رواية صرخة وجع الفصل الاول والثاني والثالث والرابع والاخير بقلم سيد احمد الشاذلي جميع الفصول كامله
 |
الجزء الاول
قصه_حقيقيه_من_واقع_مؤلم
نيره متجوزه وعندها ولدين
ليها اخ واحد من ابوها الله يرحمه اسمه مصطفى مرات ابوه هي اللي ربتيها وكانت نعم الام
فى يوم صحيت من النوم على رنه تليفون من مرات ابوها
مرات الاب /_عامله ايه يابنتى؟
نيره /_الحمدلله ياامى نحمد ربنا
مرات الاب /_ربنا يسعدك يابنتى
ساعتها نيره حست بانينها وتنهديتها سالتها
نيره /_فيه ايه مالك ياامى ؟
مرات الاب /_أنا عارفه انى مش امك بس يابنتى انا بعتبرك زي بنتى
نيره /_انتى امى ماتقوليش كده مالك فيكي ايه مصطفى مزعلك ؟
مرات الاب /_لا يابنتى كنت عايز منك تشوف لى اجراءت دار المسنين اواي حته اقعد فيها
نيره /_فيه ايه وليه تروحى دار المسنين واى حته ليه هو انا مت ولابنك مات
مرات الاب /_أنا اللى مت بالنسبه ليه يابنتى
نيره /_أنا هلبس وجايه لك
مرات الاب/_خليكى يابنتى بعيد مصطفى اخوكى مش طايق نفسه وشايط
نيره/_شايط على نفسه أنا هجى اطلع عينيه ده الا انتى
استاذنت جوزها وراحت
شافت دموع فى عين مرات ابوها كانت اول مره تشوفها فى حياتها كده
نيره /_فيه ايه ايه اللي حصل؟
مرات الاب /_اخوكى بيضربنى يابنتى وكل شويه بيزعق لى وزي مانتى شايفه حاطط لى طبقين وحلتين بعمل فيهم اكلى على الباجور الصغير ده
نيره /_ليه كده ؟
مرات الاب /_علشان بقيت حمل تقيل عليه يابنتى هو ومراته ربنا يريحنى بقى
نيره /_روقى بس وكل حاجه ليها حل هو فين هو ومراته
مرات الاب /_معرفش يابنتى ولاعرف عنهم حاجه
نيره اتصلت بمصطفى اخوها
مصطفى /_ايوه يانيره
نيره /_انت فين يامصطفي ؟
مصطفى /_أنا فى المصيف
نيره /_ومامتك فين؟
مصطفى /_فى البيت
نيره /_أنت ليه مزعلها ؟
مصطفى /_هي حكت لك متسالها الخرفانه دى عملت ايه فى حياتى انا كنت أنا ومراتى واقفين على الطلاق بسببها أنا قرفت وزهقت
نيره /_زهقت من ايه بالظبط من امك؟
مصطفى /_امى اللى منكده عليه حياتى
نيره/_واضح انك اتهبلت
مصطفى /_اتهبلت ليه علشان بحافظ على بيتى وعلى اولادى ؟ ومش عايز اخرب بيتى وادمر عيالى
نيره /_لا اتهبلت علشان بتتفسح انت والسنيوره مراتك وسايب امك مرميه وبتيجى عليها علشان واحده زي دى ممكن تبيعك فى لحظه
مصطفى /_اخرسى قطع لسانك دى عندى ستك وتاج راسك وبعدين مرميه فين دى زي القرد بسبع ارواح
نيره /_ستك انت مش ستى أنت لاخويا ولاعرفك
مصطفى /_يعني معرفتى بيكم عملت لى ايه؟
نيره /_ماعملتش حاجه يامصطفي يابن ابويا
مصطفى /_اللى عايزها ياخدها معاه انا زهقت فى حياتى كرهتنى فى عيشتى انا ومراتى ياما هرميها فى الشارع
نيره /_ترمى مين انت اتجننت ليه هي مش بلاهل علشان ترميها فى الشارع
مصطفى /_امال لو ماكانتش مرات ابوكى كنتى عملتى ايه؟
