روايه شطة نار 🔥 الاولى والثانيه والثالثه والاخيره

روايه شطة نار 🔥 الاولى والثانيه والثالثه والاخيره

روايه شطة نار 🔥 الاولى والثانيه والثالثه والاخيره

الاولي 

فى حارة بسيطه اوى بتقف بنت جميله لابسه جلابيه بيضا ومحجبه وعيونها لون البحر وايديها تلفف حرير وبتعمل احلى ساندوتشات فول وفلافل

ومن بعيد جاى عليها الواد صاموله الميكانيكى بيقول

يا صباح الفل على ست البنات ، باقولك مش كنتى زمانك نايمه فى السرير والخدامه جايبه ليكى الفطار يا شطه ، ولا انتى ناويه تفضلى فى الفقر الأزلى ده طول العمر ، يا بت انا بحبك ورايدك فى الحلال

شطه

يا فتاح يا عليم يا رزاق يا كريم، انت ايه يا صاموله مش بتزهق ولا بتمل ، انا قولت الجواز قسمه ونصيب، وكلمه زياده وتقل دم امك على الصبح بتاع كل يوم ده هاخلى ابو ورده يسلم على وشك برضو زى كل يوم

صاموله بيهرش فى قفاه ويقول

اهدى بس يا ست البنات مش كل يوم الحارة كلها تعرف انى بحبك ورايدك وانتى لسه تقلانه عليا ، اصحى يا خالتى ام شطه شوفى بنتك اللى بترفص النعمه وعاوزه تفضل طول عمرها واقفه على نصبه الفول والفلافل

الام

يااا يا صاموله تصدق على رأى البت شطه انت تستاهل ان ابو ورده يسلم على وشك ، يا واد يا قليل القيمه والعقل انت ،البت كل يوم تهزءك وتقولك فارقنا وانت برضو لازق زى القراضه ، بنتى بكرة هتبقى دكتورة وتقف كدة رافعه راسها فى الصيدليه تبيع قطن وشاش قد الدنيا 

شطه

خلاص يا ما بقى انتى كمان ، يلا يا واد حرك الجته احسن افرج عليك الحته

وانتى يا امى اظن انا لسانى ادلدل وانا باقولك أنى فى كليه آداب قسم اجتماع يعنى لا هابقى دكتورة ولا هابيع قطن وشاش

الام

يا بنتى ربك قادر على كل حاجه ، يمكن الاداب دى تطلعك مستادبه ويشغلوكى دكتورة وتلاقى ليا علاج للركب احسن يا بنتى الخشونة تعبانة اوى

شطه

يااااختى يا اما ، وحياتك كفايه بقى احسن وزير التعليم لو سمعك هيحبسك

يلا ياااجعان ، يلا يااا طالع تجرى على أكل عيشك ، اللى عاوز فول يجى يمين واللى عاوز فلافل يجى شمال ، واللى عاوز يمشى يمشى الرزق على الله

وفى نفس الوقت عربيه طايشه اخر موديل وفيها شاب وبنت وتقريبا مسطولين وشاربين حاجه ، والعربيه بتاعتهم تاهت ودخلت الحاره بتاعه شطه ، الشاب اخيرا بيفوق ويقول

ايه ده لوجى ، بت يا لوجى احنا فين انا تقريبا مكنتش شايف الطريق ودخلت فى الحارة دى غلط ومش عارف اطلع ازاى ، بت يا لو جى فوقى الله يخرب بيتك

لوجى

ياااه يا شادى اخص عليك بتصحينى ليه ، انا دماغى بتلف اوى

شادى

اصحى يا بنتى باقولك توهنا يا لوجى انتى ولو حد شافنا هنا ممكن ياخدوا منى العربيه

لوجى بتفتح عيونها بصعوبه وكانها كانت نايمه فى بيتهم وتقول

ايه ده هو النهار طلع ، مش كنا نكمل سهرة فى بيتك ونرجع براحتنا

شادى

يخرب بيت هبلك هتفضحينا ، مش عاوز اسمع حسك لحد ما نعرف هنخرج من المخروبه دى ازى

وشادى بيبص فى الحارة وهو مستغرب اوى ان فى ناس بتصحى بدرى اوى كده ، وبيبص للسما اللى تقريبا اول مرة يشوفها الصبح بدرى، ولوجى كمان بدات تفوق وتعدل نفسها ، ومن بعيد بيشم شادى ريحه الفول والطعميه وبيقول للوجى

