمان بتعتبرني اختها لأن كل اخوتها الكبار متجوزين وعايشين بعيد وهي عايشة مع مامتها لوحدهم .
تقرييا احنا اكتر اتنين اصحاب اوي ، حكيت لسارة علي شغلي الجديد و خصوصا علي رأفت اللي اعجبت به بمجرد ما شوفته .
وقولتلها : رأفت ده حكاية ، اي بنت في الدنيا تتمناه ظريف ولطيف ووسيم واخلاقه واسلوبه مهذب اوي بصراحة يتحب اوي يا سارة يا بخت مراته به .
سارة : علفكرة مش شرط يكون لابس دبلة انه يكون متجوز في شباب كتير بيلبسوا دبلة بدون جواز .
: ياريت يا سارة ياريت .
: طيب اسألي وانتي تعرفي بدل الحيرة دي بس لو طلع متجوز بلاش تفكري فيه وسبيه لبيته وعياله .
: خلاص انا بكره هسأل واحاول اعرف اذا كان متجوز ولا لأ .
روحت الشغل تاني يوم وفضلت مستنية لحد ما جه وقت كنت انا و شيرين زميلتي في الشغل لوحدنا وسألتها : بقولك ايه يا شيرين هو استاذ رأفت متجوز ؟
: وبتسألي ليه يا نورا ؟
قولتلها : سؤال عادي اصلي لاحظت انه لابس دبلة في ايده الشمال .
: بصي يا نورا رأفت مش متجوز ولا خاطب بس نصيحة متفكريش فيه .
: ومين قالك اني بفكر فيه !! ده سؤال عادي .
: انا قولت انصحك وخلاص .
: وليه بقي بتنصحيني اني مفكرش فيه ؟؟!!
: يعني انتي بتفكري فيه ؟
: يا بنتي انا بسأل بس فضول مني مش اكتر انما انا مش مهتمه به اصلا .
: طيب عموما ولو كنتي بتفكري فيه كان غيرك اشطر ، رأفت ده شكله مش بيفكر في الجواز اصلا ولا بيعمل علاقات مع حد ، هو اكتر حاجة يضحك ويهزر بس وخلاص .
: يمكن يكون مرتبط بحد من بره الشغل ؟
: معتقدش ، كان علي الاقل هتلاقيه مشغول في الموبايل طول اليوم او هيبان عليه ، انما هو طول اليوم شغل وبس .
: وانتي يا شيرين مش فكرتي فيه ؟
: مش هكدب عليكي اول ما جيت الشركة اعجبت به وحاولت الفت انتباهه لكني لقيت مفيش فايده منه و اتخطبت بعدها مرتين .
: يعني انتي مخطوبة ؟؟
: لأ فسخت الخطوبتين .
: لسه بتفكري في رأفت ، قصدي استاذ رأفت ؟
:لا ما انا قولتلك مفيش منه امل .
رغم اني كنت سعيدة بأني عرفت انه مش متجوز ولا مرتبط ولكني حسيت بغيرة شديدة من شيرين عليه !!! حسيت انها عاوزة تبعد عن رأفت اي بنت ، اكيد هي لسه بتحبه !!
لكن انا قررت من جوايا اني اتحداها واتحدي نفسي وبدأت ارسم خطة لجذب انتباه رأفت بأي طريقة .
اهتميت بمظهري جدا ، لبسي البرفن والميكاب كانت احسن حاجة كل يوم .
اظهرت واستخدمت كل اسلحة الانثي علشان اوقعه في شبكة حبي .
ورغم اني كنت حاسة اني قدام تحدي مستحيل خصوصا بعد كلام شيرين الا انه لم يمر شهر حتي بدأت أشعر بأن رأفت وقع في حبي او علي الأقل لفت انتباهه و اعجب بيا !!
اول ما حسيت باعجابه بيا وتفكيره فيا بدأت اتدلل وابعد ساعة واقرب ساعة لغاية ما حسيت انه كان هيتجنن .
في الوقت ده كانت شيرين مراقبة الموقف بدقة و لكن كانت متوقعة اني هفشل زي ما هي فشلت .
كانت صدمة كبيرة لشيرين لما لاحظت اعجاب واهتمام رأفت بيا .
وبعدها بأيام كان رأفت قاعد مع بابا وبيتفقوا علي الخطوبة .
وفعلا اتخطبنا و شوفت الغيرة من كل زميلاتي في الشغل خصوصا شيرين اللي اتغيرت ١٨٠ درجة وبقيت مش بتتكلم معايا ابدا وفي نفس الوقت بدأت تقرب اوي لرأفت وتستخدم اسلحتها كأنثي مع رأفت !!
الحلقة الثانية
فعلا اتخطبنا و شوفت الغيرة في عيون كل زميلاتي في الشغل خصوصا شيرين اللي اتغيرت ١٨٠ درجة وبقيت مش بتتكلم معايا ابدا وفي نفس الوقت بدأت تقرب اوي لرأفت وتستخدم اسلحتها كأنثي مع رأفت !!