نيره /_اه مرات ابويا صحيح بس شوفت منها حنيه لانى عارفه قيمة الام علشان امى ماتت واتربيت على ايديها هي بالنسبةلى امى انت بقى مش هتعرف قيمتها إلا لما تبعد عنك اوتحصل اللى راحوا
مصطفى /_ياريت علشان ارتاح من قرفها وعيشتها
نيره /_أنا هاخدها وامشى يامصطفي
مصطفى /_فى كسحه الباب يفوت جمل
نيره /_اخس على الرجاله
نيره قفلت السكه وهي مش عارفه تعمل ايه فضلت محتاره
اخدتها معاها وراحت عندها الشقه
نيره اخدت مرات ابوها وشطفتها وغيرت ليها هدومها
وجهزت لها اوضة الاولاد
سالم جوزها رجع من شغله
سالم /_جهزى الاكل ياحبيبتي
نيره /_حاضر ياحبيبي عشر دقايق يكون جاهز
سالم دخل يغير هدومه
نيره دخلت وراءه
سألم /_فيه حاجه ياحبيبتي ؟
نيره /_أنا ياحبيبي جبت ماما تقعد معانا
سالم /_ماما مين مش ماما ميته؟
نيره /_مرات ابويا ياحبيبي
سالم /_ليه كده
نيره /_زعلانه هي ومصطفى شويه
سالم /_ماشى ياماما خلاص مافيش مشكله
نيره /_يعني مش هتزعل منى علشان عملت كده ؟
سالم /_لا مش هزعل ولا حاجه روحي حطى الاكل
نيره /_حاضر ياحبيبي
نيره حطت الاكل لسالم وللاولاد
واخدت الاكل ودخلت علشان تاكل مع مرات ابوها
سالم /_رايحه فين ؟
نيره /_هدخل اكل ماما وبعدين اخرج
سالم /_تعالى اقعدي اتغدى الاول وبعدين غديها
نيره /_مش هقدر ياحبيبي هغديها جوه وبعدين اخرج
سالم /_ماشى هاتيها تاكل معانا
نيره /_مش هينفع ياحبيبي بالف هنا وشفا كل انت والاولاد وأنا هاكل معاها جوه
سالم /_ماشى براحتك بس بعد كده ياريت تغديها الأول قبل مانتغدى علشان تقعدى معانا فهمتى
نيره /_ماشى ياحبيبي
ودخلت نيره وقعدت تاكل مع مرات ابوها جوه الاوضه وبعد ماخلصت اكل اديتها علاجها وطلعت بس ايه اللى حصل استنوا
#صرخة_وجع
الجزء الثاني
#قصه_حقيقيه_من_واقع_مؤلم
نيره اول يوم لمرات ابوها فى البيت سالم جوزها كان عادى جدا ومافيش حاجه واليوم التانى مر تمام ومافيش حاجه حصلت
تانى يوم مرات الاب العلاج بتاعها خلص
مرات الأب /_يابنتى انا معايا ٣٠ جنيه وعايزه اجيب العلاج
نيره /_خليهم معاكى ياامى وانا هجيبلك العلاج لما سالم يرجع
مرات الاب /_ليه يابنتى ماتحمليش جوزك حملى
نيره /_ماتقوليش كده ياامى تانى علشان خاطري
مرات الاب /_ربنا يحميكى ويحفظك ويسترك دنيا واخره
نيره /_ايوه الدعوه دي بكنوز الدنيا كلها
مرات الاب /_ربنا يجعلها من حدك ونصيبك
وطلعت نيره من الاوضه
ولما سالم رجع واتغدى
نيره /_معاك فلوس ياحبيبي
سألم /_عايزه فلوس ليه؟
نيره /_هجيب العلاج لماما
سالم /_أنا مامعيش غير ١٨٠ جنيه كل اللى معايا
نيره /_خلاص ياحبيبي خليهم معاك وانا هتصرف
سالم /_هتتصرفى منين
نيره /_سيبها لله وربنا هيدبرها
سالم /_أنا عايز اتكلم معاكي شويه
نيره /_خير فيه ايه؟
سالم /_انتى ليه مستحمله الست دي وابنها زهقان منها ورماها مافيش راجل هيرمى امه بالطريقة دى الا اذا كانت بتعمل مشاكل
نيره / مستحملاها علشان هي اللي ربتنى من صغرى
وحتى لوهي بتعمل مشاكل المفروض نستحملها فى كبر سنها