الله شامه الريحه الحلوة دى ايه رايك ناكل طعميه وفول

لوجى

ايه طعميه هو انت تعرف الحاجات دى من فين ، انا اخاف اكل القرف ده يحصلى تسمم

شادى

يا بنتى الفول ده اخترع، والطعميه اختراع اكتر منه ، ماما بتجيب طعميه وتعملها فى البيت وانا بحبها

لوجى

ايه مامتك الدكتورة رأفت عزيز استاذ قسم الاجتماع فى كليه الاداب واللى مربيه لينا الرعب بتاكل طعميه

شادى

لوجى حبيبتى امى بنت بلد اوى والحياه اللى عايشها انا دى امى بتكرهك، ولعلمك عاوز اصدمك واعرفك اننا هنفطر طعميه حالا 

ونزل شادى من العربيه وقرب من عربيه الفول بتاعه شطه ، واول ما شافها قال

جود مورنننج.... بليز ممكن اتنين طعميه واتنين فول بليز

شطه

حاضر يا باشا ثوانى بس ادخل امى التواليت احسن محصورة وارجعلك تانى

لوجى سمعتها وهى قاعده فى العربيه وقالت

ايه ده ، انتى بتقولى ايه يا مقرفه ا نتي، شادى تعالى هنا اياك تاكل من اكل البتاعه دى اكيد هيحصلك تسمم

شطه بتبص للوجى من فوق لتحت وتقول

مين دى اللى بتاعه يا اللى شبه خله السنان انتى ، انتى هبله يا بت ولا ايه ، انا شطه بنت المعلم عوض الله الله يرحمه ويبشبش الطوبه اللى تحت راسه ، واحده عرة زيك تقول عليا بتاعه ، ده انتى نهار ابوكى مطلعلوش شمس

شادى بيحاول يدخل وهو مركز اوى مع شطه ، وبيبص ليها نظرات غريبه وبيقول

خلاص خلاص يا انسه حقك عليا ، على فكرة انا حاسس انى شوفتك قبل كدة ، انا شادى عتريس المنياوى ، انتى مين

شطه بتبص ليه من فوق لتحت وتقول

مالك يا جدع داخل عليا دخله سهوكه كدة ، انا مالى انا ومال اسمك هو انت قاعد مع مدام عفاف فى الدور التالت فى السجل المدنى ، يلا يا ولا انجر امشى وخد عود القصب الممصوص دى معاك ، لا استنى انت طلبت أوردر ولازم تاخده ، البضاعه المباعه لا ترد ولا تستبدل

شادى بيضحك على كلامها ويقول

طبعا طبعا ، بس ممكن اخد رقم المطعم لو احتاجت حاجه يعنى الدليفرى يوصلى البيت

شطه

دليفري، ده عند امك يا روح امك هنا لازم تتلطع قدامى نص ساعه وتشم ريحه الاكل علشان تفتح نفسك وتاكل وتبوس ايدك وش وظهر ، إنما الدليفرى ده يوصلك طبق اندومي لامؤاخذه

لوجى حست ان شادى مركز اوى مع شطه علشان كده اتعصبت وقالت

شادى باقولك يلا بسرعه انا معدتي قلبت عليا من القرف ده

ومشى شادى بعد ما أخد الطعمية وحاسب عليها وفى الطريق شادى بيقول

عارفه يا لوجى البنت دى فيها كتير اوى من ماما ومش عارف ليه حاسس انى شوفتها قبل كده او اعرفها ملامحها مش غريبه عليا

لوجى

معقول انت تعرف الأشكال الزباله دى ، لا مستحيل متخلينيش اغير رايى فيك يا شادى بليز

شادى

حبيبتى انا عارف انك تربيه قصور واكيد يعنى واحده زيك بنت سفير متعرفش الناس البسيطه اللى عايشين فى الحوارى دى بس على فكرة بقى قلبهم بيكون ابيض اوى وناس طيبه

لوجى

والله ، طيب اوك لو عاوز انى اجيبلك رقمها واقولها انك معجب اوى بيها اوك عادى على فكرة