وانا بقيت الغيرة بتقتلني خصوصا ان عينها كانت عليه قبل ما يخطبني !!
حاولت اتظاهر اني مش مهتمة لكن مقدرتش ، لحد ما اتكلمت مع رأفت بصراحة ، قولتله : انا عايزة اعرف في ايه بينك وبين شيرين ؟
: مفيش اي حاجة ، عادي جدا .
: لأ مش عادي انا شايفاها علطول لزقالك وضحك وهزار معاك طول النهار !!
: لأ احنا بنتكلم طول النهار بحكم شغلنا مع بعض وانتي بتكوني معانا ، وبعدين انا مش بحب الأسلوب ده .
: اسلوب ايه ؟
: الخنقة بقي وكلمت مين وروحت فين والجو ده .
:هو مش من حقي اني اغير عليك ؟؟
:من حقك بس من غير ما تخنقيني .
: طيب يا رأفت مش هخنقك بس يا ريت تراعي مشاعري شوية .
: انا معملتش حاجة تجرح مشاعرك .
: وضحكك وهزارك مع البت دي ميجرحش مشاعري ؟؟!!
: انتي بس اللي حساسة زيادة عن اللزوم وعموما انا علشان بحبك ومش عاوز ازعلك مش هضحك معاها تاني .
تاني يوم لاحظت حاجة كانت هتجنني !! شيرين تقريبا مش بتتكلم خالص مع رأفت ، ورأفت كمان مش بيكلمها الا بشكل رسمي جدا في اوامر الشغل بس !!
طيب رأفت تصرفه كده علشان كلامي معاه البارح انما شيرين عملت كده ليه !!! اكيد بيتكلموا مع بعض من ورايا وهو قالها !!!!
الأغرب بقي ان رأفت طول اليوم كل شوية تجيله رنة علي الموبايل ويأخده ويطلع يتكلم بعيد وفي نفس الوقت كانت شيرين بتتكلم في الموبايل بصوت هادي مش مسموع خالص !!!!!
ولما سألته عن التليفونات اللي بتجيله كل شوية قالي انه خالته مريضة في المستشفي وبيكلم اولادها كل شوية يطمن عليها !!
طلبت منه اني اروح معاه ازورها (علشان اتأكد بنفسي اذا كان بيكدب عليا ولا لأ).
وافق في الاول وقالي نروح بعد الشغل و لما خرجنا من الشغل اتحجج بأنه مرهق وأجل زيارتها لتاني يوم !!
طبعا انا في اليوم ده كنت هتجنن خلاص من الغيرة والشك .
كنت تقريبا متأكدة ان في حاجة بينه وبين شيرين .
طلبت منه اني افتح مكالماته ومحادثات الواتس والماسنجر علي تليفونه لكنه رفض بحجة ان ده معناه اني بشك فيه !!
زعلنا مع بعض بسبب كده واتخاصمنا كام يوم وبعدين لقيته جايب لي هدية وبيقولي يا ريت تعرفي اني مش بحب حد غيرك .
اتصالحنا لكن بعدها بأيام كان عامل البوفية غايب في اليوم ده وقومت علشان اعملي فنجان قهوة .
خرجت من المكتب ودخلت البوفيه لقيت شيرين واقفة بتعمل قهوة و رأفت واقف جنبها لوحدهم وبيضحكوا !!!
اتأكدت ساعتها ان في حاجة بينهم !! خلعت دبلة الخطوبة ورميتها في وشه و اخدت شنطتي ومشيت من الشغل .
فضل رأفت يرن علي موبايلي فقفلته وروحت عند سارة صاحبتي واول ما دخلت بكيت بشدة وهي بتسألني فيه ايه اللي حصل ؟
قولتلها وحكيتلها علي كل اللي حصل قالتلي : انتي بس اللي شكاكة وغيرتك زيادة عن اللزوم ، شيرين بتعمل كل ده علشان تغيظك وانتي دلوقتي حققتلها اللي هي عاوزاه .
: بس انا متأكده ان في حاجة بينهم .
: يا نورا ده في دماغك بس يا حبيبتي ، خطيبك بيتعامل معاها بتلقائية وهي بتحاول تضايقك بتصرفاتها .
: مش قادرة اصدق .
: والدليل علي كلامي ان هي كانت قدامه من قبل ما يخطبك لكنه خطبك انتي ، وكمان لو في حاجة بينهم ايه اللي يخليه يستمر معاكي ؟؟ كان فسخ الخطوبة وخطبها هي .
: تفتكري كده ؟؟
: ايوه طبعا اكيد .
: طيب انا اعمل ايه دلوقتي ؟؟
: هو اكيد هيحاول يكلمك تاني ، ردي عليه وعاتبيه وعرفيه انك عملتي كده علشان بتحبيه .
