ست الدار الحلقه التالته والرابعه والخامسة بقلم أميره أسامه

ست الدار

الحلقه التالته والرابعه والخامسة 

بقلم أميره أسامه 

 الحلقة 3 

رواية ست الدار الحلقة الثالثة

وهبه…ندخلوا في الموضوع اللي چاين عشانه

عتمان..خير يا وهبه بيه

وهبه…خير أن شاء الله تتحدت أنت يا موسي ولا أتحدت اني

موسي…في وچود الكبير مهينفعش حد غيره يتحدت

أبتسم وهبه لموسي بفخر وكمل كلامه

وهبه….شوف يا عتمان أحنا چاين أنهارده عشان نطلب منك يد عطر بتك

بص كل من هيبه وحمدان لبعض وبص بدر لموسي بأستغراب

اما عتمان فا ابتسم بفرحه

عتمان…ده شرف كبير يا وهبه بيه أننا نناسبك بس متأخذنيش في السؤال تطلبها لمين

وهبه..نطلبها لموسي ولدي

عتمان…ده شرف لينا لما موسي بيه يناسب الهواره

موسي…تسلم يا حاچ عتمان

وهبه…يعني نجول مبروك

عتمان….اني عن نفسي موافج علي خيره الله

حمدان…لعتمان لحظه بس يا كبيرنا وكأنه يقصد يردها لموسي اكيد يعني نسب الشرفا يشرفنا ونسب موسي من اختي عطر يشرفني بس مش ناخد رأي العروسه الول يمكن ترفض

حل الصمت علي الجميع و بصوا لحمدان بدهشه خصوصا بدر وعتمان

وهيبه اللي توقع اخوه يوافق بسرعه عشان مصلحتهم

أما موسي..فكان هادي وباصصله ومبتسم ولا كأن في حاجه أتقالت لانه مطمن من موافقه عطر وكان متوقع رفض حمدان من الاساس لكن لو القصه هتخلص علي سؤال عطر فا عادي هو مطمن من ردها.

عتمان…هتجول ايه بس يا حمدان كيف يعني ناخد رأي عطر

حمدان…بأبتسامه اني ماهجولش حاچه عفشه يا ابوي ولا أيه يا موسي بيه انت متعلم وفاهم وعارف ان ده أمر طبيعي أننا نسأل العروسه مش دي بردو طريجه المتعلمين المتحضره

موسي…بأبتسامه هاديه وصوت ثابت عداك العيب يا حمدان ده چواز مش لعبه أسألها واني هستني ردك تبلغني بيه

هيبه…وه بنات ايه اللي ناخد رأيها وعلام أيه يا حمدان اللي نمشوا وراه البت تمشي كلامها علي الرچاله ولا ايه

سالم….وايه المشكله يا هيبه فالاول والاخر دي حياتها لازم يكون ليها رأي في شريك حياتها وبعدين يا هيبه الموضوع ملهوش علاقه بالتعليم اللي مضايجك علي طول ده وحوار ان البت توافج غصب عنيها علي العريس دي بجت موضه جديمه ولا ايه

 

بصله هيبه…بأبتسامه صفرا وحس ان سالم قاصد يضايقه بحوار التعليم

ابتسم موسي لسالم

موسي…اهو الدكتور جالك بجت موضه جديمه عموما خدوا رأي العروسه واني هستني ردكم

عتمان…ان شاء الله يا موسي بيه

وهبه…ماشي كيف ما جال موسي هنستني الرد وهنستأذن أحنا

عتمان….لاه والله ما يحصول لازمآ نتسحروا سوا

وهبه..لسه كتير علي معاد السحور يا عتمان وبعدين الچايات أكتر من الرايحات وايوه صحيح متنسوش الفطار يوم الخميس زي أنهارده هنتچمع كلنا مع اهل البلد كل سنه وانتوا طيبين

عتمان…وانت طيب يا وهبه بيه ربنا ما يجطعلك عاده

وهبه….اللهم امين

خرجوا معاهم عشان يوصلوهم

موسي…لبدر هتفضل مصدوم كتير إكده

بدر…مجولتليش ليه

موسي…مانا جولتلك اهه

بدر…لا والله؟؟ اني كنت جاعد كيف الأطرش في الزفه صاحبي چاي يطلب يد اختي واني معرفش طب كيف وميته وليه؟

موسي….كنت هجولك بس حبيت أچي أطلبها رسمي علي طول عشان دماغك متچيبش وتودي

بدر….عيب عليك يا صاحبي اني خابرك زين وعارف مين هو موسي بس بصراحه اني مستغرب

موسي…ومستغرب ليه عاد

بدر….مستغرب طلبك يا صاحبي كيف يعني تطلب يد عطر اخر حاچه أتوجعها انك تناسب الهواره واني وانت خابرين انك ماهتحبش حد فيهم غيري

موسي…عصرت علي نفسي لمونه خليها عليا

ابتسم بدر وضربه بخفه علي دراعه

ابتسم موسي بحب ياريت الهواره كلهم كيفك يا صاحبي بس خساره انت چيت غلط نسخه واحده مبتتكررش المهم انت ايه رأيك

بدر…بتسألني عن رأيي يا صاحبي ده اني طاير من الفرحه صاحبي وصاحب عمري هيناسبني

موسي….كنت خايف تضايج

بدر…واضايج ليه بس اني يمكن استغربت لكن فرحت والله

موسي…عايز أشوفك عشان اجولك علي حاچه

بدر…واني كمان عايزك يا موسي.

موسي…خلاص هستناك بكره تعدي عليا في الارض نتكلموا شويه

بدر…ان شاء الله هصلي الضهر واچي اجعد معاك

موسي…أن شاء الله

سلموا علي بعض ومشي موسي واهله.

عتمان….بص لحمدان ايه اللي هببته ده يا حمدان أزاي تعترض وتجول لما ناخد رأي عطر من ميته والبنته بيتاخد رأيهم

هيبه…صوح يا حمدان اني جولت انك هتطير من الفرحه ان موسي وابوه هيچو علي حچرنا خلاص بس فهمت انك عايز تلاعبه

حمدان…بغضب لاه مهالعبوش يا هيبه بس مكانش ينفع نوافج من الاساس و أعملوا حسابكم مفيش چواز

عتمان…كيف يعني مفيش چواز اتچننت اياك ولا ايه انت ناسي ان موصلحتنا مع موسي

بدر….وموسي ايه يعيبه يا حمدان بيه عشان متوافجش عليه

بصله حمدان بغضب وقرب من وشه.

أنت بالخصوص معايزش اسمع صوتك عايز تعرف موسي يعيبه ايه يا سيد الرچاله عايز تعرف صاحبك مرفوض ليه اني هجولك

سحب حمدان الجلباب بتاعه بغضب وراح بأتجاه القصر بكل غضب وهو بينادي بعلو صوته.اللي زلزل القصر كله

حمدان….عطرررررررر😡

يا عطررررررر.

دخلوا كلهم وراه بسرعه

وجت والدته علي صوته هي وسهير

بخيته…ايه يا ولدي بتزعيج ليه إكده

حمدان…ياعطررررررر😡

سمعت عطر صوت حمدان اتفزعت من صوته

عطر..ده حمدان اخويا

هنيه…خير يارب صوته عالي ليه إكده

هاچر…تعالوا ننزل نشوف

عطر…استر يارب

نزلت عطر هي وهاجر وهنيه

هيبه…فهمنا بس في ايه عاد يا حمدان مالك شايط ليه

حمدان.. وهو شايف عطر بتنزل علي السلالم اهي چات اللي هتفهمنا كلنا

عتمان…ياولدي في ايه

 

نزلت عطر وقفت ادام حمدان بأبتسامه لكن من جواها حاسه بخوف من نظره الشر وصوته العالي.

عطر….خير يا خوي

وفجأه نزل علي وشها قلم من شدته وقعت عطر بين دراعات هنيه وهاجر اللي واقفين وراها عالسلم وصوت القلم رج القصر كله.

صرخت عطر وجري عليه بدر وعتمان

عتمان….انت أتچنيت ياحمدان

بدر….بتمد يدك عليها ليه يا حمدان حوصل ايه

بخيته…عملتي ايه يابت

عطر…بدموع معملتش حاچه يا اما والله اني كنت في أوضتي.

راح عليها حمدان مسكها من شعرها صرخت عطر في ايده

حمدان….جاعده في أوضتك وبتستغفلينا صوح

مسك بدر أيده عشان يبعدها عن حمدان.

بدر….سيبها ياحمدان نزل يدك من عليها

حمدان….اني جولتلك بره انك تخرس يا سيد الرچاله وتسمع من اختك المصون اللي عايز تعرفه

هيبه….عملت ايه البت دي يا حمدان.

حمدان…تعرفي موسي من ميته؟؟

عطر…بصاله ودموعها نازله تجري علي خدها ورعب الدنيا كله دابب في قلبها

حمدان…انطجيييييييي

بدر…انت اتخبلت اياك ولا ايه يعني هو عشان موسي چه وطلب يدها تبجي تعرفه

عتمان….انت أتچنيت ياحمدان كيف تجول إكده علي أختك

حمدان…اهي جدامكم أسألوها يمكن اني ظالمها

هيبه…انطجي يابت في ايه

عطر…ماعرفش يا خوي حمدان بيتكلم علي ايه

ضربها حمدان بعنف قلم تاني نزل دم من شفايفها

حمدان…يعني مجابلتيش موسي ولد وهبه في ارض الاشراف يا رخيصه

اتصدم الكل إلا سهير اللي أبتسمت أبتسامه خبيثه

عتمان….كلام ايه ده ياواد انت اتخبلت كيف تجول إكده علي بنت عتمان الهواري

بخيته…جطع لسان اللي يجول علي بتي كلمه عفشه كدب كدب بتي ما تعملش إكده واصل

حمدان…عملت يا اما وحطت راسنا كلنا في الطين

راح عليها هيبه بغضب مسكها هو كمان من شعرها صرخت بألم

هيبه…انطجي لا أجتلك واتاويكي الوجت صوح الحديت اللي حمدان بيجوله جابلتي موسي في ارضه

فضلت عطر ساكته دموعها نازله وبتترعش بخوف في أيدهم وساكته مش عارفه تقول ايه.

هيبه…انطجيييييي

حمدان…تنطج تجول ايه ماالچواب باين من عنوانه الفاچره حطت راسنا كلتنا في الطين بص حمدان لبدر ايه ساكت يعني ماسمعتش صوتك اختك المصون حطت راسك في الارض يا دكر صاحب عمرك أستحل حرمت بيتك يا سيد الرچاله مستغفلك يا مغفل مش هو ده موسي اللي بتوجف جدامنا عشان خاطره اهو موسي لايف علي أختك من وراك

بدر…موسي ما هيعملش إكده اكيد في حاچه غلط

حمدان…لساك بتدافع عنيه

بدر …چبت منين الحديت ده يا حمدان.

حمدان…مليكش صالح چبته منين أختك اهي ساكته ومهدافعش عن روحها

بدر….انطجي ياعطر الحديت ده صوح

عتمان…..اتكلمي يا عطر

عطر…بدموع ابوس يدك ياابوي ارحمني من يدهم

بخيبته…بتجابلي ولد وهبه من ورانا يابت بتحطي راس اخواتك وراس ابوكي في الطين

هيبه…بجي انتي تعملي فينا إكده يا فاچره فضل هيبه يضرب فيها بكل عنف هو وحمدان وهي تصرخ جري بدر وعتمان يحوشوها من ايدهم وهنيه تشد فيها هي وهاجر لكن غضب حمدان وهيبه كان اقوي

عطر…ابوس يدك يا ابوي ارحمني منهم بدر الحجني يابدر.

بخيته….يافاچره يا خاطيه كنتي بترفضي تتچوزي عشان خاطر ولد وهبه أستغفلتينا كلنا وعايشه دور الملاك وانتي بتلفي علي حل شعرك مع موسي.