سالم /_انتى عارفه الدنيا بقت صعبه ياحبيبتي والقرش مابيجيش بالراحه ودى مش امك دى حايله مرات ابوكى
نيره /_يعني علشان مرات ابويا يبقى ارميها ؟
سالم /_ماقصدش كده ممكن نوديها دار رعايه علشان يخلوا بالهم منها دى لو امك كنت شلتها فى عينيه الاتنين
نيره /_لا ياسالم ماكنتش هتشيلها برضو كنت رميتها برضو بس انا مش هرميها ابدا ولوقفت على طلاقى
سالم /_يعني ايه ؟
نيره /_اللى سمعته ياسالم
نيره /_اخدت فوارغ العلاج معاها ونزلت راحت للصيدليه ودخلت للدكتور وحكت له الظروف ووعدته انها تسدده حاجه فى حاجه الدكتور اداها العلاج ورجعت شقتها
سالم /_جبتى فلوس العلاج منين؟
نيره /_جبته من الصيدليه وهبقى ادفعه حاجه فى حاجه ياسالم ربنا مابينساش حد
نيره دخلت الاوضه ادت لمرات ابوها العلاج وطلعت
سالم بيبص لها باستغراب قوى ايه الانسانه دى؟ فيه واحده تعمل اللى هي بتعمله ده وتشيل مرات ابوها؟
سالم /_عارفه يانيره
نيره /_عارفه ايه؟
سالم /_الست اللي جوه دى ابنها اولى بيها
نيره /_عارفه انه اولى بيها بس الابن اللى يرمى امه عمر ربنا مهايكسبه أبدا
سالم /_فعلاً بس انتى ايه ذنبك وذنبى نشيلها
نيره /_دى مش بلوى اومصيبه علشان تقول عليها شيله
سالم /_انتى عارفه ظروفنا
نيره /_عارفه ياسالم بس رزقها مش علينا دى رزقها على ربنا
سالم /_اتصرفى يانيره رجعيها لابنها
نيره /_ليه ماتعتبرهاش ضيفه عندك دانت لو جالك ضيف هتقدمله وتعمله الواجب
سالم /_الضيف هييجى ساعه ويمشى اما دى القعده هتتطول وانتى شايفه ظروفها الواحد بقى بيتقرف يدخل الاوضه عندها من الريحه
نيره /_هتصرف ياسالم
وخرجت نيره من الاوضه من جنب سالم وراحت تشوف مرات ابوها فى الاوضه التانيه
مرات الاب /_مالك يانيره فيكي ايه؟
نيره /_مافيش ياامى
مرات الاب /-دموعك على خدك بتقول غير كده يابنتى
نيره /_مافيش حاجه أنا هغير لك البامبرز علشان هدخل انام
وبعد مانيره غيرت لها خرجت قعدت في الصاله
وقالت يارب اعمل ايه دلنى يارب للخير يارب أنا بعمل الخير ماتقلبوش عليه بشر
دموعها نزلت من عنيها
سالم خرج وشاف دموعها
سالم /_بتعيطى ليه يانيره
نيره /_بطلب المساعده من ربنا هو احن والطف بعباده
من اي حد
سالم /_ونعم بالله طيب قومى ارتاحى
نيره /_ارتاح ازاي ياسالم وانت عايزنى اتصرف مرات ابويا عبىء عليك وأنا برضو لما أكبر هكون عبىء عليك
طلقنى ياسالم
صرخة وجع
الجزء الثالث
#قصه_حقيقيه_من_واقع_مؤلم
سالم بعد ماخرج لنيره وهي قاعده في الصاله ولقاها عماله تبكى وقالها ادخلى ارتاحى ونامى
نيره /&ارتاح ازاي ياسالم وانت عايزنى اتصرف فى مرات ابويا يبقى ارميها فى الشارع ولا وديها فين
سالم /_ده مش شغلى
نيره /_طلقنى ياسالم
سالم /&انتى بتقولي ايه ؟
نيره /_زي ماسمعت ياسالم طلقنى
سالم /_واضح انك اتجننتى فى عقلك
نيره /_ايوه اتجنننت قول زي ماتقول عنى بس مش هعيش معاك تانى