وفعلا لما فتحت الفون اتصل بيا وحاول يفهمني انه كان عاوز يعمل قهوة وكان منتظر لما شيرين تخلص وانه عمره ما حب غيري ابدا .
اتصالحنا وقررت بعدها اني احاول اسيطر علي شعور الغيرة عندي علشان مضيعش حبي له .
وعدت فترة الخطوبة واتجوزنا في حفلة كانت كبيرة جدا حضرها كل اهلنا واصدقائنا وزمايلنا في الشغل .
ورغم اني كنت شايفة نظرة الغيرة في عيون زمايلنا في الشغل ده غير شيرين اللي فضلت ترقص طول الليل رغم ان كان واضح عليها الحزن الا ان حصل موقف في الفرح عمري ما كنت اتوقعه ابدا .
واحنا قاعدين في الكوشة وكل المعازيم بيهنونا ويباركولنا اتفاجئت ببنت قربت مني وسلمت عليا وبعدين اخدت رأفت بالحضن وفضلت تبوس فيه وانا واقفة !!!!!
لما طولت في الحضن اوي مسكت ايديها وقولتلها : ايه ده مش للدرجادي !!! اعملي حساب اني واقفة جنبه .
قالتلي : سوري اصل انتي مش عارفة رأفت ده ايه بالنسبالي ، ده حبيبي وروح قلبي من جوه !!!
كلامها نرفزني وعصبني اكتر ، قولت لرأفت : هي مبن الهانم دي ؟
قالي : دي شروق بنت خالتي. .
: ومالها عماله تبوس وتحضن فيك كده ليه ؟ هي كانت مسافرة ؟
: لا ابدا مش مسافرة هي بس مش شافتني من شهرين .
: نعم !! شهرين يعملوا فيها كده ؟!! اومال لو مش شافتك سنة هتعمل ايه ؟؟ هتاخدك علي اوضة النوم بقي !!
: ايه اللي بتقوليه ده ؟!! انتي مجنونة ؟!!
: انا عاوزة تفسير للي شوفته ده بدل ما اقوم واسيبلك الفرح وامشي .
: لأ بقي ده انتي مجنونة بجد .
: لو مش رديت عليا حالا وفهمتني معني اللي انا شوفته ده هتشوف الجنان اللي علي اصوله .
: انا هقولك مش علشان تهديدك ده ، هقولك بس علشان متفهميش حاجة غلط .
: اتفضل قول .
: شروق دي من زمان واحنا بنلعب وواخدين علي بعض تقدري تقولي زي الاخوات ، ده حتي بتعمل كده قدام جوزها عادي .
: يبقي العيب في جوزها مش فيها .
وبعد عشر دقايق كانت شروق سلمت علي كل اللي في الفرح راحت جت هي ومامتها وعيالها الصغيرين علشان يتصوروا معانا .
الغريب انها قعدت علي ايد الكرسي اللي قاعد عليه رأفت لدرجة انها كانت قاعدة تقريبا علي دراع رأفت !!!
بعد الصورة فضلت قاعدا زي ما هيه وعماله تترقص وتتهزر وهيه قاعدة .
من غيظي قولتلها قومي يا حبيبتي مع علي دراع جوزي وتعالي اقعدي علي رجليا .
قامت شروق واعتذرت ومشيت وهي مستغربة من كلامي .
رأفت قالي : ليه عملتي كده كسفتيها اوي ؟؟
: ده انت كنت مبسوط بقي بقاعدتها دي .
: قولتلك دي زي اختي .
: ايوه بس مش اختك ، يجوز انك تتجوزها ولا لأ ؟؟
: ايوه يجوز .
: تبقي البت دي مش محترمة ومتعملش كده تاني ، انت فاهم ؟؟
: انا مسمحليكش. تتكلمي عنها بالشكل ده .
: وانا مسمحلكش انك تستغفلني بالشكل ده .
: طيب اهدي دلوقتي ولما نروح بيتنا نتفاهم .
: مفيش تفاهم يلا علشان انا عاوزة امشي دلوقتي .
: لسه بدري ، في معازيم لسه مش وصلوا ولسه بدري اوي .
: لما مش قومت وخلصت الفرح دلوقتي همشي وابقي كمل الفرح مع مدام شروق .
وفعلا خلصنا الفرح بدري وركبنا عربية الزفة وروحنا علي شقتنا ومن بجاحة شروق دي صممت انها توصلنا لحد ما دخلنا شقتنا !!
سارة صاحبتي لما شافتني مترفزة بالشكل ده طول الوقت تهدي فيا وفضلت معايا لحد ما طلعنا الشقة .
مشيوا كلهم وقفلنا الباب ولقيت رأفت ....