عطر….والله يااما ماحوصل حاچه بيناتنا

مسك حمدان موبايلها اللي واقع عالارض فتحه وفضل يقلب فيه شاف رقمه ولقاها متصله بيه قبل ما يجي بشويه

حمدان….بأبتسامه غضب بص لبدر وحط الموبايل في وشه لاه وبيتكلم مع اختك كمان هو ده صاحبك يا سبع الرچال

مسكها هيبه من شعرها يجرها.

هيبه…جابلتيه ليه أنطجي هجتلك

عطر….بنفس مقطوع صدجني يا هيبه جابلته عشان أخليه يسيب ارض سعد عشان خوفت عليكم

هيبه…خوفتي علينا ولا عليه يا فاچره

بدر….بحزن سيبها يا هيبه

هيبه….بعد من جدامي لا أجتلك انت بالذات

طلع هيبه مسدسه وحطه في وش عطر صرخت هنيه وهاجر وجري بدر عليه

هيبه…بعد لا اطخك بدالها لازم اغسل عارنا بيدي

عطر…ابوس يدك يا ابوي ماتسيبهوش يموتني

عتمان….حس بتعب مسك الكرسي بأيده سيبها يا هيبه

اعدت بخيته وحاطت ايدها علي راسها

وفجأه وقع وهبه وسطهم صرخت عطر اول ما شافته وقع وجري عليه بدر وحمدان

عطر….ابووووووي

 

بخيته…عتمان الحجوا أبوكم يا هيبه ألحج يا حمدان ابوك

هيبه…ابوي ابوي رد عليا اتصل بالاسعاف ياحمداااان.

عدي وقت بسيط وبسرعه وصل حمدان وهيبه وبدر وبخيته المستشفي وخدوا منهم وهبه علي اوضه الكشف.

وفضلوا واقفين قلقانين وهيبه رايح جاي بغضب

هيبه..وديني لا هروح أجتله

مسكه حمدان من ايده بعنف وجف عنديك

هيبه….اوجف ليه بعد كل اللي حوصل ده وبتجولي وجف اني لازم اشرب من دمه هو سبب كل اللي أحنا فيه ده

حمدان…بلا حديت ماسخ افهم موسي مش لازم يعرف اللي حوصل واني هعرف أردهاله كيف.

هيبه…ملهاش رد غير الجتل يا حمدان

حمدان….لاه لو عالجتل هيحصول هيحصول بس مش من ناحيه عطر.أنت عايزه يعرف اننا عرفنا انه ماشي مع اختك ويكسر عنينا يا هيبه

هيبه….امال انت عايزني اعمل ايه عاد أسكت وأوطي راسي كيف الحريم

حمدان…لاه هنردها لموسي وهنچوز أختك وهنجوله أن عطر مش موافجه عليه ويبجي يوريني هيجول ايه عشان واضح انه كان مالي يده من رد أختك وجاعد مبتسم عايز اشوف الصدمه في عينه عايز أجهره واني بجوله ان عطر رفضاه ولو راچل صوح يجول اني بكدب وان اختي بتحبه وموافجه عليه

بخيته….ولد چليله لعبها صوح لف علي عطر عشان يكسر عينا أجطع يدي أن مكانتش هي اللي وزاه علينا

هيبه…ماعاش ولا كان اللي يكسر عينا يا اما وشرفي لاأچيبلك چثته تحت رچلك وبص لبدر ويبجي حد يعترض تاني عشان يحصله

بدر….بلا مساخه وتلميحات عفشه كيف وشك أنت فأيه ولا فأيه ابوك چوه معارفينش أيه اللي صابه

هيبه…ماهو كله من تحت راس صاحبك وشرفي لا هجتله

حمدان….خلاص عاد مش وجته الحديت ده إهنه الخلج راحه چايه المهم الوجت اكيد خبر تعب أبوي هيتعرف ومش بعيد وهبه وولاده نلاجيهم إهنه فوج راسنا ما عيزش حاچه تبان جدامهم وانت يا هيبه امسك اعصابك واللي عايزينه هيحصول نطمن بس علي ابوك وبعدين هشيع لموسي وأبلغه برفض عطر

ودي هتبجي أول ضربه ورد منينا

هيبه…ماشي يا حمدان

خرج الدكتور بعد شويه

حمدان…خير يا دكتور

الدكتور….خير ان شاء الله هنعمله شويه إشاعات ونطمنكم

حمدان…أشاعات ليه يا دكتور ابوي ماله

الدكتور…للاسف احنا شاكين ان عنده چلطه في المخ

بخيته…ضربت علي صدرها يا مري

هيبه…چلطه كيف يا دكتور

الدكتور…الضغط بتاعه عالي چدا وتجريبا ارتفاع الضغط أتسبب في چلطه هنعمل الاشاعات اللازمه وهطمنكم علي طول بعد أذنكم

بخيته…يامري چلطه يا عتمان ابوك چاتله چلطه يا حمدان

حمدان…اهدي يا اما ان شاء الله مش هيحصول حاچه

هيبه…كله من تحت راس موسي

حمدان…حسابك تجل معايا يا ولد الشرفا.😡

في قصر عتمان.

هنيه….عطر عطر يا خيتي. سمعاني طمنيني عليكي يا عطر

هاجر…وهي بتخبط عطر انتي كويسه ردي علينا ياعطر

هنيه…البت ماهتردش وجاطعه النفس خالص يا هاچر

هاچر….هنعملموا ايه عاد حمدان جفل عليها بالمفتاح

ومهنعرفش ندخلوا نطمنوا عليها

هنيه…ماعرفش بس لازم نطمنوا عليها اني بفكر اجول لموسي

هاچر…انتي أتچنيتي أياك موسي ايه اللي تجوليله عايزه هيبه يجتلك أكيد هيعرف ان حد فينا اللي بلغه خصوصا انه خد تلافون عطر

هنيه…يعني نجعد نتفرچ علي البت وهي بتموت أكده

هاچر…لا طبعا بعد الشر عنيها بس الوجت يرچعوا واكيد بدر هيفتحلها

جت سهير في الوقت ده بتعملوا ايه عنديكم

هاچر….عطر جاطعه النفس خالص وبنادم عليها ما هتردش

سهير…وهترد تجول ايه عاد

لا هي ليها عين بعد العامله المهببه اللي عملتها😏

هنيه…عيب يا سهير الحديت ده عطر اشرف من الشرف وجطع لسان اللي يتكلم عليها

سهير….ادعي أنتي بس يا هنيه ينجطع لسان اللي هيتكلم عليها جبل ما تچرسنا وسط الخلايج عاد وتوسخ أسمنا

هنيه…عيب الحديت ده يا سهير دي عطر بردك.. وانتي عارفه انها زينه وست البنات

سهير…كانت ست البنات جبل ما تچيبلنا العار مفهماش كيف واجفه تدافعي عنيها بعد عملتها الشينه دي بكره كل الخلايج تلسن علينا والعار يصيبنا ويصيب رچالتنا وعيالنا بس هجول ايه ما انتي لو عندك عيال كنتي خوفتي علي سمعتهم وأسمهم😏

بصت هاجر لهنيه بحزن ورجعت بصت لسهير بغضب ايه اللي بتجوليه ده عاد ما يصحش اكده يا سهير

هنيه…سبيها يا هاچر تجول اللي يلد عليها عموما اني مهردش عليكي

سهير…لا تردي ولا مترديش اني سيبالكم الموطرح وماشيه بس اعملي حسابك انتي وهي محدش فيكم يجرب من الباب او يحاول يفتحلها عشان هيبه وحمدان لو عرفوا أنكم دخلتولها ماهيسكتوش

سابتهم سهير ومشيت وهي بتغني.

هاچر…بغيظ اني عارفه چنسها أيه دي متزعليش يا خيتي انتي خابره سهير عاد

هنيه….خابره يا هاچر واطمني مابجيتش أزعل خلاص ربنا يعينها علي سواد جلبها.

………..

 

في قصر وهبه.

چليله…ومن ميته يعني حمدان بيسأل عطر عن رأيها

مهران…يا اما حمدان حابب يساوي راسه براس موسي ورايد يعمل منظر وخلاص ما انتي خابره حركات حمدان يومين وهتلاجيه باعت موافجتهم

وهبه….صوح اني حسيت إكده بس عادي سيبه يشوف حاله مره من نفسه

چليله….والله مهما عمل ولا عمره يساوي راسه براس سيد الناس ابدا

وهبه…بضحك اهي جلبت علي الفيلم الرومانسي عاچبكم إكده

موسي…بضحك بلاش يا چليله جولنا نخفف العيار حبتين عشان ابوي بيغير

چليله…بضحك اديني سكت أهه.

سالم…بس شوفت هيبه مكانش طايجني كيف

موسي…بضحك وهو من ميته بيطيجك يا دكتور بس انت عچبتني في ردك عليه حسيت انه عايز يجوم يجتلك بس مش عارف

سالم…نفس احساسي من ناحيه حمدان وانت جاعد تتحدت انت وبدر كان شايط

چليله…بعد الشر عنيه وعنك يارب. ربنا يبعد شرهم عنيكم

وهبه…يارب يلا اني طالع أريح فوج شويه تعالي يا چليله

چليله….من عنيا ياكبير

موسي…بمشاكسه علي فين يا ابوي واخد چليله مني ليه

وهبه….وه چليله دي بتاعتي اني وبس ياواد ومليكش صالح بيها

أتحرجت جليله وابتسمت

موسي….لاه چليله دي بتاعتي اني وبس تخصني لحالي بس يلا هسيبهالك مره من نفسك

وهبه….شكرا لكرمك يا أبن الاصول بص علي چليله أضحكي براحتك ماهو حديت حبيب الجلب لادد علي جلبك

چليله..وه مجاديرش عليه هتجدر عليا اني عاد

موسي…بضحك متخافيش يا چليله اني في ضهرك

وهبه…كمااان موسي أفندي بجي حامي الحما يلا جدامي ياست چليله ومتخافش يا موسي بيه علي ست الدار في عنيا

ابتسم موسي وضحك اخواته علي مشاكسه وهبه وموسي اللي ما بتخلصش بسبب چليله.

مهران…بضحك خف علي ابوك يا موسي ده مش حملك

سالم….والله اني باچي البلد عشان اشوف المشاكسه بتاعت ابوك وموسي ديه.

موسي….بجول ايه اني رايح اشوف الواد هريدي ملهوش حس

مهران…تلاجيه بيدج علي الربابه هو فالح في حاچه غير إكده

موسي…بضحك علي جولتك

خرج موسي يدور علي هريدي وكالعاده لقاه في الخلوه الخاصه بموسي بيعزف علي الربابه وقف موسي علي الشباك ربع ايده

موسي…ماهتحرمش ياواكل ناسك مش جولتلك متعتبش الخلوه بتاعتي

هريدي..بفزع وانت ماهتحرمش تفزعني إكده مش جولتلك اتعلم تكح ولا تتنحنح😒

موسي..بتريقه معلهش يا هريدي بيه ما هو مش بعد ما شاب ودوه الكتاب لف موسي ودخل اعد علي الكنبه بتاعته.