شادى

لا معقول برضو هو انا برضو اقدر احب غيرك يا قمر ، ها مش هتخلينى اوصلك برضو واعرف الفيلا بتاعتكم فين

لوجى

لا طبعا انت عاوز الأمن يشوفك ويقول لدادى ، خلاص كدة نزلنى هنا وهات ٢٠٠ جنيه علشان التاكسي معايا دولارات ومفيش فكه

ونزلت لوجى وسابت شادى اللى كمل طريقه ووصل لبيتهم ، شقه حلوة اوى ومن الواضح

ان برضو ابن ناس اوى

شادى بيدخل بيته وبيلاقى امه بتلبس وتجهز وتقول

شادى انت شرفت يا صايع يا ضايع ، انت ناسى انك عندك امتحان التيرم النهارده يا فاشل يا مستهتر

شادى

صباح الخير يا دكتورة عفت انا اسف كنت باذاكر مع لوجى اااا قصدى باذاكر مع محسن صاحبى والوقت سرقنا

محسن برضو ، طيب يلا يا بتاع محسن تاخد شاور وتلبس هدوم عدله اياك اشوفك فى المدرج بالبنطلون المقطع ولا موقف شعرك ، عاوزه ابن الدكتورة عفت يكون راجل مش توتو ، والفطار عندك على السفرة

#شطة_نار 🔥🔥

الثانية 😱

ويلبس شادى ، وهو بيلبس بيكلم محسن صاحبه ويقوله

واد يا محسن اولا امى لو سألتك شادى كان بايت معاك قولها وقطعنا الكتب مذاكرة فاهم ولا لا

وثانيا قولى ، انت تعرف بنات الحوارى وكده الواحد يدخلهم ازاى ، احسن بينى وبينك فى حته بت بتاعه فول وطعمية إنما ايه لازم بكرة تكون سهرانه معايا ، انت عارف مفيش بنت تعصى على شادى عتريس

ويينزل شادى الكليه وامه سبقته علشان امه الدكتورة عفت دكتورة فى كليه الاداب قسم اجتماع وعندهم النهارده امتحان وشادى ولوجى كمان فى نفس الفرقه، وعلى فكرة هى دى نفس الفرقه بتاعه شطه ومش عارفه ليه امها مقتنعه انها هتطلع دكتورة وتبيع قطن وشاش وتعالج الركب وترد المطلقه وترجع الحبيب

وفى الحارة شطه خلصت شغلها وطلعت شقتها وطلعت امها ولبست فستان جميل وحجاب أجمل، وهى نازله بتقول لأمها

ماما عاوزة منى حاجه، وادعيلى عندى امتحان النهاردة عاوزة اخلص بقى السنه دى واشوف مستقبلى بقى

الام

يا بنتى ربنا ينجحك يارب وتبقى احسن مهندسه فى البلد وتبنى عمارات وبيوت ، ويتصلوا بيكى ويقولوا الحقى يا باشمهندسه برج خليفه بيتهز وعاوزينك تظبطيه

شطه

يااالهوى ، بقى برج خليفه بيتهز ليه هو وسط صافينار ، يا امى انا فى كليه آداب قسم اجتماع ومش عارفه هاطلع ايه

صفحة إيمان حسين 

الام

يا بت مفيش حاجه بعيده عن ربنا ، الاستاذ يحيى الفخراني كان دكتور وبقى مدرس تاريخ

شطه

يا لهوى يا لهوى امتى ده يا اما

الام

يوه وحياتك انا شايفاه امبارح فى المسلسل، وربك قادر على كل حاجه نفسى اشوفك دكتورة وتلبسى بلطو ابيض وتعالجى التسلخات اللى تحت باطى دى احسن تعبتنى اوى

شطه

مع السلامه يا امى واوعى تفتحى الباب لحد ، اوعى حد يقولك محمد رمضان عاوزك فى دور تفتحى الباب وحياتى يا امى مش عاوزة ارجع كل يوم ادور عليكى اهدى كده واسمعى حريم السلطان الحلقه ٩٠١ شغاله ماشاء الله وكلى فاكهه كتير بتقوى الذاكرة