الحلقة الثالثة
وفعلا خلصنا الفرح بدري وركبنا عربية الزفة وروحنا علي شقتنا ومن بجاحة شروق بنت خالته صممت انها توصلنا لحد ما دخلنا شقتنا !!
سارة صاحبتي لما شافتني مترفزة بالشكل ده طول الوقت تهدي فيا وفضلت معايا لحد ما طلعنا الشقة .
مشيوا كلهم وقفلنا الباب ولقيت رأفت بيقولي : ينفع اللي عملتيه ده ؟
قولتله : انا عاوزة اعرف انت بينك وبين شروق دي ايه ؟ وازاي بتحضن وتبوس فيك بالشكل ده وجوزها ده ايه بقي ؟ طرطور يعني ؟
: حاسبي علي كلامك كفاية اللي عملتيه في الفرح الحمد لله ربنا ستر ، كانت هتبقي فضيحة .
: كلام ايه هو انا قولت حاجة ! شروق دي مش محترمة ومش عاوزة اشوفها ولا تيجي بيتي ابدا .
: طيب كفاية بقي علشان لو نطقتي حرف تاني هتتطلقي وتروحي لأهلك .
: طيب يلا طلقني وروحني لأهلي .
: طيب ادخلي دلوقتي وانا اطلقك بعد كام يوم كده علشان كلام الناس .
: الناس كده كده هتتكلم .طلقني دلوقتي احسن .
: اعوذ بالله من الشيطان الرجيم ، ده شيطان ودخل بينا يا حبيبتي استهدي بالله وادخلي غيري الفستان . بلاش نضيع فرحتنا بالشكل ده .
بصيت له ودخلت اوضتي وقفلت الباب علشان اغير الفستان .
و لما اتأخرت لقيت رأفت وقف ورا الباب وخبط علي الباب وسألني : حبيبتي تحبي اساعدك في حاجة ؟
مش رديت عليه .
: هو انتي مخاصماني ولا ايه ؟
بردو مش رديت عليه .
: انتي لسه زعلانة ؟
مش رديت عليه .
: طيب افتحي يا قلبي هقولك حاجة .
: روح يا رأفت دلوقتي انا هنام .
: اروح فين ؟
: روح نام في اوضة الاطفال .
: هو انا كنت متجوز علشان انام في اوضة الاطفال !! افتحي يا حبيبتي .
:مش هفتح روح نام هناك بقولك .
: انام هناك ازاي !! هو في عريس ينام لوحده ؟!!!
: خلي بنت خالتك تنفعك . يلا امشي علشان عاوزة انام ، مش هرد عليك تاني .
فضل واقف ورا الباب اكتر من ربع ساعة يتكلم و يتحايل عليا علشان افتحله وانا مش برد عليه .
والصبح كان رأفت قضي ليلة العمر لوحده في اوضة الاطفال !!!
و جاء اهلي في الصباحية علشان يهنونا وهو طبعا اشتكالهم من افعالي . وفي اليوم التالي اتي اهل رأفت يهنونا وكان معاهم شروق !!طبعا انا كنت متضايقة جدا .
وفضلنا زعلانين ايام وبعدين اتصالحنا وقضينا شهر العسل بعد ما وعدني ان شروق بنت خالته مش هتيجي عندنا تاني ابدا .
خلصت الاجازة ورجعنا للشغل وزمايلي في الشغل كانوا هيجننوني !!
كانوا بيتعاملوا مع رأفت بمياعة وسهوكة زيادة عن اللزوم !!
وكل يوم واحنا راجعين من للشغل نتخانق بسبب كده ، وخصوصا شيرين اللي كانت بتيجي الشغل عاملة زي الرقاصة !!
وفي يوم اتفاجئنا كلنا ان شيرين اتخطبت ، عاوزة اوصفلكم فرحتي يمكن كانت اكتر من فرحتها هي لنفسها !!!!!
بعد فترة حسيت بتعب وعرفت اني حامل .
خلصت شهور الحمل وولدت بنوته وسميتها ريتاج واخدت اجازة سنة من الشغل علشان اقدر اراعيها .
قعدت في البيت وكانت سارة بتيجي تقعد معايا كل يوم .
وكانت الغيرة هتموتني علي رأفت لما بيخرج كل يوم لما بشوفه يلبس طقم جديد ويتبرفن كنت اتخيل انه هيقابل واحدة ويخوني معاها .وكنت دايما بشتكي لسارة من غيرتي عليه .
مرت الاجازة ومش باقي منها الا شهر واحد وفي يوم اتصلت عليا سارة وهي بتبكي بحرقة .
حاولت اهديها علشان اعرف ايه اللي حصل ، عرفت منها ان امها ماتت .
روحتلها بسرعة ووقفت جنبها انا ورأفت لأن تقريبا هي مبقاش ليها حد غيري لغاية ما خلصنا اجراءات الدفن والعزاء .
سارة دلوقتي بقيت عايشة لوحدها في الشقة فطلبت منها تيجي تقعد عندي كام يوم لحد ما ترتب امورها .