هريدي….طمني عملت ايه

حكاله موسي اللي حصل

هريدي…ومن ميته حمدان بيستأذن حد

موسي….يا سيدي خليه يشوف حاله يومين من نفسه يومين وهيجول موافجين

هريدي….بتفكير لاه الحكايه دي متطمنش حاسس ان ورا الحديت ده حكايه

موسي…ولا حكايه ولا هباب انت هتعمل حالك فاهم من ميته وانت بتفهم من الاساس

هريدي….طيب بكره تجول هريدي جالها وتبطل تتمجلس عليا

موسي….ماشي يا اخوي اما نشوف

هريدي….عموما ان شاء الله ربنا يخيب ظني ومبروك مجدما عشان متجولش هريدي مباركليش 😏

موسي…ياواد اعدل وشك ده وعموما يا سيدي الله يبارك فيك عجبالك ياواد مناويش تتچوز انت كمان وتريحنا من خلجتك

أبتسم هريدي بحزن ودي مين دي اللي ترضي بيا

موسي..بجديه ليه ياواد وانت ناجصك ايد ولا رچل

هريدي….لاه من ناحيه ناجصني فا ناجصني كتير ناجصني اهل وعزوه ومال وعلم حتي الچمال ناجصني

موسي…ماتجولش إكده الراچل مش بشكله وبعدين انت مش عفش ولو عالاهل والعزوه احنا مش اهلك ولا ايه ياواد

هريدي..طبعا اهلي والله انتوا عندي غاليين اني عشت معاكم اكتر من اهلي بس الناس ماهتفهمش ده وهيخافوا علي بناتهم مني

موسي…ياواد ما تجولش إكده كفايه انك تكون واحد من حبايب موسي ولا ايه

هريدي…طبعا كفايه

موسي…ماعيزش أسمع الحديت الخايب ده تاني انت تشرف اي حد ولو علي المال انت بتشتغل معايا وبتكسب يعني انت عايش بفلوسك

هريدي….يعني لو انت عنديك بنت ترضي تچوزهالي او يعني لو اني عريس متجدم لست فرحه هتوافج عليا

موسي…ومهاوفجش عليك ليه الراچل لا بأهله ولا بچماله يا هريدي الراچل بأصله وانت اصلك طيب واهلك الله يرحمهم كانوا ناس طيبين الراچل الصوح يا هريدي اللي يجدر يصون ويحافظ الراچل اللي يجدر يتحمل مسؤوليه بيت الراچل اللي يجدر يكون عنده وفاء وانت فيك كل الصفات الحلوه دي يبجي ازاي موافجش بس

أبتسم هريدي بفرحه صوح يعني انت ممكن توافج عليا لو أتجدمت لست فرحه؟؟حس هريدي باللي قاله أجصد يعني انت شايف اني أشرف

 

أبتسم موسي وفضل باصصله بشرود اه يا هريدي ليه لا انت مناجصكش حاچه بس مش معني موافجتي ان هي ممكن توافج عليك مش عيب فيك لا سمح الله بس يمكن هي ما تبجاش ريداك او شيفاك كيف اخوها طبعا اني مجصدش فرحه بالكلام ده اجصد اي بنت ممكن تتجدملها اللي عايز اجوله مش معني انك تترفض ان ده عيب فيك في اسباب كتير ممكن تترفض عشانها يعني انت مثلا بتشوفني كيف

هريدي….بشوفك سيد الناس كلها بشوفك الكبير واي واحده في الدنيا تتمناك

موسي….اهو شوف انت جولت ايه بس ممكن بعد كل كلامك ده اترفض مش من عطر لكن من اهلها ودي حاچه ممكن أتوجعها مش عيب فيا بس هما ماهيحبونيش يعني الرفض اسبابه كتير فهمت حاچه ولا بغل كيف العاده

هريدي…بصله بعدم فهم هو اني فاهم ومش فاهم

موسي…وهو بيقوم يبجي معاك ربنا أفضل انت دوج عالربابه واني هطلع اريح چتتي هبابه

خرج موسي وفضل هريدي باصص عليه وبيحاول يفهم اللي قاله وفجأه ابتسم.

هريدي…يعني ممكن توافج عليا لو أتجدمت لفرحه وكمل بحب تبجي طاجه الجدر اتفتحتلك ياواد يا هريدي لما حبيبتك تبجي معاك.

اما عند موسي خرج وهو بيكلم نفسه بحزن.

العشج مش بيدنا يا هريدي الاحلام سهله لكن تحجيجها صعب مش هلومك علي نظره الحب اللي شوفتها في عيونك لاختي عشان الجلب ماعلاهوش سلطان ياصاحبي لكن خايف عليك من وچع الجلب عشان انت طيب

كمل موسي مشي وطلع علي اوضته يرتاح.

وانتظر بأشتياق مكالمه عطر

مر اليوم علي الجميع.

لكن مر بصعوبه علي عائله عتمان وقضوا يومهم بين أشاعات وفحوصات لحد ما أتاكدوا ان عتمان فعلا اتصاب بجلطه في المخ نتيجه الضغط العالي.

عتمان رغم ظلمه وجحود قلبه إلا ان عطر عنده الغاليه والمدلله وقريبه من قلبه ما توقعش انها تعمل كده ولا أستحمل اللي أخواتها عملوه فيها فاوقع منهم.

……

في صباح يوم جديد صحي موسي راح علي أرضه

وكان منتظر قدوم بدر ليه عشان يعرفه انه اشتري ارض سعد الهواري لكن كان صاحي مضايق وحاسس بقلق عشان عطر متصلتش بيه.

….

اما في المستشفي

فكان كل من حمدان وهيبه وبدر وبخيته كل واحد فيهم اعد علي كرسي في الاستقبال الخاص بالمستشفي جالهم الدكتور

قام حمدان بسرعه راح عليه

حمدان…خير يا دكتور

الدكتور…حاچ عتمان فاج لو حابين تشوفوه بس بعد أذنك هو حالته مش سامحه بالكلام خالص بلاش تچهدوه وبلاش تحسسوه بالحزن خصوصا والدت حضرتك عشان حالته متسؤش اكتر

حمدان…حاضر يا دكتور

سامعه يا اما كلام الدكتور امسكي نفسك جدامه ابوس يدك ما عيزينش حالته تدهور اكتر

بخيته…ماشي يا ولدي

الدكتور….جبل ما تدخلوا عايز افكركم تاني الچلطه اللي حصلتله دي نتيچه الضغط العالي والانفعال للاسف الدم مجدرش يوصل لخلايا المخ فاتصاب المخ بچلطه وطبعا الچلطه أثرت علي چزء من حركه الچسم واثرت علي النطج والكلام

بدر…يعني هيفضل إكده يا دكتور

الدكتور….للأسف مش هجدر اخبي عليكم في حالات كتير بتتحسن تحسن بسيط وفي حالات لأ.. وفي حالات مع الوجت والأدويه والعلاچ الطبيعي والنفسي بترچع وان شاء الله احنا معاه وهيرچع أحسن من الاول بس انتوا لازم تساعدونا في ده ومتحسسهوش بالعچز او الضعف عشان الحاله النفسيه عنده ..مهم اوي اننا نوجف معاه في المرحله الصعبه دي ونجويه حتي لو بالكلام

بدر…بحزن ان شاء الله يا دكتور

راحوا كلهم ورا الدكتور

دخلوا لقوا عتمان نايم بوئه باين عليه أثر الشلل ومش بيتحرك

دخل حمدان جري عليه باس ايده هو وبدر وهيبه

حمدان…سلامتك يا ابوي الف سلامه عليك

هيبه….واللي خلجني وخلجك لا هچيب حجك من الخسيس موسي وهچيبلك چتته تحت رچليك

بدر….چرا ايه يا هيبه مش وجته الحديت ده نسيت اللي الدكتور جاله

بخيته…عتمان انت زين

حاول عتمان يتكلم لكن مكانوش فاهمين كلامه وهو متعصب لانهم مش فاهمينه ومضايق من طريقه كلامه وفضل يتعصب

بدر…اهدي يا أبوي براحه جول عايز ايه.

عتمان فضل يتكلم ومحدش فاهمه

هيبه…بتجول ايه يا ابوي مش فاهمك.

فضل عتمان يتعصب ويحاول يتحرك بس حاسس ان مش كل جسمه بيستجيب معاه

بدر…اهدي يا ابوي انت بتجول عايز تمشي من اهنه صوح

هز عتمان راسه وفرح ان بدر فهمه

بدر….حاضر يا أبوي هنخرچك بس مش الوجت لازما تفضل إهنه كام يوم لحد ما الدكاتره يطمنونا عليك ويكتبولك علي خروچ

رجع تاني عتمان لعصييته

حمدان ..يا ابوي ماهينفعش تخرچ الوجت نسأل حتي الدكتور وهو اللي يجول

بعد شويه دخل الدكتور وخرجهم بعد ما أدي عتمان حقنه مهدئه نيمته بدر قاله علي خروجه من المستشفي لكن الدكتور رفض وقال لازم يفضل كام يوم .

حمدان….يلا يا اما تعالي اروحك ترتاحي انتي من امبارح وانتي جاعده إكده روحي أرتاحي شويه

بخيبته…ونسيب ابوك يا حمدان

هيبه…يا اما حمدان بيتكلم صوح هنعاود تاني بس هو نايم ومهيصحاش دلوك كيف ما جال الدكتور نروحوا نرتاح شويه ونرچعوا تاني

حتي عشان نغيروا خلجاتنا

بخيته…ماشي يا ولدي

روحوا كلهم مع بعض بدر كان عايز يفضل مع ابوه لكن خاف يتعرضوا لعطر تاني خصوصا بعد اللي حصل لعتمان اكيد غضبهم زاد فاخاف عليها وروح معاهم واللي حسبه لقاه

بمجرد ما وصلوا الكل عرف اللي حصل لعتمان وطلع حمدان وهيبه علي عطر زي الوحوش وبدر وراهم هو وهنيه وهاچر وبخيته وسهير فتحوا الباب كانت صاحيه لكن مش قادره تتحرك من وجع جسمها

هيبه….بغضب أياك تكوني فرحانه الوجت وابوكي مرمي في المستشفي ابوكي أتشل من تحت راسك يا فاچره

عطر…بحزن أبوي

حمدان…مسكها من شعرها أفتكرتي الوجت أبوكي مفتكرتهوش ليه وانتي دايره علي حل شعرك مع الخسيس ولد وهبه.

بخيته….وطيتي راسنا يا فاچره

عطر…بدموع حرام عليكي يا أما اني معملتش حاچه عفشه اني عطر يا أما انتي عرفاني زين بتحاسبوني كني فرطت في شرفي

هيبه ضربها بالقلم بعنف كمان ده اللي ناجص يا بنت الكلب لاهو انتي إكده ممرمغتيش شرفنا في الارض

بدر…سيبها يا هيبه

هيبه…خبطه في صدره بعنف متدخلش وبعد من جدامي

قرب منه بدر وضربه بعنف في وشه وابتدا هو وهيبه يضربوا في بعض والكل يصوت

بخيته….سيبه ياهيبه سيب اخوك يا ولدي

بعد عنيه يا بدر ده اخوك

حمدان قرب هو كمان من بدر وضربه مع هيبه فضلت بخيته تصوت وراحت علي عطر تضرب فيها

بخيته…كله بسببك يافاچره اخواتك هيموتوا بعض من تحت راسك

سهير….بعد ياحمدان ابوس يدك

هاچر…ألحجونا يا خلج

هنيه….بعد يا هيبه وحيات ابوك هتموتوا بعض

سحب بدر مسدس هيبه من جيبه بسرعه ووجهه في وشهم وبكل غضب سحب الزناد. بعد عنه بسرعه حمدان وهيبه.

بدر….اخرچوا من الاوضه بسرعه لا أنا هجتل حد فيكم

حمدان…نزل السلاح

بدر….جولت اخرچوا من إهنه

هيبه…ماشي يا بدر الكلب حسابك معايا انت والخاطيه أختك والخسيس موسي خرج هيبه بعنف

بدر….يلا واجفين ليه عاد جولت أخرچوا بره

سابت بخيته شعر عطر من ايدها

بخيته…اهدي ياولدي اهدي يابدر

بدر….أهدوا انتوا وارحموا مره واحده في حياتكم لله أخرچوا وسيبوها يلا

خرجت بخيته بهدوء وهي بتشد حمدان بالعافيه هي وسهير.

حمدان…هجتلك يا بدر والله لا هجتلك

سهير…يلا يا حمدان امشي معايا أبوس يدك

خرجوا وقفلت هاجر وراهم الباب بسرعه

وجريت علي بدر انت زين

بدر….الحمد لله

هاچر…في دم في خاشمك

بدر…اني زين جولتلك يا هاچر قرب من عطر

هنيه….جومي يا خيتي

هاچر….عطر حاسه بايه يا حبيبتي عطر لازمها دكتور يا بدر

بدر….هاتولها حاچه نضفولها الدم اللي في وشها ده

بدر كان بيتكلم وهو مش باصصلها وزعلان منها.