الام

اللهم صلى على النبى شوفتى دكتورة دكتورة يعنى

يلا بقى يا جماعه نسيب الحاجه ام شطه فى احلام اليقظة بتاعتها دى ونروح الجامعه وفى كليه الاداب قسم علم اجتماع شطه بتدخل الامتحان متأخرة والدكتورة عفت واقفه بتراقب عليهم زى الصقر وتقول

ايه ده انتى متأخرة ليه يا بنتى متعرفيش المعاد ولا ايه

شطه

معلش يا دكتورة احسن الطريق زحمه اوى ونزلت متأخرة

عفت

ونزلتى متأخرة ليه معندكيش احترام للوقت صح

شطه

لا معنديش قدرة اقنع امى بتنسيق الثانويه العامه

عفت

نعم مش فاهمه مال امك ومال الامتحان

شطه

لا يا دكتورة معلش دى مواضيع عائليه لامؤاخذه ملكيش فيها

عفت

طيب اخر مرة تتأخري والا بعد كده هارفض انك تدخلى الامتحان

شطه عيونها بتطلع نار ومش طايقه كلام الدكتورة عفت ولا طايقه نفسها وفجأه بيدخل وراها شادى ابن الدكتورة عفت

الدكتورة بتقوله بصوت واطى

اتاخرت ليه يا فاشل اعمل ايه فيك دلوقتى

والله يا امى كنت بشرب اللبن وانفذ اوامرك بلاش تهزيء النهارده شكلى وحش قدام الطلبه

طيب يلا انجر تدخل من سكات

وهنا شطه لسه واقفه وشافت ان شادى جاى بعدها ودخل من غير طابور الذنب وقالت

استنى يا كابتن ، باصلى على النبى الشبح جاى بعدى وانتى يا دكتورة دخلتي فى الخباثه وانا عملتى ليا طابور ذنب وده مش عدل على فكرة

شادى بيبص لشطه وافتكر هو شافها فين وشطه بصتله وقالت

يخرب عقلك هو انت ، خلاص علشان بس انت زبونى وانا ما احبش اخسر زباينى

الدكتورة عفت مش عارفه تقول ايه وشطه صوتها عالى والكل واخد باله من الموقف المهم ان الدكتورة عفت لمت الدور ودخلت شطه

وبدا الامتحان والدكتورة عفت مركزة اوى مع شطه ونفسها انها تعمل اى حركه غش علشان ترد ليها الموقف ولكن شطه مذاكرة كويس اوى ومركزه كويس اوى اوى اوى واخيرا وقبل الكل شطه خلصت الامتحان وسلمت الورقه وخرجت

اما الدكتورة عفت بتبص فى ورقتها وشافت ان البنت ما شاء الله متفوقه فعلا ومفيش عندها غلطه

ام شادى ولوجى بيبصوا لبعض وكانهم اول مرة يتعرفوا على المنهج

وفى أثناء البريك ما بين الفترتين شطه واقفه مع نفسها وبتعد فى فلوسها بيقرب منها شادى وعاوز يكلمها وبيتعرف عليها ، و شطه بتشيل الفلوس وتقف معاه وتعرفه انها طالبه معاهم فى الكليه وشادى شكله كدة عاجبه اوى طريقه كلامها والشجاعه اللى بتتكلم بيها وعزمها انها تقعد مع شلته شويه ويعرفها عليهم

اما لوجى شافتهم قربت منهم وقالت

شادى انت مجنون انت جايب بتاعه الفول والطعميه تقعد معانا ، لا ده كده كتير اوى

شطه وقفت وبدأت تفرش الملايه للوجى وقالت

مين اللى قرفانه من نفسها دى ، انتى با بت يا ملزقه انتى الصبح كنت عاوزة اضربك والشبح حاش عنك لكن وحياه ربنا لو تطلعى ليا برة الجامعه لاعرفك قيمتك واخلى اللى ما يشترى يتفرج عليكى ، انا اصلا ميشرفنيش أنى اقعد معاكوا يا شويه مساطيل، يا بت ده انتى كنتى سهرانه مع اللطخ ده فى العربيه الله كلها تشهد عليكى

وهنا الجامعه كلها بتتلم وتعرف ان لوجى اتسيح ليها وانها كانت مسطوله وبايته فى العربيه مع شادى والأخبار بنطير وتوصل لمكتب الدكتورة عفت ان فى بنت لتتخانق مع شادى وشلته