وبعد الحاح مني شديد عليها جت تقعد عندي .
كل يوم الصبح انا بصحي بدري واصحي رأفت ويقوم ياخد شاور علي ما اجهز الفطار وافطره وينزل وبعد كده اصحي سارة واقعد افطر معها و اقعد معاها نحكي واحنا بنعمل شغل البيت .
كنت بحاول اضحك معاها علشان اخرجها من حالة الحزن .
واخر اليوم قبل المغرب يرجع رأفت واكون جهزنا الاكل ونتغدا وبعدها نقعد كلنا ومعانا سارة نحكي ونلعب مع ريتاج وحوالي الساعة عشرة ندخل ننام .
وكانت احيانا سارة تاخد ريتاج تنام معها طول الليل .
سارة كانت لابسه علطول اسود وانا قولتلها مينفعش كده يا حبيبتي الحزن في القلب ولبس الاسود بيجيب كأبة اقلعي الاسود والبسي هدومك العادية .
وبعد مرور اكتر من عشرين يوم قلعت سارة الاسود ورجعت تلبس هدومها العادية .
وبدأت سارة تخرج من حالة الحزن بالتدريج .
ولما كملت سارة عندنا حوالي شهر قالتلي : انا تقلت عليكم اوي يا نورا سامحيني كفاية كده اوي لازم ارجع بيتي .
قولتلها : عيب كلامك ده والله انا بعتبرك زي اختي بالظبط ، متقوليش كده تاني .
: اشكري رأفت علي الفترة اللي قعدتها معاكم .
: لأ انتي مش هتمشي من هنا دلوقتي خالص .
: يعني هفضل قاعدة عندكم علطول !! كفاية كده .
: ماهو انا مش هسيبك تقعدي لوحدك هناك .
: معلش يا نورا سبيني علي راحتي .
: طيب خلاص هسيبك تروحي بس اسبوع كده ولا كام يوم وترجعي هنا تاني سامعه ؟؟
: ماشي يا نورا ، ان شاء الله .
رجعت نورا بيتها وقعدت لوحدها وانا كل يوم كنت بتصل بيها مرتين تلاته اطمن عليها واونس وحدتها . عادل عبد الله
وبعدين قولتلها : انتي لازم تشتغلي يا سارة انا مش عارفة انتي ليه مش اشتغلتي لحد دلوقتي ؟
: ما انتي عارفة يا نورا انا عمري ما اشتغلت لحد دلوقتي ومعاش بابا الله يرحمه مكفيني ومش محتاجة للشغل .
: بس لازم تشتغلي علشان قعدة البيت وحشة وهتتعبك ومن ناحية تانية علشان تقابلي ابن الحلال انما مينفعش تفضلي قعدة كده لوحدك .
: طيب شوفي رأفت جوزك لو ينفع يشوف لي شغل ؟
: انا هكلمه وانا كمان قدامي كام يوم والاجازة تخلص وارجع الشغل وهشوفلك لو عرفت انزلك الشغل معانا . عادل عبد الله
كلمت رأفت وبدأنا ندورلها علي شغل لكن في الوقت ده كانت اعصابها تعبت جدا من قعدتها لوحدها فأجبرتها تيجي تقعد معانا تاني لحد ما اشوفلها شقة قريبة مني .
رجعت تاني سارة تعيش تاني معنا وبدأت ادورلها علي شقة جنبي .
لكن المرة دي كانت تصرفات سارة غريبة عن قبل كده !!
سارة كانت بتصحي بدري علي غير عادتها وتقعد تفطر مع رأفت ومعايا قبل ما ينزل علي شغله !!
وكانت تقعد معانا بالليل وتطول في السهر ونبقي عاوزين ندخل ننام لكننا كنا نتكسف نقوم علشان مش نحرجها ، لكن مش غيرت منها ولا شكيت انها ممكن تفكر في جوزي ابدا !!!!!!
افتكرت ان في شقة في نفس العمارة كانت فاضية ، كلمت صاحب البيت علشان ناخدها لسارة وتبقي جنبي وفي نفس الوقت كل واحد ياخد راحته في بيته .
الحلقة الرابعة
افتكرت ان في شقة في نفس العمارة كانت فاضية ، كلمت صاحب العمارة علشان ناخدها لسارة وتبقي جنبي وفي نفس الوقت كل واحد ياخد راحته في بيته .
وفعلا كلمت صاحب العمارة وهو رحب جدا بالموضوع خصوصا لما عرف ظروفها وانها من طرفنا .
وبعد يومين بالظبط كنا بننقل الحاجات الخاصة بسارة علشان تعيش في شقتها الجديدة .