قامت هنيه بسرعه جابت فوطه حطت عليها مايه ورجعت بسرعه أعدت جمب عطر تنضف وشها براحه

هاچر…اني هروح أطلعلها خلجات غير اللي اتبهدلت دي

بدر…واني هخرچ أجف بره لحد ما تغيرولها

مسكت عطر ايد بدر بسرعه

عطر…بدر

سحب بدر ايده منها بهدوء لكن بسرعه مسكت ايده مره تانيه

عطر…الله يخليك يا بدر متعملش فيا إكده

بصلها بدر بحزن واني عملت ايه يا عطر أني معملتش أي حاچه وللأسف مجدرش أعمل فيكي حاچه ولا حتي في موسي لو في حد عمل ياعطر هيبجي انتي وموسي

عطر…بلاش تظلمنا يا اخوي

بدر…واني من ميته كنت ظالم يا عطر اني طول عمري

بعتبرك بتي مش اختي رغم ان الفرج بينا مش كبير شوفتي مني ايه يا عطر عشان تكسريني إكده بس تعرفي يا عطر صدمتي فيكي مش كد صدمتي في موسي صاحب عمري اللي طول عمري بعتبره اكتر من اخوي بس هو في الاخر عمل ايه أستغفلني ولف علي أختي

عطر…لاه يا بدر بلاش تظلم موسي صدجني اني اللي روحت لموسي خوفت أخواتك يأذوه يا بدر وخوفت عليك تروح تحذره واخواتك يعرفوا وساعتها ماهيسكتوش خوفت يأذوك انت كمان عارفه اني غلطت بس اني كمان معملتش حاچه تكسر عينك يا اخوي عارفه ان الحديت اللي هجوله ده مهينفعش اجوله ليك انت بالذات بس لازم أجوله ايوه يابدر اني هحب موسي ومن زمان عشان إكده كنت برفض اي عريس يتجدملي وكنت بستحمل اللي امك واخواتك بيعملوه فيا عشان مجدرش اتخيل اني ممكن أتچوز حد تاني غيره واللي كان مصبرني وجفتك انت وأبوي معايا موسي مخانكش يا بدر موسي بيحبك

بدر…لو بيحبني كيف ما بتجولي كان صارحني وهو عارف اني اكتر واحد كان هيرحب ويفرح وهيجف معاه كمان بس هو معملش إكده

عطر….عشان كان مستني الوجت المناسب كان خايف أهله يرفضه بسبب اللي بين أهلنا وكان خايف ابوك واخواتك يرفضوا صدجني يا بدر احنا مجصدناش نكسر عينك بس انت اكتر حد عارف ان موضوعنا معجد ابوس يدك يا بدر بلاش النظره اللي في عيونك دي بتجتلني ياأخوي

بدر….بأبتسامه حزن وتفتكري يا عطر الوجت موضوعكم مبجاش معجد

عطر…بدموع مش هتجف معاي يا أخوي كيف ما بتعمل كل مره

بدر….واني في ايدي ايه اخواتك ناويين عالشر وحالفين يچوزوكي ويبلغوا موسي انك رفضتي الچواز منيه عشان يكسروه وطبعا موسي ما هيجدرش ينطج ويجولهم انهم هيكدبوا وانك عشجاه وعتحبيه كيف ما عيحبك.

عطر…بدموع بس ده ظلم يا بدر

بدر…أنتوا اللي ظلمتوا حالكم ياعطر لما خبيتوا عليا وخلتوني كيف الأطرش في الزفه اني هعمل اللي أجدر عليه يا عطر عشان مجدرش أشوف جلبكم بينكوي واني ساكت بس لو مجدرتش متلومنيش يا خيتي

سابها بدر وخرج بسرعه من الأوضه وفضلت عطر تعيط في حضن هنيه وهاچر وهما يعيطوا عليها😔

عند موسي كان اعد باله مشغول ومش قادر يركز في الورق اللي أدامه لا عطر كلمته من أمبارح ولا بدر عدي عليه خايف يكلم عطر يكون موبايلها مش في ايدها او اعده مع حد وتحصل مشكله..لكن بعد تفكير قرر انه يتصل ببدر.

اتصل موسي علي بدر مره واتنين وتلاته الموبايل بيفصل وهو مابيردش حس بالقلق أكتر لكن ماكانش في ايده حاجه يعملها.

عدت كام ساعه رجع موسي القصر وهو بيحاول يداري قلقه لكن لو قدر موسي يخبي عالناس كلها مش هيقدر يخبي علي چليله اللي بتفهمه من غير ما يتكلم دخلت چليله الاوضه عنده عشان ينزل يفطر كان واقف أدام الشباك شارد

چليله….موسي ياولدي ما سامعش الدج ده كله عالباب

موسي…بأبتسامه حجك عليا كنت سرحان يا ست الدار خير

چليله….الفطار چاهز ياولدي المغرب خلاص هيأذن

موسي….ماشي يلا اني چاي معاكي

مسكته چليله من ايده مالك يا ولدي من وجت ما چيت وانت جاعد حابس حالك وشيفاك شايل هم الدنيا علي راسك حوصل ايه

موسي…مفيش يا چليله

چليله….لاه فيه لو خبيت علي الناس كلها وصدجوك جلبي ماهيصدجش

موسي…بالي مشغول يا چليله

چليله…في ايه يا ولدي؟

موسي….من وجت ما رچعنا أمبارح وعطر لا حس ولا خبر ولا اعرف عنيها حاچه حتي بدر كان هيعدي عليا الضهر يتحدت معايا شويه بس معداش كلمته كتير ماهيردش

چليله….وايه اللي فيها يا ولدي مامستهلاش الجلج ده كله يمكن عطر مهياش لوحدها او يمكن مشغولين بحاچه

موسي….معارفش يا چليله بس اني حاسس ان في حاچه حوصلت واني أحساسي ما هيخيبش

چليله…انت هتجلجني ليه يعني هيكون حوصل أيه

موسي…ماعرفش وحتي لو في حاچه عند عطر طب بدر فينه ماهيردش عليا ليه

چليله….ياولدي لو في حاچه كان زمانا عرفنا مفيش حاچه بتستخبي في البلد دي وعموما يا خبر بفلوس أكيد بدر هيتصل عليك لما يشوف المحمول بتاعه

موسي….أن شاء الله يلا ننزل عشان الفطار

چليله….يلا ياولدي

نزلوا مع بعض وفطروا وكان موسي علي غير عادته سرحان

في خلال الساعات دي أنتشر خبر تعب عتمان بين الناس

وعرف موسي واهله بالخبر

وبسرعه جهز هو ووهبه واخواته عشان يعملوا الواجب..

وراحوا علي المستشفي.

قابلهم حمدان وهيبه وبخيته كان بدر مش موجود

اطمنوا علي عتمان وعرفوا حالته

وهبه…ياساتر يارب وكيف حوصل ده

حمدان….ماعرفش يا وهبه بيه هو حس بتعب امبارح ومره واحده وجع منينا

سالم…كيف يعني وجع منيكم اكيد في حاچه زعلته

هيبه…بغضب بيحاول يتحكم فيه لاه مافيش كان مبسوط ومافهش أي حاچه

سالم…اني هروح أطمن من الدكتور

وهبه…ايوه روح يا ولدي انتوا دكاتره زي بعض وهتجدر تفهمنا حالته

سالم…حاضر يا ابوي

مهران…استني ياسالم اني چاي معاك

سالم…يلا تعالي انت كمان معانا يا هيبه

راح هيبه وسالم ومهران مع بعض

وهبه…شدي حيلك يا أم حمدان

بخيته…بنظره حب رغم الغضب اللي ماليها.الشده علي الله ياوهبه تعبت حالك ليه

وهبه…تعب ايه بس اللي هتجولي عليه ده مفيش تعب ولا حاچه ربنا يطمنكم عليه

بخيته…يارب

وهبه…بس الدكتور مجالش ايه السبب

بخيته…جال الضغط عالي والدم ماهيوصلش للمخ

وهبه…ياساتر يارب حوصل ميته ده

بخيته…امبارح بعد ما مشيتوا بشويه

وهبه…وليه مابلغتوناش بس

بخيته…معلهش أتلخمنا في عتمان لما وجع منينا وطول الليل في إشاعات وكشف لحد ما النهار طلع يادوب روحنا نرتاح شوي ورچعنا تاني

وهبه…طيب لو في علاج لحالته بره البلد نسفره

بخيته…الدكتور بيجول اللي هيتعمل بره هيتعمل إهنه

وهبه..الوجت سالم يطمنا يمكن يجدر يعرف حاچه

فضل وهبه وبخيته يتكلموا

مع بعض

…..

موسي..شد حيلك يا حمدان أجمد إكده ابوك محتاچك تجف چمبه

حمدان..الشده علي الله تعبتوا حالكم يا موسي

موسي…ده وااچب يا حمدان

ماتجولش إكده

حمدان…بسخريه وكأنه قاصد الكلام اللي بيقوله طول عمرك صاحب واچب يا موسي ليه حج بدر أخوي يحبك ويعدك صاحب عمره

موسي..بدر ده اخوي مش بس صاحبي

حمدان….شوف سبحان الله نفس حديت بدر عنيك يا راچل ده بيحبك اكتر منينا بس احنا ماهنزعلش

موسي….حديت أيه ده بس يا حمدان انتوا أخواته بردو

حمدان…..متخافش جولتلك ماهنزعلش اصل صراحه ليه حج يحبك ديما يجول أنك راچل صوح وعمرك ماتخون وانك بتعتبره مرايتك وعمرك ما خبيت عليه حاچه ولا عمرك فكرت تكسره او تضايجه ولما فكرت في عطر چيت علي طول تتجدملها رسمي عشان متزعلهوش

بصله موسي وسكت حس ان في مغزي واضح وصريح من كلام حمدان وطريقته سرح موسي لانه بعد ما عرف بتعب عتمان قال ان ده سبب اختفاء عطر وبدر لكن بعد ما سمع كلام حمدان وتلميحاته رجع يفكر تاني والخوف دب في قلبه لا يكون بدر عرف حاجه

حمدان…حس ان موسي شرد لكن كمل كلامه اللي صدم موسي اكتر وخلاه أتأكد من أحساسه.

حمدان…صحيح كنت عايزك في حاچه يا موسي عارف انه لا وجته ولا مكانه بس كمان عارف أن بدر ما هيجدرش يجولك عشان كيف ما جولتلك انت تعز عليه جوي عشان إكده اني هبلغك بنفسي

موسي….بصله تبلغني بأيه؟

حمدان…ماهكدبش عليك يا موسي امبارح بعد ما مشيتوا ابوي شيع لعطر عشان ياخد رأيها في طلبك ليدها.

انتبه موسي بأهتمام لكلام حمدان…وللاسف كل شئ جسمه ونصيب ياواد عمي

بصله موسي وهو بيحاول يتمالك نفسه ..مافهمش!!

حمدان….عطر رفضت طلبك يا موسي وبدر اخوي اتعارك معاها ومد يده عليها عشان خاطرك وابوي بعد ما كان فرحان بطلبك أتنكد برفض عطر بس انت عارف عطر عند ابوي فرخه بكشك وكلامها اوامر طاوعها وده چنن بدر وخلاه مد يده عليها ابوي ماستحملش ووجع منينا بس طبعا أنت فاهم يا موسي مسأله الچواز ديه جسمه ونصيب

موسي…بشك كيف يعني عطر رفضت أجصد يعني

قاطعه حمدان…رفضها ليك ماهيعيبكش يا موسي انت تشرف اي حد بس هي جالت انها مش ريداك

موسي…عطر مش ريداني اني؟

حمدان….بابتسامه نصر للأسف يا موسي ..أنت كنت مالي يدك من موافجتها ولا ايه

بصله موسي بابتسامه بسيطه وهو غضب الدنيا كله في قلبه لكن بيداريه..لاه وعموما كيف ما جولت يا حمدان الچواز جسمه ونصيب

جه سالم في الوقت ده وقف معاهم وفهمهم حالت عتمان زي ما شرحله الدكتور وطريقه التعامل معاه الفتره الجايه عشان نفسيته

فالوقت ده موسي مكانش معاهم وكأن روحه مسلوبه منه وواقف معاهم بجسد من غير روح وعلي اد ما كان بيحاول يكون ثابت وهادي لكن اللي كان جواه كان حاسس بيه حمدان هو كمان مكانش معاهم كان مركز مع موسي وحاسس باللي جواه كان طاير من السعاده وحاسس انه عمل اكبر إنجاز في حياته لما ردها لموسي

بعد وقت بسيط أستأذنوا منهم ومشيوا وطول الطريق موسي ساكت لحد ما وصلوا القصر..