ولسه شطه بتكمل وصله الردح بتاعتها وتقول

وانت يا لطخ يا عرة الرجاله مش انت اللى عزمتني ، سايب المسعورة دى تعض فيا ليه ، استرجل يا واد وقولها انا اللى عزمتها ولا انت توتو وابن امك برضو

وهنا بتقرب امه وتسمع وتقول

انتى با بنت انتى عماله تهللى متعرفيش انك داخل أسوار حرم الجامعه والمكان ليه حرمه

شطه

تعالى يا دكتورة شوفى الشبح اللى انتى الصبح طرمختى عليه ودخلتيه الامتحان وعملتي ليا طابور ذنب ، عارفه الواد ده كان شارب حاجة اصفرا الصبح ونايم هو والبت المعضمه دى فى العربيه ، ودلوقتى قال ايه بتغير عليه منى ، دة انا ارجل منه ومن اللى خلفوه ، تلاقى عربيته دى امه اللى جايبها ليه

الدكتورة عفت بتبص لشطه من فوق لتحت وتقرب منها وتقول

اسمك ايه

اسمى شطه ااااا قصدى شرين ،

عفت

امممم على فكرة انا اسمى عفت وابقى ام اللطخ المسطول ده وانا اللى جايبه ليه العربيه

شطه وشها بيجيب الوان وترجع خطوه لورا وتقول

احسن ناس وانا اقول البيه بسم الله ماشاء الله على أدبه واخلاقه تسلم الايد اللى ربته ، وعلى فكرة هاخلى امى تدعيلك

عفت

انا عاوزة الأمن بسرعه يشيل الكائن ده ويدخلها مكتبى وبسرعه الأمن بيمسك شطه ويدخلها مكتب الدكتورة عفت ..

ويحدث في المكتب 😂😂ووووو

#شطة_نار الثالثة 🔥🔥قبل الاخيرة

تفاااااااعلووو وشجعوني ومتنسوش تعملوه لايك و20ملصق عشان انزل بالبارت الاخير 😱😱

الدكتورة رأفت كلمت الأمن اللى جه بسرعه وشالوا شطه ودخلتها مكتب الدكتورة رأفت

وفى المكتب واقفه شطه وهى ركبها بتخبط فى بعض وخايفه اوى وبتقول فى سرها

يالهوى يا اما ، يالهوى ، ياترى يا هل ترى هيعملوا فيكى ايه يا شطه يا غلبانه ، يا لهوى الوليه رأفت دى قادرة ومفتريه ونابها ازرق وانا زى الهبله اغلط فى ابنها ، يالهوى يا انا يا لهوى يا اما ، دى مش بعيد تعملى قرار فصل ، اه يا نى يا بركه دعاكى يا اما ، استرها يارب معانا ده احنا غلابه

وفجأه بتدخل عليها الدكتورة رأفت وتقول

امممممم قولتيلى بقى انتى اسمك شيرين، والشهره شطه وبتشغلى على عربيه فول وطعمية

شطه

ايوة يا دكتورة بس معلش يعنى مجرد تصحيح معلومه مش اكتر ، انا املك العربيه مش شغاله عليها ودى لامؤاخذه تفرق احنا ناس أصحاب مشاريع وعنينا مليانه مش شغالين عند حد

الدكتورة رأفت

هههه على فكرة ثقتك بنفسك عجبانى اوى ، ولعلمك انا بحب اوى الطعمية السخنه وهى طالعه من الزيت بس اوعى تقللى السمسم ازعل منك ، كل يوم بافطر بعشرة جنيه

شطه

يعنى ايه انتى مخليه الأمن يشدني قدام الجامعه كلها ومرمطه اللى خلفوني علشان تطلبى بعشرة جنيه طعميه

الدكتورة رأفت

اسكتى شويه يا بنت ، واقفلى بوقك اللى بيطلع زيت تحمير ده  ، انا جايباكى علشان عندى ليكى حته شغلانه زى الفل ، هتشتغلى مدرس خصوصي ومربيه وحارس شخصى