وكانت الصدفة اني في نفس الاسبوع الاجازة انتهت ورجعت تاني لشغلي فأضطريت اني اسيب ريتاج مع سارة كل يوم الصبح بعد ما نفطر كلنا مع بعض وانزل انا ورأفت وارجع انا قبل رأفت بساعتين اعمل الاكل وارتب البيت يكون رأفت وصل وناكل كلنا مع بعض ونفضل قاعدين نقضي السهرة مع بعض وبردو كانت تطول في السهر ونبقي عاوزين ندخل ننام انا ورأفت لكننا كنا ننكسف نقوم علشان مش نحرجها .
مع تكرار الموقف ده كل يوم اضطريت اني لما كانت تفضل قاعدة كنت اقولها احنا داخلين ننام انا ورأفت واقعدي برحتك البيت بيتك فكانت تتحرج وتقوم وتطلع لشقتها .
الاغرب كمان انها بدأت تلبس لبس غريب اوي لما تنزل عندي !!!
كانت بتلبس باديهات وبنطلونات ضيقة رغم انها مليانة فكانت كل مفاتنها بتكون بارزة اوي !!! وكمان كانت تنزل بشعرها وميكاب وكأنها بتتزين لجوزها !!!
افعالها ضايقتني جدا خصوصا اني لاحظت ان رأفت بيبص عليها واحنا قاعدين مع بعض .
لكن سارة كانت غالية عندي زي اختي واكتر مش اقدر اني اجرحها بكلمة ده غير انها كانت عاقلة ودايما تنصحني اني احافظ علي رأفت بس مش عارفة حصلها ايه بعد موت ماممتها !!! او يمكن تكون مش واخده بالها .
وفي يوم لاحظت انها نازلة بميكاب اوفر اوي ولبسها ضيق اوي ، قولتلها حلو اوي الميكاب ولبسك ده ينفع تقعدي بيه لما تبقي عروسة مع جوزك .
الغريبة انها ضحكت وعملت نفسها مش اخدت بالها من قصدي من الكلمة.
بيني وبين نفسي قولت لازم بقي اعاند معها و بعد ما اكلنا علطول روحت داخلة اوضتي وعملت ميكاب جامد اخر حاجة وبرفن كتير وروحت لابسه بيبي دول قصير جدا ومقتوح من كل حتة وخرجت اقعد معاهم .
لما خرجت كانوا بيضحكوا اوي لكن اول لما سمعوا صوتي خارجة سكتوا علطول !!! رأفت اول لما شافني بالمنظر ده جاله ذهول !!! ومش عارف يقول ايه !! وكمان سارة ظهر عليها انها اتكسفت .
روحت قعدت جنب رأفت و العب في شعره حطيت ايدي عليه !! قامت سارة وقالت : معلش انا طالعة بقي .
ضحكت وقولها هتطلعي بدري لبه كده خليكي قاعدة معنا شوية . اتكسفت وطلعت .
رأفت قالي : انتي ايه اللي عملتيه ده ؟
: عملت ايه يا حبيبي ؟
: هو ده منظر تطلعي بيه وواحدة غريبة قاعدة ؟
: اذا كان هي معندهاش دم لازم كنت اعمل كده .
: ليه هي عملت ايه ؟ البنت يتيمة وغلبانة .
: انت مشفتش نازلة ولابسه ايه ونازلة بشعرها !! وانا لفت نظرها. لكن هي عملت نفسها مش واخدة بالها .
: انتي حرة انتي وصحبتك بس بلاش تحرجيني وسطكم .
كل اللي فات ده لفت انتباهي اني لازم احذر من سارة اوي من ناحية جوزي .
عدا كام يوم و سارة مش بتنزل تقعد معانا !! كل يوم ارجع من الشغل واكلمها اقولها تنزل تقعد معانا كانت بتتحجج انها تعبانه او انها هتنام .
رأفت قالي : شوفتي جنانك وغيرتك المجنونة عملت ايه !! خليتي البنت المسكينة بطلت تنزل و قعدت لوحدها !!
: وانت مشوفتش يا رأفت اللبس اللي كانت بتلبسه عامل ازاي ؟!!
: يا حبيبتي هي مفيش حاجة في دماغها معتبرانا عيلتها وقاعدة معانا علي راحتها وبعدين هي مكنتش بتلبس اوفر اوي يعني .
: انت بتستهبل بقي !! ده البت كان جسمها هينط من الهدوم !!
ضحك وقالي : انتي غيرانة بقي علشان جسمها حلو !!
: والله . عجبك اوي جسمها ؟ يعني كنت ملاحظ وبتبص اهو عليها ؟؟!!! شوفت اني كان عندي حق ؟
: انتي مفيش فايدة فيكي غيرتك وشكك وتفكيرك الغلط هيخليكي تخسري كل اللي حواليكي واولهم انا وصاحبتك كمان .
: قصدك ايه يا رأفت ؟
: قصدي ان للصبر حدود ومش هفضل مستحمل جنانك ده كتير .