مهران…فاطمه أعمليلنا كوبايه شاي الله يخليكي حاسس دماغي مش موزونه

فاطمه…من عنيا التنين

وهبه…كان مركز مع موسي وحاسس انه متغير خصوصا بعد وقفته اللي طولت مع حمدان.

وهبه…مالك يا موسي من وجت ما مشينا من المستشفي وانت ساكت ووجفتك مع حمدان طولت جالك ايه ضايجك إكده.

الكل أنتبه لموسي واستنوه يتكلم فضل موسي ساكت شويه. وبص لوالده بهدوء

موسي…حمدان بلغني برد عطر وجال انها رفضت ومش موافجه

اتصدم الكل وبصتله چليله بحزن

چليله…كيف ده أكيد بيكدب

وهبه….كيف رفضت وانت بتجول بتحبك كيف ما هتحبها

موسي…كيف ما جالتلك أمي بيكدب حكالهم اللي دار بينه وبين حمدان.

مهران…اني مش فاهم حاچه عتمان وهيبه اعترضوا علي حديت حمدان لما جال ناخد رأي عطر ولما ترفض يوافجوها كيف يعني

موسي….زي ما أمك جالت يا مهران حمدان بيكدب بدر ماهيردش وعطر ما هتتكلمش في سبب تاني ورا كدب حمدان بدر عمره ما يمد يده علي عطر ولا علي اي حد وعطر كانت طايره من الفرح عشان رايح اطلب يدها الرفض من هيبه وحمدان مش من عطر لكن ليه؟؟أكيد في سبب عالاجل كانت عطر كلمتني وجالتلي اللي حوصل

فرحه….يمكن هما اللي ضربوها يا أخوي واكيد خدوا منيها المحمول

سالم….لا يكون عرفوا أنها بتكلمك يا موسي

موسي….هو ده اللي خايف منيه يا سالم وأختفاء بدر هو اللي جالجني أكتر لو ده حوصل صوح يبجي خسرت بدر عشان اكيد هكون في نظره خاين

وهبه…اكلم اني بدر وافهم منيه اكيد هيرد عليا

موسي…لاه يا أبوي سيبه دلوك واني هعرف أوصله.

بعد وقت بسيط أستأذن موسي منهم وطلع علي اوضته

چليله قامت وراه

وهبه…علي فين يا چليله

چليله…هشوف ولدي

وهبه…همليه لحاله الوجت يا چليله

چليله…اسيبه إكده حزين لاه ماهجدرش سابتهم چليله وطلعت وراه علي الاوضه لاقته اعد علي الكرسي حاطت ايده علي راسه وحزن الدنيا باين عليه أعدت جمبه

چليله…ايه يا ولدي ماوخداش عليك مكسور إكده طول عمري بشوفك جوي وسيد الناس كلها أصلب طولك يا موسي

رفع موسي راسه وأبتسم

موسي…متخافيش عليا يا چليله أني بخير

چليله…جلبك ما هيجولش إكده

موسي…بضحكه بسيطه لاهو انتي بجيتي خبيره في لغه الجلوب يا چليله

چليله…لاه بس اني جاعده چوه جلبك كيف ما بتجول وجلبك من حزنه طبج عليا يا موسي

موسي…جلبي كان نفسه تدخلي عطر تجعد معاكي فيه بس الظاهر إكده ان النصيب ماعيزش غيرك يسكنه يا چليله.

نزلت دموع چليله بحزن بس اني كنت عيزاها تسكن جلبك معاي يا سيد الناس.

موسي….مش كل حاچه بنعوزها يا أما بتتحجج النصيب ملناش يد فيه

چليله…متعودتش اشوفك ضعيف يا موسي

موسي..مش ضعف ياچليله

لكن إيمان بالنصيب اوجات النصيب يا چليله يا أما يوچعك بالفراج شويه وبعدين مع الوجت يجربك من اللي انتي ريداه من تاني يا اما يفرج بينكم للأبد ويسيبك مكويه طول حياتك بوچع الفوراج

النصيب يا چليله كيف الطلجه اللي هتخرچ من السلاح ياتصيب الچسم وتوچعه لكن فالاخر تطلع و مع الوجت وچعها يبجي هين وتجدري تكملي حياتك يا تصيب الجلب ووچعها يبجي واعر ووجتها مابيبجاش سهل تطلع منيه بتاخد الروح وحياتك بتوجف ما هتكملش وكمل موسي بعيون بتلمع بالدموع.. واني نصيبي صاب جلبي يا چليله.

نزلت دموع چليله بحزن علي موسي وعلي وجع قلبه

مسح موسي دموعها بابتسامه بسيطه وباس ايدها بحب.

شدته چليله لحضنها بقوه

وكأنها بتضم وجعه وتطبطب عليه بقلبها 😔💔

الحلقة 4 

.

.

.

ست الدار

رواية ست الدار الحلقة الرابعة

في صباح يوم جديد محمل بالكثير من الاحداث.

قضي موسي ليلته بعد ان جفاه النوم في شرود وتفكير وبعد تفكير طويل أتخذ قرار لايعلم توابعه👌 قام لبس جلبابه وخرج من الاوضه نزل في ساحه القصر كانت چليله واقفه بتبخر والشغالين حواليها بينضفوا القصر قبل معاد عزومه أهل البلد اللي كان فاضل عليها يومين.

موسي….إصباح الخير يا ست الدار

جليله بأبتسامه إصباح السعاده والرضا يا ولدي كيفك انهارده

موسي…الحمد لله بخير

چليله…شكلك منمتش زين

موسي…لاه نمت يا أمي اطمني

چليله…مع أنك بتكدب بس ماشي هصدجك ربنا يطمني عليك دايما يا ولدي

موسي…ويخليكي ليا يا ست الدار..مجولتليش جالبين الجصر ليه إكده؟

چليله…أنت ناسي أن عزومه أهل البلد بعد بكره جولت للبنته ينضفوا عشان بكره طول اليوم هنبجوا مشغولين في تچهيز الفطار بتاع العزومه

موسي…ربنا يديكي الصحه يا غاليه هستأذن اني عشان متأخرش ومعطلكوش

چليله…أستني ابخرك جبل ما تخرچ.

وقف موسي لچليله لحد ما بخرته وبعد انتهائها باس راسها وخرج وقبل ما يروح علي أرضه راح علي ارضه الجديده اللي اشتراها من سعد واول حاجه عملها علق يافطه كبيره بأسمه علي الارض عشان الكل يعرف ان الارض مبقتش تخص سعد الهواري وكأن الغضب والنار اللي جواه عموه وحب يوجع حمدان باي طريقه

خلص موسي وراح علي أرضه وابتدا يشتغل لكن تفكيره ما وقفش لحظه وكل اللي كان شاغله ياتري حصل ايه مع عطر ؟وايه اللي بدر سمعه خلاه أختفي ومش قادر يواجهه؟ وياتري لو حمدان أكتشف انه كان يعرف عطر ليه مواجهوش وهو أكتر شخص مستني لموسي غلطه ازاي عداها من غير مواجهه وكان ايه غرضه لما قاله ان عطر رفضته..كل دي كانت أسئله بتدور في عقل موسي لكن كان قادر يخمن بذكائه أن حمدان عمل كده عشان ما يبانش مكسور أدامه وكان واثق ان اكيد حمدان بيخطط لحاجه أكبر من تفكيره 👌

 

…….عدت كذا ساعه الرايح والجاي كان شايف أسم موسي منور علي الارض وابتدا الكلام والهمس والاسئله اللي مكانش ليها إجابات غير عند العيلتين وبس. وصل الخبر لهيبه اللي كان شايط دخل هيبه علي حمدان في المستشفي

هيبه..دريت باللي حوصل ؟

حمدان…حوصل ايه؟

هيبه..موسي خد الأرض من سعد

حمدان..بصدمه هتجول ايه خدها كيف

هيبه..هو أيه اللي خدها كيف سعد غفلنا وبعهاله موسي علج أسمه علي أرضنا يا حمدان البلد ملهاش سيره غير أرضنا اللي موسي خدها روحت أشوف سعد ولد المركوب مالجيتوش والدار بتاعته فاضيه.

حمدان…حوصل ميته وكيف وراح فين سعد

هيبه…ماعرفش سعد أديله يومين غطسان ما شوفتهوش من يوم ما كنا عنديه

حمدان…بغضب خليك إهنه مع أبوك متسيبهوش

هيبه…علي فين؟

حمدان…هروح اشوف الحديت ده عشان لو صوح يبجي موسي فتح علي نفسه باب چهنم وحفر جبره بيده هو والخسيس اللي اسمه سعد😡

خرج حمدان بكل غضب من المستشفي وراح علي ارض سعد شاف اسم موسي متعلق علي يافطه كبيره ومكتوب عليها أن الارض ملكه اتجنن حمدان بمجرد ما لمح أسم موسي علي الارض وكأن أسمه كفيل يشعل نيران الغضب داخل قلب حمدان وبسرعه راح علي ارض الشرفا وهو شياطين الارض بتتنطط ادام عينه.

بمجرد ما دب رجله في الارض لمحه هريدي جاي من بعيد جري بسرعه علي موسي.

هريدي…موسي بيه موسي بيه

موسي…في ايه ياواد

هريدي….ألحج حمدان الهواري چاي هناك أهه

موسي..بص عليه من بعيد طيب روح انت يا هريدي

هريدي…ماشي

كمل موسي شغله وهو متجاهل حمدان تماما لحد ما جه ووقف قصاده.

حمدان بدون مقدمات…رچع الارض يا موسي😡

رفع موسي رأسه بكبرياء وتجاهل مقصود….أرض أيه؟

وبعدين مش ترمي السلام لول

حمدان….من غير سلام ولا حديت كتير ملهوش عازه انت سمعتني

أبتسم موسي وهز راسه شمال ويمين ساب القلم من ايده وعدل عمامته ببرود زود نار حمدان.

موسي..ارض ايه اللي عايزني أرچعها يا حمدان.

حمدان….أرض سعد

موسي…بهدوء رهيب لاهو سعد عايزني ارچعهاله ولا ايه عاد اني والله يا حمدان وماليك عليا حلفان مديله اللي طلبه وزياده

حمدان…بلاش طريجتك دي معايا اني بالذات يا موسي انت فاهم أجصد ايه

موسي…صدجني مش فاهم بس اهه احنا فيها فهمني

حمدان…ماشي يا موسي هفهمك عايز كام وتسيبلي الارض

موسي…أسيبلك الارض مين جالك اني عارضها للبيع من أساسه

حمدان…هديك كد اللي اديته لسعد مرتين ولو عايز تلاته هديلك

موسي…ولو هتفدع كد اللي اديته لسعد الهواري الطاج تلاته ولا عشره ولا حتي ميه ماهبعش يا حمدان من ميته موسي ولد وهبه بيفرط في ارض ملكه

 

حمدان…الارض مش ملكك يا موسي الارض ملك هواره والهواره ما هيبيعوش ارضهم

موسي….بس الهواره باعوا واني اشتريت

حمدان…لو تجصد علي الخسيس سعد فا أعتبره مش منينا عشان اللي يفرط في ارضه ميبجاش راچل وسعد فرط في أرضه بس ملحوجه أخلص معاك وحسابه بعدين معايا

موسي…اديك جولتها بلسانك يا حمدان فرط في أرضه مش في أرضك يعني مالاخر اللي بيني وبينه مليكش صالح بيه يا حمدان هو باع واني أشتريت مالك زعلان ليه عاد.