سالم /_اعقلى يامجنونه
نيره /_أنت لسه ماشفتش جنان
سالم /_ممكن اعرف السبب؟
نيره /_مجنونه بقى منتظر منها ايه طلقنى؟
سالم /_خليكى مرزيه هنا للصبح
نيره /_لا مش هيطلع عليه صبح وانا على زمتك
سالم مسك ايد نيره علشان خاطري اهدى شويه مش هينفع كده
نيره /_امال ايه اللى هينفع انى ارمى الست اللى جوه دى علشان خاطرك
سالم /_مش هنرميها ياحبيبتي اهدى تقعد على راسى
خلاص ماتعمليش فى نفسك كده
باب الاوضه اتفتح ومرات ابونيره طلعت من الاوضه
نيره اول ماشافتها مسحت دموعها وراحت جري عليها مسكت ايديها وقالت لها ايه اللي صحاكى من السرير ياامى ؟
مرات الاب /_أنا همشى يابنتى مش هفرح إن بيتك يتخرب بسببى انتى مالكيش ذنب انك تشلينى انتى وجوزك كفايه عليكم همكم
نيره /_انتى على راسى والله تعالى ادخلك على سريرك
مرات الاب /_عايزه اقولك على حاجه ياسالم أنا مش زعلانه منك لان ابنى اللى شيلته فى بطنى رمانى وانت مالكش ذنب يابنى تشيل بلوى زيي
سالم دير وشه الناحيه التانيه وماتكلمش
نيره دخلت مرات الاب على سريرها وغطتها وخرجت دخلت مع سالم الاوضه
نيره /_عارف ياسالم أنا كنت متاكده انك هتعمل كده بس ماتوقعتش انك تكسر بخاطري وبخاطر ست ربتنى وشالتنى وانا صغيره واخدتنى فى حضنها ولما كبرت عايزنى ارميها
سالم /_حقك عليا انا عارف انك بنت اصول وتمرت فيكى تربيتها ليكى خلاص بقى أنا علشان خاطرك هستحمل اي حاجه
ونام سالم ونيره
مرات الاب الساعه ٦ الصبح فتحت باب الشقه وخرجت وفضلت ماشيه في الشارع
نيره قامت الصبح الساعه ٧ علشان تلبس اولادها ودخلت تطمن على مرات ابوها فى الاوضه مالقتهاش نايمه على سريرها
نيره دخلت صحت سالم
نيره/_ الحقنى ياسالم مرات ابويا مش فى الاوضه
سالم /_يعني ايه ؟
نيره /_اخدت كيس علاجها وشكلها مشيت عاجبك كده أنا اعمل ايه دلوقتي مش عارفه؟
سالم /_اتصلى باخوكى وعرفيه
نيره مسكت تليفونها واتصلت ب مصطفى
نيره /_ماما جات عندك يامصطفي
مصطفى/_لا ماجاتش عندي
نيره /_ماما خرجت يامصطفي وماعرفش طريقها ماعرفش راحت فين ؟
مصطفى /_دلوقتي ترجع
نيره /_أنا غلطانه انى بكلمك اصلا
مصطفى /_وانا اعملك ايه يعني اكيد طفشت منك زي ماطفشت مراتى كويس انها ماخلتكيش تطفشى من جوزك
نيره قفلت السكه في وش مصطفى ولبست هدومها ونزلت تدور عليها
فضلت تلف وتدور واخر مازهقت راحت القسم مع سالم جوزها يبلغوا عن غيابها
ورجعت نيره بعد ماتعبت من اللف وبقت مش عارفه تعمل ايه
المغرب اتصلت ب مصطفى
نيره /&يامصطفي ماما مش لاقياها دورت فى كل مكان ممكن تكون راحت فيه
مصطفى /_أنا هنزل اسأل عنها
نيره /_بالله عليك شوف هتعمل ايه وطمنى
مصطفى /_حاضر
ياترى مصطفى هيدور على امه والام راحت فين
صرخة وجع
الجزء الأخير
#قصه_حقيقيه_من_واقع_مؤلم
نيره بعد ماتصلت ب مصطفى علشان يدور على امه
نزل راح عند الجيران وفضل يسال ويتسال عليها وبرضوا مافيش حد يعرف عنها حاجه