شطه

والله ، ومش عاوزة كمان ارد المطلقه واجلب الحبيب واحرر فلسطين ، فى ايه يا حجه هو انتى لاقيانى فى كيس شيبسي

رأفت

اخرسى يا بنت ، يا اما توافقى يا اما اعملك محضر تعدى على طالب فى الحرم الجامعى وافصلك حالا ، وعلى فكرة هاعمل محضر سرقه ب ١٥ الف جنيه كانوا فى درج مكتبى

شطه

هار ابيض انتى مفتريه صحيح ، ااااا قصدى تحت امرك يا دكتورة وعاوزانى ابقى مرضعه لمين بقى ان شاء الله

رأفت

أبنى ، ومش مرضعه يا متخلفه انا قولت مربيه وحارس شخصى ومدرس خصوصى

شطه بصوت واطى بتقول

تمام يا ست الكل انا اصلا حلم حياتى ابقى مدرسه وداده ، والحمد لله الحلم بيتحقق وامتى ان شاء الله هنشوف حماده علشان نبدأ اول حصه درس

رأفت

النهاردة بالليل تيجى وتعملى حسابك مواعيد شغلك من بعد الجامعه عل طول لحد الساعه ١٢ بالليل وتتأكدى انه نام وتقفلى عليه وتخلى السواق يرجعك بيتك كل ليله

شطه وعيونها بتطلع نار

خلاص تمام تحت امرك يا زوق بس معلش يعنى ممكن اعرف المرتب كام ولا هنشتغل بلقمتى لامؤاخذه

رأفت

ههههه مش قولتلك عجبانى، المرتب عشر تلاف جنيه فى الشهر ايه رايك كفايه ولا ازود

شطه

يالهوى عشر تلاف ليه هو انا هواديه في زي كده عموما باين الوليه دى هبله ولا ايه ،الحمد لله اهى احسن من نصبه الفول والطعميه ، يا بركه دعاكى يا اما

شطه فكرت ان الابن اللى هى هشتغل ليه مدرسه ومربيه وحارس شخصى يبقى عيل صغر وآخرة فى أولى ولا رابعه ابتدائى ومتعرفش المصيبه اللى فى انتظارها

وبالليل اخدت شطه العنوان وراحت على بيت الدكتورة عفت اللى رحبت بيها اوى وقعدت تديها تعليمات وتقولها

بصى يا شطه انا دلعته اوى ولازم يقف عند حده انا خلاص كبرت وعاوزاه يبقى راجل اتسند عليه ، اولا انا مش عاوزة راجل يبقى مرافق ليه لانى جربت كتير اوى كان بيطفشه او بيديهم رشوة ويخليهم يكدبوا عليا ، إنما انتى انا عارفه انك اصلا مش يهمك الفلوس وطبعا صاحبه مشاريع وعينك مليانه

شطه بتعدل هدومها وبكل غرور بتقول

طبها طبعا يا دكتورة، بس معقول عيل صغير لسه بيعملها على روحه يدى المدرسين رشوة ، ده انا هاخليه يلف حوالين نفسه ومش بعيد ينام يحلم بيا

وفجأه بيدخل شادى وبيقول

اهلا انسه شطه خير انتى جايه تعتذرى هنا ليا ولا ايه

عفت

شادى ، شطه مش جايه تعتذر ليك ولا حاجه دى جايه تشتغل مربيه ومدرسه ليك

شادى بغضب

نعم ، دى هتقولى أعمل ايه ما اعملش ايه ، دى كده الموضوع كبر اوى

شطه

استنى استنى يا زوق ، هى امك تقصدك انت ، بقى انا هابقى مربيه للشحط ده ، انا فكرت انك عندك عيل صغير وانا برضو اقول عشر تلاف جنيه ليه ، لا لا اا يا ريسه انا باقدم استقالتى

عفت

شطه ، استنى عندك قرار فصلك فى درج مكتبى ولازم تنفذى الاوامر

شطه بخوف

يلا يا وله انجر قدامى اتكفى على دروسك وتتعشى وتشرب اللبن وتغسل سنانك وإياك تعملها على نفسك زى كل ليله ظهرى اتقطم من تغيير الملايات