حمدان…بتهديد لو مش رايد لسعد الأذي هو وأهل بيته بيعلي الارض واني وجتها ليك عليا ما هجربلوش

موسي…بأبتسامه سخريه أستفزت حمدان…هو من ناحيه ما هتجربلوش فا أنت مش هتعرف سعد في امان واني مطمن عليه الوجت ما تخافش مش هتجدر توصله ولو جدرت اني اللي هجفلك يا حمدان.

حمدان….بتحميه؟! يعني لعبتها صوح يا موسي باعلك الارض وانت دفعتله تمنها وكمان أمنت خروچه من البلد وأمنت مطرحه في مصر بس انت أمنته يا موسي وبتحميه وماله!! بس يا تري

بجي يا موسي مين هيحميك

موسي…الحامي ربنا حاسك بتهدد الكبير في ارضه يا حمدان

حمدان…لو تجصد بالكبير ده انت يا موسي توبجي غلطان عشان البلد دي ماهيبجاش ليها كبير غيري انا وبس اما بجي لو عالتهديد فاحمدان الهواري ما هيهددش يا موسي حمدان الهواري بينفذ علي طول

موسي..بضحكه مستفزه وتحدي قرب من حمدان وكمل بصوت واطي واني مستني التنفيذ علي أحر من الچمر ولولا أن الارض واسعه كيف ما أنت شايف وملهاش حيطان كنت جولتلك أختار حيطه منيهم وأخبط فيها راسك بس زي ما انت شايف إكده مفيش حيطان

بصله حمدان بغضب وكمل بنفس نبره صوت موسي.

حمدان…ألحج أبنيلك حيطان وسجف يا موسي عشان لما أخد روحك بيدي يوبجي في حيطان تضلل عليك و متندفنش وسط الطل إكده وكلاب السكك ياكلوا في چتتك حسابك تجل معاي يا موسي وكفتك طبت خلاص

موسي..بأبتسامه مستنيك يا حمدان تصفي حسابك معاي

بصله حمدان بشر وشد جلبابه بغضب ومشي من أدامه.

أبتدت تختفي أبتسامه موسي واحده واحده وهو حاسس ان حمدان مش هيعديها علي خير

رجع حمدان علي المستشفي حكي لهيبه كل اللي حصل وأزداد أشتعال هيبه

وغضبه مكانش يقل عن غضب حمدان راحوا علي القصر وكانت عطر هي المنفذ الوحيد المتاح امامهم عشان يطلعوا عليها غضبهم

فضلوا يضربوا فيها بغل وحقد من غير رحمه وكأنها السبب في كل حاجه بتحصل وكالعاده أتشابك معاهم بدر وبعد وقت كبير قدروا يخلصوا عطر من ايدهم بعد أن أصبحت جثه هامده

……

عدي اليوم وعدي اليوم اللي بعده موسي كان ديما ساكت وعلي اد ما بيحاول يبان طبيعي إلا ان حزن قلبه كان كبير.نفسه يسمع صوت عطر او يشوفها محتاج يعرف ايه اللي بيحصل معاها عارف ان حمدان وهيبه أكيد مش هيسيبوها لو فعلا عرفوا ان في بينهم حاجه كان مضايقه أختفاء بدر وعدم رده علي موبايله حاسس بالذنب ناحيته وخايف يكون بدر قرر انه يخسره ودي اكتر حاجه كانت واجعه قلب موسي

……

 

اما عند عتمان كان وهبه بيزوره كل يوم بيعدي عليهم شويه يطمن عليه ويمشي بصفته كبير البلد ولازم يسأل علي كل الناس لكن مكانش بيتكلم في موضوع موسي وعطر…خرج عتمان قبل يوم واحد من عزومه اهل البلد وراح علي القصر حاولت عطر تدخله لكن اخواتها منعوها وبخيته رفضت وكانت بتتعامل من الكل أسوء معامله وطول الوقت هيبه وحمدان يضربوا فيها وكالعاده يلحقها بدر من ايدهم بطلوع الروح.

أما بدر من بدايه ما عرف ان عطر علي علاقه بموسي وهو حابس نفسه في القصر وكان خروجه بسيط يا دوب يروح يشوف والده ويرجع عشان ميسبش عطر لوحدها واخواتها يستفردوا بيها.

……..

في قصر وهبه اخيرا جه اليوم المنتظر لعزومه أهل البلد كان الكل شغال علي قدم وساق بيجهزوا الجنينه بره لأستقبال عدد كبير من رجال البلد اما القصر من الداخل كان بيجهز لأستقبال النساء.

……….

في قصرعتمان

هاچر بحزن علي بدر هتفضل إكده كتير يا بدر

بدر…عيزاني اعمل أيه يا هاچر

هاچر…ماعيزاش أشوفك حزين إكده يا بدر حوصل أيه لكل ده بس

بدر ..كل اللي بيوحصل ده يا هاچر وبتجوليلي حوصل ايه

هاچر…أيوه يا بدر حوصل أيه لو عاللي حصل لأبوك فا ده مكتوب يا بدر اما لو عاللي حوصل من عطر اني شايفه انك مزودها شوي يا بدر ومتزعلش مني

بدر….مزودها ؟أختي بتكلم صاحبي من ورايا وصاحبي مستغفلني ويعرف اختي من ورايا وتجولي مزودها

هاچر…اسمع يا بدر انت طول عمرك بتجول اني بحب الحج وديما تجولي أنك بتحب تتحدت معاي وبترتاح للحديت معاي صراحه ايوه مزودها الحب مش بيدنا يا بدر عارفه انك شايف موسي خانك وأستغفلك بس كنت عايزه يجولك ايه بحب أختك حتي لو كانت دي الأصول مش يمكن يكون موسي كان عنديه حسبه تانيه

بدر…حسبت ايه يا هاچر اللي تخليه يخبي عليا

هاچر…انك تفضل طول الوجت شاكك فيه انك تتغير معاه وبعدين كان هيجولك ايه بحب أختك طب لو ده اللي انت عايزه كنت هتجوله ايه

بدر…اكيد كنت هوافج انه يحبها بس بالاصول يا هاچر ياچي يطلب يدها

هاچر…ماهو طلبها يا بدر واكيد حس انه مينفعش يفضل مخبي عليك أكتر من إكده يمكن لو كان موسي بيحب اي حد تاني في الدنيا غير عطر كنت انت اول واحد هايعرف عشان انت عارف ان موسي بيحبك عطر كمان يا بدر كان صعب عليها تجولك انها عاشجه صاحبك حتي لو كنت انت وهي جريبين من بعض وبعدين يا بدر انت عارف المشاكل اللي بين عيلتكم وعيلت موسي من زمان عارف ان موضوعهم صعب افرض كان جالك وچه طلب يد عطر وأترفض بزمتك مش كنت هتفضل طول الوجت شاكك فيهم فكر صوح يا بدر وسيب كل اللي مزعلك علي چنب خليك معاهم ما تسيبهمش عاتبهم بعدين ومتنساش يا بدر ان اني وانت بنحبوا بعضنا من زمان وكنت بتكلمني وبكلمك من ورا أهلنا بلاش ترضي لنفسك اللي ماهترضاهوش علي غيرك يا بدر انت حبيت وعارف يعني ايه حب

سرح بدر في كلام هاجر عارف انها بتتكلم صح بس مش قادر يمنع قلبه من الزعل.

هاچر…ماتفكرش كتير ويلا جوم وأچهز وروح العزومه بتاعت كل سنه انت عارف ان ابوك ما هيجدرش وحمدان وهيبه اكيد ماهيروحوش روح يا بدر عشان خاطري.

بدر…لاه يا هاچر صدجيني مش هجدر

هاچر..طيب كلم موسي واعتذرله انك مش رايح الراچل ما هيبطلش أتصال بيك رد عليه مره يا بدر.

بدر …هاچر معلهش سبيني شويه لحالي

هاچر…بأبتسامه ماشي يا بدر هسيبك بس فكر زين

خرجت هاچر وسابت بدر تايهه في دوامه تفكيره وحزنه.

نزلت هنيه من اوضتها عشان تساعدهم في المطبخ قبل معاد الفطار

هنيه….محتاچه حاچه يا حماتي

بخيته…البرنسيسه شرفت تو ما أفتكرتي

هنيه….ليه هتجولي إكده بس يا حماتي اني اللي عامله كل حاچه حتي أسألي البنته خلصت وكلنا وعملت وكل الكبير وطلعت أتسبحت وجريت في المصحف شويه ولساتني نازله أشوف لو في حاچه تاني أساعد فيها.

بخيته…خلاص بطلي لت نسوان فارغه هو ده اللي انتي فالحه فيه عاد

أبتسمت سهير بشماته

بخيته…روحي يلا نضفي المكان اللي جدام المضيفه بره يلا همي بلا لكاعه

أتنهدت هنيه بحزن…حاضر يا حماتي بعد أذنك

خرجت هنيه وأبتدت تنضف المكان بهدوء وتحاول تخلص بسرعه عشان تتلاشي اي كلمه من كلام بخيته اللي بتسمم بيه بدنها كالعاده.

ولكن فجأه أتصدمت هنيه لما سمعت حمدان وهيبه بيتفقوا علي حاجه في المضيفه قربت هنيه بهدوء من غير ما حد يا خد باله من باب المضيفه وحطت ودنها عالباب وسمعت🙄🙄🙆‍♀️

هيبه…يعني خلاص هنخلصوا عليه انهارده وهنرتاح منيه

حمدان…انهارده هنزفوا موسي علي جبره مش جولتلك اهدي وأستني إكده واني هبرد جلبك وجلبي

هيبه…يا اما نفسي الكام ساعه دول يچروا بسرعه وأشوف موسي غرجان في دمه والكل هيموت عليه

حمدان هيحصول انهارده هنبرد نارنا كلنا وهاخد.حجي من موسي في مشيه مع عطر وهاخد حجنا منيه في الارض اللي خدها منينا وتعب ابوي ورجدته هاخدها منيه من انهارده مهيبجاش في كبير غيري اني وانت في البلد ديه وجت الفطار هخرچ اني والرچاله نخلصوا وهعاود طوالي خليك انت أهنه عشان ماحدش يشك فينا

هيبه…بأبتسامه شر مستني اليوم اللي اشوف فيه سالم مزلول ولوحده ويبجي يوريني نفسه بجي هيعمل أيه وكبيره تحت التراب ضحك حمدان وهيبه بشر.

……

 

بمجرد ما سمعت هنيه كلامهم حست بقبضه في قلبها وخوف علي موسي حطت هنيه أيدها علي قلبها بسرعه عشان تحاول تهدي ضربات قلبها العنيفه وتحاول تطمنه أن موسي مش هيجراله حاجه.

فضلت هنيه تفكر تعمل ايه تقول لعطر بس بسرعه رجعت في كلامها عطر مفيش حاجه في ايدها تعملها ومعرفتها مش هتفيد بحاجه غير أنها تقلقها طيب تقول لبدر..بالرغم من انها عارفه ان بدر بيحب موسي وانه مش زي اخواته لكن خافت يكون بدر بعد اللي حصل قلب علي موسي خصوصا انه مش بيكلمه زي ما عرفت من هاجر فضلت تفكر كتير لكن حست ان عقلها مشلول ومش قادره تفكر راحت علي أوضتها عشان تحاول تهدي نفسها شويه وتحاول تفكر بهدوء

في قصر وهبه.