: يعني انت عاوز تسيبني يا رأفت ؟
: انا مش عاوز لكن لو استمريتي علي كده مش هقدر اكمل معاكي ولازم اسيبك .
: انت بتتكلم جد ؟
: ايوه طبعا .
: يعني انا غلطانة اني بحبك ؟!!
: ده مش حب ده جنان .
: طيب خلاص يا حبيبي مش هضايقك تاني .
: ده انا ما صدقت انك هديتي من ناحية زمايلنا في الشغل وحرمت شروق بنت خالتي تيجي تزورنا ، هتغيري كمان من صاحبتك !!! انا خايف المرة الجاية تغيري من نفسك .
: خلاص يا رأفت اوعدك دي اخر مرة مش هغير عليك تاني .
: هنشوف .
تاني يوم رجعت قبل رأفت بساعتين زي كل يوم وطلعت لسارة واتكلمت معاها وقولتلها : انتي زعلانة مني ولا ايه ؟
قالتلي : لا ابدا . عادل عبد الله
: اومال بطلتي تنزلي تقعدي معانا ليه ؟
: مش عاوزة اضايقكم .
: بالعكس ، لا يا سارة انتي عارفة اني بحب اقعد معاكي وكمان رأفت عمره ما اضايق او اشتكي من وجودك .
: انا عارفة بس مينفعش كل يوم افضل قاعدة كده علي قلبكم ، اكيد عاوزين تاخدوا راحتكم شوية .
: بطلي بطلي كلامك العبيط ده ، بعد كده انتي لو مش نزلتي هجيب رأفت ونطلعلك هنا علي قلبك مش هنسيبك .
ضحكت سارة وقالت : دا انتوا تنوروني ياريت تطلعوا تقعدوا معايا ، علي الاقل لما تحبوا تقعدوا لوحدكم يبقي مش هتطلعوا من الاساس او هتطلعوا وتنزلوا تاني في الوقت اللي يناسبكم .
: مالك يا سارة بقيتي حساسة كده ليه ؟ عادل عبد الله
انفجرت سارة في البكاء وقالت : انا عايشة ليه ؟ يا ريتني اموت وارتاح ؟ انا لزمتي ايه في الدنيا ؟ مليش حد ومفيش حد عاوزني ولا بيهتم بيا ، وبقيت تقيلة علي كل الناس .
: ليه كل ده يا سارة ؟!! دا انتي عارفة اني بحبك اكتر من اختي وريتاج كمان متعلقة بيكي اوي ، ومسيرك هتتجوزي ويبقي ليكي بيت وراجل وتحسي باستقرار اكبر .
: هتجوز ايه ؟ انا عمري بيكبر ومفيش حد مناسب بيتقدملي ، كل اللي اتقدمولي مش مناسبين خالص ، وكل ما هكبر اكتر فرصتي في الجواز هتقل .
: لأ بقي ده انتي طالبة معاكي نكد !!! ليه الكأبة دي ؟؟ انتي لسه صغيرة اوي علي الكلام ده !! وقولتلك انتي لو اشتغلتي كل حاجة في حياتك هتتغير للاحسن كتير .
: طيب هو انا مانعت !! ما انا قولتلك شوفيلي شغل وانتي اللي مش رديتي عليا !! اعمل ايه ؟
: عندي في الشغل مش هينفع دلوقتي ، شوفي في اعلانات الوظايف وان شاء الله ربنا يوفقك . يلا بقي علشان هتنزلي معايا .
: بلاش النهارده علشان انا تعبانة بجد .
: طيب بكره هتنزلي وتقعدي معانا زي ما كنتي متعودة ؟
: ان شاء الله .
نزلت علشان اجهز الاكل وارتب الشقة قبل ما رأفت يرجع .
وفعلا خلصت كل حاجة قبل ميعاد رجوع رأفت بنص ساعة وقولت اقف في الشباك شوية علي ما يرجع رأفت .
لسه ببص لقيت رأفت داخل العمارة ببص في الساعة لقيته راجع بدري !!! روحت قعدت قدام الباب مستنياه يفتح الباب علشان اسأله عن سبب رجوعه بدري لكنه مش دخل !!!!!
ده عدا وقت كتير !!! هو فين كل ده !!! معقول اللي في دماغي !!! يبقي الاتنين كانوا بيمثلوا عليا كل ده !!!!!
الحلقة الخامسة
لسه ببص لقيت رأفت داخل العمارة ببص في الساعة لقيته راجع بدري !!! روحت قعدت قدام الباب مستنياه يفتح الباب علشان اسأله عن سبب رجوعه بدري لكنه مش دخل !!!!!
ده عدا وقت كتير !!! هو فين كل ده !!! معقول اللي في دماغي !!! يبقي الاتنين كانوا بيمثلوا عليا كل ده !!!!!
خرجت من شقتي بالراحة وطلعت علي السلم بدون صوت ووقفت اسمع علي باب سارة من بره لكن مش سمعت صوت نهائي !!!