وهنا الدكتورة عفت بتضحك وعرفت ان شطه عرفت المطلوب منها

وتمر الايام وشطه بتمارس الشغل بحزافيره ، وبدأت تكتب كل تحركات شادى ، وتروح معاه فى كل مكان وكأنها ظله ، شطه كانت بتستاذن منه علشان تصلى الفرض اللى اذن وشادى طبعا ولا هنا

شطه

شادى الظهر اذن انت مش هتتوضى وتصلى ولا ايه

شادى

هااا طبعا طبعا هاتوضى واصلى بس روحى انتى وانا هاصلى بعدك بشويه

شطه

لا طبعا اتفضل صلى انا واخده بالى انك مش بتصلى اصلا

شادى بكسوف

لا خالص طيب حتى ان هاقوم أتوضى واصلى قبلك

وفعلا اتعود شادى انه يصلى الفرض فى وقته، واتعود كمان انه يقرأ فى المصحف ورد ولو انه صغير ، وده لانه بيشوف شطه بتعمل كدة فبيفتكر عليه

شطه بدات تذاكر محاضرتها وشادى معاها ويحاول انه يثبت ليها ولامه انه بقى كويس اما لوجى البنت الدلوعه صاحبه شادى فكل ليله ترن عليه وشادى يكدب على شطه ويقولها انه رايح يقابل صحابه ولكن الليله شطه شكت فيه وقررت انها تروح معاه

شطه لابسه لبس محتشم جدا وراحت معاه وللأسف كانت المقابله فى ملهى ليلى ولوجى عماله تغنى وترقص والكل عارف ان شطه صاحبه شادى مش المربيه بتاعته

لوجى اول ما شافتها قالت

ايه ده ، شادى انت ليه جايب البتاعه دى معاك ، مش كفايه قله ادبها فى الكليه، وايه الهدوم البيئه اللى انتى لابساها دى

شطه بتشمر كمها وتقول

انتى تانى يا عود القصب اقسم بالله لو مسكتيش وقفلتى بوقك ده لاخلى اللى ما يشترى يتفرج عليكى ، وأنت يا سى الاستاذ شادى اخلص قدامك نص ساعه ونروح

لوجى

نروح ، انتى كمان هتروحى معاه لا يا شادى ده كدة الموضوع كبير وانا لازم اعرفه

ومن هنا كلمه من شطه على كلمه من لوجى مسكوا خناقه فى بعض لرب السما والكل اتدخل يحوش لكن شطه ضربتها فى دماغها وعورتها ، واخيرا الخناقه خلصت ولوجى اخدها واحد صاحبها علشان يوديها المستشفى وطبعا شادى راح وراها علشان يخليها متعملش محضر

وفى المستشفى حد اتصل بوالد لوجى وهنا كانت المفاجاه

شادى

يخرب بيتك يا شطه انتى عارفه البنت اللى ضربتيها دى تبقى بنت مين ، دى ابوها سفير وبإذن الله هنبات كلنا فى القسم الليله

شطه

باقولك ايه يا شادى ، انا فى شغل والبنت دى بتدلع وتتمايص عليك وكمان بتتريق عليا وانا اللى يدوس على طرفى ادوس على رقبته ، وانا حالا هاتصل بأمك واعرفها اللى حصل

شادى

لا ارجوكى ابوس ايدك يااا ست الكل بلاش امى انا هاتصرف واعتذر لسياده السفير بنفسى

وبعد شويه بيدخل راجل طيب اوى وشكله موظف غلبان على اد حاله ويسأل شادى ويقول

لو سمحت يا ابنى مشوفتش بنت اسمها لوجى عامله حادثه

#شطة_نار 🔥

الاخيــــــرة 

لو سمحت يا ابنى مشوفتش بنت اسمها لوجى عامله حادثة

شادى

لوجى قصدك لوجى عبدالرحمن، 

مين حضرتك ؟ 

اكيد انت السواق باع سياده السفير صح ؟

الاب

سفير مين يا ابنى ، الله يخرب بيت الهباب اللى بتشربوه انا ابوها يا ابنى لو سمحت لو تعرف هى فين تقولى