نزل موسي يشوف التجهيزات في الجنينه بنفسه فضل يتمشي في الجنينه ويباشر كل حاجه بنفسه دقايق ولمح وهبه جاي عليه

وهبه….ايه يا موسي في حاچه ناجصه

موسي…لا يا أبوي كله تمام الرچاله چهزوا كل حاچه والحريم كلهم بيطبخوا چوه في المطبخ

وهبه…الدبايح هتكفي يا موسي

موسي….طبعا يا حاچ هتكفي وهتفيض كمان

وهبه…لاه أني ماعيزش حاچه تفيض عايز الكل ياكل ويتبسط

بصله موسي بحب طول عمري بتعلم من حنيتك يا أبوي

وهبه….الناس غلابه يا ولدي مالهمش اي طلبات غير اللجمه اللي تخليهم عايشين فرحه الناس باليوم اللي بعزمهم فيه بتبجي عندي بالدنيا

موسي…بس انت يا ابوي مابتخليش حد فيهم محتاچ

وهبه….عارف يا ولدي وده واجبي مش عشان اني بس كبير البلد لاه عشان اني ربنا مديني كتير ماينفعش ربنا يديني واني أبخل علي عباده تعرف يا موسي أوجات كتير اجعد لحالي أكلم ربنا أجوله يارب كفايه إكده رزجتني كتير ومابجيتش محتاچ عندي بدل الارض اراضي مابجيتش عارف عددها المال كتير ملهوش عد اعمل ايه بالفلوس اللي لسه بتاچي ديه اعمل ايه بكل الاراضي ديه هأمن مستجبلكم طيب ما اني مأمن مستجبل كل واحد فيكم بولاده وولاد ولاده ومع ذلك ربنا بيديني أزود الاچور للعمال اتكفل بتعليم اتكفل بعلاچات اتبرع ادبح وأوزع. أعدي علي كل بيت أشوف مين فيهم محتاچ وبردو الفلوس ما هتنجصش بالعكس بتزيد عارف ليه يا موسي

موسي..بأبتسامه ليه يا أبوي؟

وهبه….عشان اني واخد عهد بيني وبين نفسي والعهد ده كان شاهد عليه أمك ان المال اللي هيدخل بيتي ليا فيه نصه والنص التاني لله حتي لو كان المبلغ كبير ما جولش خساره التچاره مع الله يا ولدي عمرها ما كانت خساره ابدا

موسي….عشان كده يا ابوي الناس بتحبك بچد

وهبه…حب الناس ده يا موسي نعمه يمكن اني ماهخليش حد محتاچ كيف ما بتجول بس كل فتره إكده لازم تچمع الناس وتاكل معاهم وياكلوا معاك لازمآ تلمهم وتسمعهم تشوف مشاكلهم تبص في وشوشهم وتعرف اذا كانت الضحكه صافيه ولا مخبيه وراها حزن ولما تچمعهم هتلاجي اللي مخاصم حد بيتصالح معاه اللي بجاله كتير الدنيا وخداه وماهيشوفش حد يرچع من تاني ويتلم وسطنا الناس دول عزوه يا موسي لو مليكش عزوه صوح هتبجي عامل كيف ورجة الشچر اللي طالعه علي غصن خايب وضعيف أي شويه هوا يجربوا منيها تطيرها حافظ علي أغصانك يا موسي عشان يطرحولك ورج جوي ما يصيبوش الهوا ولا يوجعه

اني زرعت چدور صلبه وجدرت أخلي أغصانها عفيه خليك ديما واخد بالك منيها

موسي…بأبتسامه كل يوم بتعلم منيك درس چديد يا ابوي

وهبه…واني عارف يا موسي انك كدها وهتجدر تستفاد من الدروس ديه ولما اجابل وچه كريم هبجي مطمن أن چدوري اللي زرعتها عفيه وهتجدر تكمل من بعدي

موسي…ربنا يديك طولت العمر يا أبوي ما تجولش إكده بعد الشر عنيك

وهبه….الموت مش شر يا ولدي الموت علينا حج

موسي…ونعم بالله

وهبه… عايزك يا موسي من بعدي تحافظ علي اللي اني بنيته عارف انك يمكن تكون احسن مني بكتير تفكيرك وحكمتك وذكائك جوتك وطيبه جلبك كل دول يخلوني مطمن لكن واچبي اني افكرك وانصحك

موسي… مافيش حد احسن منيك يا أبوي أنت سيد الناس كلها

وهبه…بحب ربنا يباركلي فيك يا ولدي وصوح فك التكشيره اللي شايفها علي وشك ديه وبلاها يا ولدي الحزن اللي في جلبك بدر هيرچعلك من تاني بدر طيب بس هو واخد علي خاطره شويه اما عطر يا ولدي بكره مش بتاعنا ومحدش عارف هيحصول فيه ايه سيبها علي ربنا واياك تعترض لو ليك نصيب فيها والدنيا مجلوبه فوجاني تحتاني هتاخدها غصب عن الكل بس لومليكش نصيب فيها حتي لو كان كل حاچه باينه انها متسهله بردو مش هتاخدها…سيبها علي ربنا وارمي توكالك عاللي لايغفل ولا ينام ومتعترضش ماشي يا ولدي.

أبتسم موسي بحب وقرب من وهبه باس ايده لكنه أتفاجئ بوهبه شده لحضنه

بكل قوته فضل يطبطب علي ضهره بحب.

أستغرب موسي والده لكن ابتسم وبادله الحضن

 

عدي الوقت بسرعه أبتدت الناس تيجي علي قصر وهبه وفي وجوهم سعاده وفرحه بالتجمع لا توصف وكأنهم بيحضروا فرح او مناسبه سعيده علي قلوبهم.

أمتلأ القصر بأهل البلد من الداخل والخارج والاكل اتحط علي صواني وأبتدا يتوزع علي كل مجموعه من الناس والكل كان في أنتظار الأذان خرج وهبه من القصر بعد ما بدل ملابسه هو وموسي ومهران وسالم.

وهبه…كل سنه وأنتم طيبين چميعا نورتوا الدار

هلل الجميع ورحبوا بوهبه واولاده بحب وأختلفت ترحيبات الناس

كل سنه وحضرتك طيب يا وهبه بيه.

دايما عامر يا وهبه بيه.

ربنا ما يجطلعلك عاده ياوهبه بيه.

رحب وهبه بيهم ورفع ايده حطها علي مكان قلبه كانوع من التحيه الطيبه.

وأخيرا أذنت المغرب وأبتدا الجميع ياكلوا وفضل موسي واخواته يمروا علي الناس يشوفوا ناقصهم أيه ويزودوا الاكل

فالوقت ده في قصر عتمان كانت هنيه هتتجنن مش عارفه تعمل ايه مش معاها رقم موسي عشان تحذره ولا قادره تعرف عطر وخايفه تعرف بدر والاهم ان بخيته مكانتش مدياها فرصه تعمل اي حاجه من طلباتها اللي مبتخلصش كسرت هنيه عدد لا بئس به من الأطباق والأكواب من كتر ماهي متوتره وكالعاده سمعتها بخيته أسوء الكلام والاهانات علي عدم تركيزها لكن مكانش فارق مع هنيه ولا هي مركزه من الأساس في إهانه بخيته كل همها أنها تنقذ موسي واللي جننها أكتر وزاد من خوفها لما شافت حمدان بيتوشوش مع هيبه في حاجه وسابه وخرج خد جزء من الرجاله ومشي.

اما عند سهير كانت في الاوضه بتاعتها مستنياهم ينادوا عليها عشان تفطر وعجبها دور الحامل اللي كانت بتمثله وحبت الراحه والدلع لكن كانت بتفكر ازاي تخرج من كذبتها بطريقه تكسب بيها الكل وأخيرا فكرت وبسرعه كلمت الدايه قالتلها حاجه وقفلت

وبمجرد ما قفلت معاها أبتسمت بشر ونزلت من أوضتها🙄

………

وصل حمدان هو وأتنين من رجالته ووقف بعيد عن القصر كان النهار راح وبيحاول يدور بعينه علي موسي من وسط عدد الناس الكبير. وأخيرا أبتسم بمجرد ما لمح موسي مع أخواته ووالده بيعدوا علي الناس والأبتسامه علي وجوههم

وموسي بيتنقل بين الناس بيضحك مع ده ويطبطب علي ضهر ده ..ضحك الناس وحبهم اللي ظاهر علي ملامحهم بصدق كان مضايق حمدان وابتدا يجز علي أسنانه بغيظ وشد الزناد بعنف وصوبه بأتجاه موسي ومع كل ضغطه كان بيبعد موسي او بيتحرك

وقف موسي مع والده وهريدي وقف معاهم ومن بعيد شايفهم حمدان بيضحكوا مع هريدي ركز البندقيه عليه لما حس أن موسي وقف ثابت وأخيرا أبتسم وضغط عالزناد.

وفاللحظه دي موسي بيهزر مع هريدي خبط والده غصب عنه وقع من ايده عصايته وبمجرد ما وطي يجيبها أرتكزت الطلقه في صدر وهبه..وبمجرد ما ضرب حمدان جري هو ورجالته بسرعه لكن كان باين عليه الغضب.

صريخ وتهليل وصوات حاله من الفزع والهرج وكأن القيامه قامت.رفع موسي وشه بسرعه بصدمه شاف أبوه بين ايدين مهران وسالم والأتنين بيصرخوا بأسمه والكل بيجري خرج حريم البلد علي صوت ضرب النار والاصوات العاليه وفي مقدمتهم چليله اللي صرخت بأسم وهبه وجريت عليه

هي وفرحه وتعالت اصوات الحريم ونواحهم مسكه موسي منهم حضنه وأبتدا جسم وهبه يتقل أعد موسي بيه عالارض وهو لسه في حاله الصدمه مش بينطق ثواني بسيطه عدت لكن مليانه تفاصيل قبل الثواني دي كان الضحك والحب والسعاده ماليين القصر وفجأه وفي ثواني معدوده أتحول القصر لساحه من الهرج والفزع والصريخ والنواح مشاعر موسي كانت متضاربه مش قادر يصدق ازاي كان بيضحك من ثواني والوقت في ايدي غرقان في دمه

موسي…أبوي أبوي رد عليا

چليله…لا ياوهبه اوعاك تعملها وتفارجني

فرحه..بصريخ أبووووي

سالم فضل حاطط ايده علي مكان الدم وهو ضاغط عليه وبيصرخ بأسمه مش قادر يعمل اي حاجه وكأن عقله أتشل ونسي مهنه الطب

وهبه…بأنفاس متقطعه خد بالك من أخواتك يا موسي أني سايبهملك أمانه في رجبتك

موسي…ماهتموتش يا ابوي

وهبه…خلاص يا موسي ساعتي چات ياولدي خلي بالك من ناسك ياولدي

موسي…هچيب الكلب اللي عمل فيك إكده

وهبه…لاه ياولدي بلاش ماعيزش دم ولا عايزك انت وأخواتك تحطوا رچلكم في طريج مالهوش رچوع ما تهدمش اللي بنيته ياموسي أياك والتار ياولدي

موسي….طيب بلاش حديت الله يخليك أعمل حاچه يا سااااالم

ابتدا وهبه يتشاهد ويكرر التشاهد كذا مره..أشهد أن لا إله إلا الله وأشهد أن محمد..رسول الله

موسي..أبوي

چليله..وهبه جوم يا وهبه ما توچعش جلبي عليك يا حبيبي

مهران…ابوي ابوي

فضل موسي يهز فيه ولكن كان فارق وهبه الحياه في لمح البصر وبين أحضان موسي تعالت أصوات الصراخ والعويل وفضل سالم بكل قوته يضغط علي قلبه عشان ينعشه لكن بلا فائده فارق وهبه الحياه

الدنيا أتقلبت والقصر بعد ما كان ساحه من النشاط والسعاده أتحول لحزن كبير

جت الشرطه والاسعاف وتم الكشف عليه للتأكد من الوفاه وابتدا افراد الشرطه يعاينوا الحادثه وسألوا موسي واخواته عن الحادثه

الضابط ..ازاي ومين ممكن يعمل كده

موسي….أنت عارف يا حضرت الظابط أحنا ملناش أعداء ابويا كان محبوب من الكل

الظابط…موسي لو هتعمل إكده عشان تاخد تارك بيدك بلاش تضيع نفسك انت الحج معاك وتجدر تچيب حج وهبه بيه بالجانون بلاش تچيب الحج عليك

سرح موسي واول حد جه في باله كان حمدان

موسي…صدجني يا حضرت الظابط اللي عندي جولته أبوي مالهوش أعداء يمكن طلجه خايبه لكن عداوه مايتهيأليش

الظابط عموما يا موسي الحديت ده مش وجته خلص إچراءات الدفن ووصل وهبه بيه وخلص كل حاچه وبعدين لينا حديت في مكتبي

موسي…ان شاء الله.