فضل يلف واخر مازهق رجع
اتصل ب نيره وبلغها انه مش لاقيها
نيره /_هنروح ندور فى المستفيات فى اي حته لحد مانلاقيها
الدنيا اتقلبت والكل فضل يدور على ام مصطفى بس مافيش فايده مش لاقيينها
نيره اخدت جوزها وراحوا الصبح دار المسنين تسأل عليها جايز حد يكون لقاها ووداها هناك
بس رجعت نيره ومافيش جديد
وعدى يوم ومافيش اي حاجه ولا لقيين ام مصطفى
نيره انهارت وتعبت قوى
تانى يوم الضهر كان فيه جنازه هتندفن فى المقابر
حارس المقابر والدفان ماشيين رايحين يجهزوا القبر
شافوا ام مصطفى نايمه على ضهرها ومسطحه ومافيش نفس
حارس المقابر بلغ والشرطه جات
والشرطه استدعت لطب الشرعى علشان يعرفوا سبب الوفاه
نيره عرفت إن مرات ابوها ماتت فضلت تضرب فى صدر جوزها وتقوله انت السبب
وصرخت صرخة وجع هزت ارجاء المكان كله
راح سالم ونيره ومصطفى علشان يستلموا الجثه من المشرحه
بالكشف المبدءى على ام مصطفى
هبوط مفاجىء فى الدوره الدمويه ادى الى الوفاه
وبعد ماتم استلام الجثه وتقنين الاجراءت والدفن
وعندما اقتربت الجثه من المقابر
ظل مصطفى يبكى كالمراءه ويطلب السماح من والدته ولكن كيف ينال السماح وقد فارقت الام الحياه وذهبت الى مثواها الاخير
وقبل ان يغلقوا عليها قبرها
سالم والناس الحاضرين سممعوا صراخ ياتى من بين النساء فذهب سالم ليحاول اسكاتهم ولكن الصدمه
كانت مؤلمه
يجد نيره زوجته ساقطه على الارض
اعتقد سالم انها حالة اغماء وحاول هو والحاضرين افاقتها ولكن نيره قد فارقت الحياه امام المقابر
وتم عمل الإجراءات اللازمه
وحدثت مشكله بين سالم ومصطفى بسبب دفن جثة نيره سالم كان مصر على ان تدفن زوجته فى قبر عائلته
ومصطفى يريد دفن جثة نيره فى قبر والدها وبجوار امه
وتدخل الرجال وقاموا بحل المشكله ودفنت نيره بجوار والدها وزوجة ابيها
والدة مصطفى وجدت ان الاموات احن عليها من الاحياء فذهبت اليهم لتحتمى بيهم من شرور الاحياء وقسوتهم
نيره التحقت بزوجة والدها ودفنت معها فى نفس القبر
اللهم ارحمها وارحمنا واجعلنا نلحق بمن نحب فى جنات الخلود
انتهت القصه
القصه على لسان شخصية سالم الحقيقيه وحدثت فى احدى القرى
هناك من امثال مصطفى الكثيرون يفضلون زوجاتهم على امهاتهم واحيانا يصل بهم الحال الى ضرب الام وطردها واحيانا يضعون فى دور المسنين
اتقوا الله فى انفسكم وفى امهاتكم
قال تعالى
بسم الله الرحمن الرحيم
{وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيماً* وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِى صَغِيراً* رَّبُّكُمْ أَعْلَمُ بِمَا فِي نُفُوسِكُمْ إِن تَكُونُواْ صَالِحِينَ فَإِنَّهُ كَانَ لِلأوَّابِينَ غَفُوراً
صدق الله العظيم
خلف كل باب مغلق قصه وكل قصه بها موعظه
والهدف من نشر قصص الواقع لنتعظ جميعا قبل فوات الاوان
تحياتى لكم جميعا
إللي عاوز يوصله اشعار بتكملة الروايه يعمل إنضمام من هنا