رنيت الجرس بسرعة لكنها اتأخرت في فتح الباب !!
فضلت ارن واخبط علي الباب بقوة علشان تفتح وبمجرد ما فتحت زعقتلها وقولتلها رأفت فين ؟؟ اخرج يا رأفت انا شوفتك وانت داخل العمارة ، اطلع ومتداريش نفسك .
وسارة كانت واقفة مذهولة بتقولي : انتي بتقولي ايه !! انتي اتجننتي !! رأفت ايه اللي هيجيبه هنا لوحده !!
وانا فضلت اهزأ فيها واقولها كده يا سارة تخونيني مكنش العشم يجيني الغدر منك انتي بالذات .
وفجأة لقيت رأفت طالع علي السلم من ورايا وبيقولي فيه ايه ؟ صوتكم عالي ليه ؟!!!!
من شدة الخجل كنت عاوزة الأرض تنذق وتبلعني !!!!!!
سارة دموعها نزلت منها وبصت لي نظرة عتاب مش هقدر انساها ابدا وقفلت باب الشقة في وشي !!
رأفت قالي : ايه الكلام اللي انا سمعته علي السلم ده ؟!!! انتي ازاي يوصل بيكي الحال انك تشكي فيا وفي صحبتك بالشكل ده !! وتكلميها بالطريقة دي !! ده انتي فضحتيها يا شيخة وهي بريئة حرام عليكي !!
قولتله : انت كنت فين ؟؟ انت داخل العمارة من اكتر من ربع ساعة !!!
: قابلت صاحب العمارة وانا طالع وكان بيكلمني علشان عاوز يعمل صيانة في العمارة .
: انا كتت هتجنن لما شوفتك داخل العمارة ومش طلعت !! كنت لازم اغير عليك طبعا .
: ده شك مش غيرة ، وانتي لسه ليكي عين تتكلمي وتدافعي عن نفسك بعد اللي عملتيه .
: خلاص انا اسفة مكنتش اقصد .
: سهلة كده ؟ اسفة !! وصحبتك اللي فضحتيها ومنظري قدام الجيران ؟؟
: انا هعتذر لها وهي هتقبل اعتذاري .
: دي لو قبلت اغتذارك يبقي معندهاش دم .
: طيب اعمل ايه يعني ؟
: تروحي عند اهلك .
: بتقول ايه ؟
: بقولك تروحي عند اهلك . كل اللي بينا انتهي .
: انت بتتكلم جد ؟
: ايوه اتفضلي ، ولا تحبي امشي انا واسيبلك البيت .
: طيب انا ماشية بس مش راجعة تاني وتبعتلي ورقة طلاقي .
اخدت ريتاج وحاجاتي ومشيت وروحت عند ماما .
اتصلت بسارة كتير علشان اعتذرلها لكنها مش ردت عليا ابدا .
روحت حكيت لماما علي كل اللي حصل ، ماما قالتلي : لازم تعتذري لسارة و لرأفت .
قولتلها : حاولت كتير الاتنين مش قابلين اعتذاري خصوصا سارة اللي مش عطيتني فرصة اعتذرلها اصلا .
ماما قالتلي : اللي عملتيه ده شئ مش سهل واكيد هياخدوا وقت علي ما يهدوا شوية علشان يقبلوا اعتذاري .
وغيبت عن الشغل وكانت نفسيتي تعبانه جدا ، وبعد كام يوم تعبت اوي وروحت للدكتور وهناك اكتشفت اني حامل .
انا فرحت جدا وقولت ان ده ممكن يكون سبب ان رأفت يسامحني .
ماما كلمت رأفت وقالتله ان انا حامل ورغم انها حسيت من صوته انه فرح لكنه قالها ان الحمل ده مش في وقته لأن حياتنا مع بعض انتهت .
ماما حاولت تهديه من ناحيتي وقالتله : نورا والله طيبة وبنت حلال وبتحبك دي احسن واحده في ولادي بس هي نقطة الغيرة دي عيبها الوحيد معلش واحدة واحدة نحاول نغيرها معلش علشان خاطري وخاطر البيبي اللي جاي سامحها المرة دي .
: طيب علشان خاطرك بس انا مش هرجع معاها زي الاول الا لما احس منها بتغيير حقيقي .
: حاضر وانا اوعدك انها هتتغير بجد المرة دي .
: طيب و البنت المسكينة دي هتعملها ايه ؟
: انا هروحلها لحد عندها اعتذرلها بالنيابة عن بنتي .
وفعلا رجعت البيت لكن رأفت بقي ينام في اوضة الاطفال وبيتعامل معايا في اضيق الحدود حتي في الشغل نقلني مكتب تاني بعيد عنه وكنا بنروح ونرجع من الشغل مع بعض وتقريبا مش بنتكلم .
يتبع