شادى وشطه فى صدمه من كلام الراجل وكدب لوجي 

شادى

ابوها ازاى، لوجى بتقول ان ابوها سفير وامها وزيرة وبنت كلاس اوى

الاب

اه هى عملت عليكوا نفس الفيلم ، بنتى طول عمرها بتستعر منى وتحلم انها توقع واحد ابن زوات يحبها ويتجوزها زى الايام من غير ما يسأل عن اصلها وفصلها ودى اخرة الكدب حكم يا ابنى الكدب ملهوش رجلين

شطه

معلش يا عمى بنتك خايبه اوى بتستعر منك ومتعرفش ان فى غيرها بنات كتير اوى يتمنوا يكون عندهم اب زى حضرتك ولا حتى اقل المهم انه يكون لسه موجود فى الدنيا سند ليهم

شادى بيبص لشطه وبيعجبه اوى كلامها واعتزازها بنفسها

ويرجع شادى وشطه لشغلهم وحياتهم وفعلا الدكتورة عفت بتلاحظ ان شادى بدأ يتغير ويبعد عن الشله الوحشه اللى يعرفها وأهم حاجه ان لكل عرف حقيقه لوجى

وتمر الايام وتنجح شطه فى اخر سنه فى كليه الاداب وينجح شادى كمان وبدا يشتغل وخلاص شطه ادت مهمتها بنجاح ورجعت تانى تقف على عربيه الفل والطعميه

شادى

باقولك ايه يا شطه انتى برضة هتقفى تانى على عربيه الفول والطعميه ، ايه رايك تشتغلى معايا فى شركه بابا الله يرحمه وبمرتب كبير اوى كمان ، وكمان انا عاوزك تاجرى شقه بعيد عن الحارة وامك معاكى يعنى اظن ان ظروفك الماليه احسن من زمان

شطه

عارف يا شادى انا زى السمك اللى مينفعش يطلع من الميه ، وامى كمان زيى تمام لو سابت الحارة تموت من الوحده دى طول النهار تحكى مع الجيران ، وبعدين انا مهما كبرت وبقى معايا فلوس لا يمكن انسى انى صاحبه عربيه فول وطعمية ودى شغلانه ابويا وجدى

ومشيت شطه وفتحت بدال العربيه البسيطه مطعم كبير فى نفس الحاره وجددت شقتها وامها لسه بتدعى ليها انها تبقى دكتورة وتبيع قطن وشاش وكيناكومب وتعالج الركب والخشونه

وفى يوم شطه واقفه فى المطعم زى الصقر دخل عليها الواد صاموله الميكانيكى وقال

اهلا اهلا بالبلحه المقمعه خلاص يا حلوة سيبتى بيت ابن الذوات واداكى اجرتك

شطه وكل الزباين بتسمع الكلام وتقف من الصدمه وتقول

فى ايه يا صاموله مش فاهمه حاجه اجرة ايه وقصدك مين ابن الذوات

صاموله

قصدى الشاب اللى كنتى بتقعدى فى بيته طول النهار وداخله خارجه معاه ولا كأنه جوزك والآخر بعد سنه رجعتى ومعاكى فلوس ياما وفتحتى المطعم ده ، تقدرى تقوليلى الفلوس دى كلها قدام ايه اديته لإبن الذوات

شطه بتشمر كمها وتقول

أخرس خالص يا حيوان انا اشرف منك ومن اى حد يتطاول عليا بكلمه انا كنت باشتغل عند ابن الذوات ده وبرضو محدشي يقدر يجيب سيرته انما انت لازم تتربى

ونزلت شطه ضرب فى صاموله الميكانيكى وفجأه بيدخل عليها شادى والدكتورة عفت امه

الدكتورة عفت بتقول

شطه لو سمحتى ، انا اللى جايه اعرف الناس حقيقتك

انا ام الشاب ده وانا اللى طلبت من شطه تشغل معايا وأنا اللى اديتها الفلوس وشطه دى بنت من الزمن الجميل وللأسف مفيش منها كتير الايام دى

وبكده تكون الدكتورة عفت ردت كرامه وشرف شطه قدام كل الناس

اممممم وطبعا انتوا لسه قاعدين مستنيين تعرفوا يا ترى اتجوزته ولا لا

استنوا رايحين فين ...

النهارده انتوا معزومين على فرح شطه وشادى ولسه المطعم شغال والوضع على ما هو عليه وعقبال كل البنات 

لولاالاالاالالاالاي💃💃💃