في قصر عتمان كان الكل بيفطر هنيه شارده بتلعب في الطبق من غير أكل دخل حمدان في الوقت ده

بخيته…كنت فين يا ولدي كل ده

هيبه…عملت ايه

حمدان…تعالي

راح هيبه وراه وجريت وراهم بخيته وسهير يعرفوا حصل ايه.

هنيه…الحمد لله

هاچر…كلي يا خيتي

هنيه…شبعت الحمد لله هروح أعلج عالشاي لحد ما تخلصوا وكل

مشيت هنيه بسرعه من ادامهم وراحت قربت من المضيفه عشان تسمع كلامهم

…

بخيته…في أيه ياولدي مالك وچاي منين إكده

حمدان…كنت بجتل موسي

سهير….يامري وعملت ايه عاد

بخيته…فرحني يا ولدي صابت ولا خابت

هيبه…ما تتحدت يا حمدان موسي أنجتل

حمدان….كانت هتصيب جلبه بس في اخر لحظه أتحرك وصابت وهبه

ضربت بخيته علي قلبها بكل قوتها يامرررري

هيبه…ليه مركزتش يا حمدان

حمدان….بجولك علي اخر لحظه نفد منيها لساه ليه عمر ابن چليله

بخيته…بخوف وهبه چراله أيه

حمدان….ماعرفش اني طخيته وچريت اني والرچاله

هيبه…يعني مات ولا مماتش

حمدان…بجولك معرفش مشيت جبل ما حد يشوفني بس شكله مات

هيبه…يارب نسمع خبره الوجت

سهير…متزعلش روحك يا حمدان الطلجه اللي ماصابتهوش انهارده تصيبه بكره

هيبه….لساه ليه عمر وكمان نصيب من حزنه علي ابوه

بخيته كانت واقفه مش قادره تنطق نفسها تصرخ تعيط تكسر القصر كان جواها بركان نفسها تطلعه وخصوصا علي حمدان اللي خد روح حبيب عمرها لكن كانت هتقول ايه أو تبرر شعورها بأيه فا أكتفت بالصمت

اما عند هنيه علي اد حزنها علي وهبه لكن كانت فرحانه بنجاة موسي مشيت بسرعه قبل ما حد يشوفها وخرج حمدان وهيبه طلعوا علي عتمان يبلغوه الخبر.

فرح عتمان بغل وحقد وكأن مرضه قسي قلبه أكتر ومتعظش من رقدته.

أنتشر خبر وفاه وهبه بسرعه في البلد كلها ووصل الخبر قصر عتمان.

الفرحه مكانتش سايعه حمدان وهيبه وعتمان

لكن وجعت قلب بخيته وبدر اللي مصدقش انه مات وأول حد شك فيه كان حمدان أخوه لكن أجل اي كلام عشان يقف مع موسي في ظرف زي ده

جري بسرعه بدر راح علي قصر وهبه.

عطر كانت في أوضتها مقفول عليها من اخواتها ممنوع حد يدخلها الشغاله بتطلعلها الاكل ويتقفل عليها تاني كانت متعرفش اي حاجه بتحصل في القصر ولا حاسه باي حد من كتر الضرب

……

وصل بدر قصر وهبه لقي كل اهل البلد اللي واقف بره القصر واللي اعد حاطت ايده علي خده في الجنينه والستات بتصوت وتندب

كان ماشي وسطهم يدور بعينه علي موسي مش لاقيه دخل جوه لقي فاطمه لابسه اسود ودموعها علي خدها

بدر…البجيه في حياتك يا ام عبدالله

فاطمه…حياتك الباجيه يابدر

بدر….فين موسي

فاطمه…فوج في الاوضه مع الكبير

بدر….طيب عايز أشوفه

فاطمه…تعالي معاي

طلعت فاطمه وراح وراها بدر كان موسي واخواته وچليله وفرحه معاه فالاوضه

خبطت فاطمه ودخلت بلغت موسي وخرجت

فاطمه…چاي ورايا يا بدر عن اذنك هروح للحريم تحت

بدر…اتفضلي

مشيت فاطمه ثواني وخرج موسي وبمجرد ما خرج جري عليه بدر من غير ولا كلمه خده في حضنه ولأول مره نزلت دمعه سريعه من عيون موسي بوجع وكأنه كان محتاج صاحبه يقف معاه في وجعه

موسي…أبوي اتجتل يا بدر

فضل بدر يطبطب علي ضهره بقوه شد حيلك يا اخوي أچمد يا موسي ماهينفعش حد يشوفك إكده

موسي…جلبي واچعني يابدر

بدر…سلامت جلبك يا صاحبي بس أصلب طولك أنت بجيت الكبير ماهينفعش حد يشوفك إكده شد حيلك شوي حتي عشان امك وأخواتك

مسح موسي دموعه وبسرعه رجع بقوته من تاني.بص لبدر كنت خايف ما تچيش يا بدر

بدر…وه حديت ايه اللي هتجوله ده أنت متعرفش ابوك عندي أيه ياموسي ولا متعرفش كمان غلاوتك عندي

موسي…ربنا يخليك ليا يا صاحبي

بدر….بترقب مين اللي عملها ياموسي

بصله موسي وسكت شويه

بدر…جول يا موسي مين

موسي….لسه متوكدتش بس لما أتوكد ماهخليهوش يعيش لحظه علي وش الدنيا

بدر…طيب يلا يا صاحبي نخلصوا من إچراءات الدفن وبعدين نشوف الحديت ده بعدين ..

عدي الوقت ببطئ وحزن علي الجميع فالوقت ده خلص موسي كل إجراءات الدفن هو وسالم وبدر

جري بسرعه الوقت وابتدوا يغسلوا وهبه وكان واقف علي غسله مهران وسالم وبدر وهريدي وشيخ المسجد

وغسله موسي بايده كان اللي يشوف موسي بثباته وقوته ونظرة عينه الحاده يقول أن قلبه ميعرفش معني الحزن لكن الحزن الحقيقي كان ساكن قلبه والدموع اللي رفضت تنزلها عينه قلبه نزلها بحور💔

خلص الغسل وودعه الجميع بتقبيله علي جبهته وخرجوا من القصر متوجهين للمسجد لصلاه الجنازه

وكان العزاء مهيب كل رجال وشباب البلد راحوا ورا وهبه يوصلوه لمأواه الأخير وراح معاهم حمدان وهيبه وكأن المثل الشهير ينطبق عليهم يقتلوا القتيل ويمشوا في جنازته..اما نساء البلد فضلوا في القصر بيواسوا چليله وحضرت الندابه فالوقت ده وتعالت أصوات الصراخ والنواح والتعديد

الندابه..(يا نايحة نوحي عليه نوحي كبيرنا اتمدد على اللوحي زجزج يا عصفور وإزعج يا غراب كبيرنا مجتول ومرمي في الخراب)

چليله…بوجع يا عمود بيتي والعمود هدوه يا هل ترى في بيت مين نصبوه؟ يا عمود بيتي والعمود رخام يا هل ترى في بيت مين اتجام

فضلوا نساء البلد يصوتوا ويلطموا كا نوع من أنواع المجامله

…….

أدفن وهبه وسط حزن كبير من الجميع طول الوقت موسي عينه علي حمدان من بعيد وحمدان كل شويه يبعد عينه وبيحاول يمثل الحزن

وقبل معاد الرحيل أعلن موسي بصوت جهوري أن العزاء هيكون بعد صلاه العشاء أستغرب الجميع ان موسي هياخد العزاء في وهبه بعد ما اتقتل ومن عادات الصعايده ان المقتول ما بيتاخدش فيه عزاء غير لما ياخدوا بتاره فالوقت ده الظباط اللي حضروا الدفنه أقتنعوا بكلام موسي ان قتل ابوه مش مقصود وانه ملهوش اعداء أرتاحوا جدا بعد أعلان معاد العزاء كانوا قلقانين من بحر الدم اللي عاملين حسابه بعد قتل وهبه

اما عند حمدان وهيبه فا فرحتهم مكانتش تقل عن فرحه الظباط وأطمنوا ان موسي ما شكش فيهم وده اللي كان موسي عايزه قدر يلعبها بذكاء عشان لما يردهالهم تبعد الشبهه عنه وعن اخواته.

جري الوقت بسرعه وأتقام أكبر عزاء في البلد حضره الكثير من اهل البلد ناس بتخرج وناس تدخل كل خمس دقايق المقرئ يوقف القرأن عشان يقدروا يستقبلوا الاعداد الوفيره من البلد وجميع البلاد المجاوره

كان يوم مرهق علي الجميع خصوصا موسي واخواته وبدر اللي ماسابوش لحظه

أبتدت الناس تمشي ويسلموا علي موسي ويعزوه وجه الدور علي حمدان وهيبه

حمدان….البجيه في حياتك يا موسي بيه

بصله موسي شويه حياتك الباجيه يا حمدان

هيبه…أن شالله تكون أخر الأحزان

موسي….بعد الكبير ميتهيأليش في حد هيشوف فرح يا هيبه

هيبه بص لحمدان بقلق من رد موسي…متجولش إكده أن شاء الله ربنا يصبركم

موسي….لو عالصبر معنديش أكتر منيه يا هيبه أصل اللي يصبر ينول واني صابر عشان جريب هنول

بص حمدان وهيبه لبعض بترقب وقلق وبعدوا من قدامه علي طول

فضل موسي يسلم علي باقي الناس وعينه علي حمدان من بعيد شايفه ماشي هو وهيبه وباين عليهم التوتر

بدر…بحزن شاكك في مين فيهم يا موسي

بصله موسي بأستغراب من سؤاله

بدر…متستغربش

موسي..هتفرج معاك يا صاحبي

بدر …لاه ماهتفرجش اني عارف ان التنين يعملوها.

موسي…كيف ماجولت التنين يعملوها

بدر….ناوي علي ايه ياصاحبي ومتستغربش سؤالي ده كمان أصل اني خابرك زين ومش معني أنك عملت عزاء فا انت مش هتاخد تار ابوك ولو الكل صدجك يا صاحبي اني لاه

موسي…أطلع منيها يابدر انت بالذات.

بدر…ليه ياموسي

موسي…جولي يا بدر لو أنت مكاني وأبوك أنجتل وعرفت مين اللي جتله هتعمل ايه عاد

بدر…هاخد تاره

موسي….واني هعمل كيف ما انت كنت هتعمل هاخد تار ابوي اللي أنجتل غدر يا بدر

بصله بدر بحزن وسكت

عدي الوقت بسرعه وبعد يوم مرهق رجع موسي علي القصر

كانت چليله وفاطمه وفرحه أعدين لابسين أسود وحاطين أيدهم علي خدهم ودموعهم ما نشفتش والناس مشيت من حواليهم .

دخل موسي باس راس چليله وأيدها

وباس راس فرحه وطبطب عليها وراح أعد جمب أمه

موسي…شدي حيلك يا اما

چليله…أبوك راح يا موسي وفاتني

موسي…كام يوم وحجه هيرچع يا ست الدار

چليله بفزع…لاه يا موسي أوعاك يا ولدي أبوس يدك أني مش حمل فراج حد فيكم تاني

موسي…أسيب حج ابوي يا أما كيف؟

مهران…حج أبوي.هيرچع وتاره هيتاخد

چليله…أسكت يا مهران مليكش صالح بالحديت ده واللي جولته هيتنفذ

موسي…لا يا چليله الكبير حجه ما هيضيعش واني عارف مين اللي ممكن يكون عملها

چليله….حتي لو عارف أبوس يدك بلاها السكه دي ياولدي ابوك وصاك يا موسي جبل ما روحه تفارجه السكه دي واعره يا ولدي ماعيزينش ندخلوها تاني أبوس يدك يا موسي بلاش زمان ياولدي دخلنا السكه دي غصب عنينا ورچلينا چات فيها بالغلط واللي راحوا يا ولدي من عندينا كلهم كانوا غاليين علينا سنين عدت علينا كانت كيف الحرب اللي ماهتخلوصش كيف الكابوس اللي ماعرفينش نصحي منيه

ماترچعناش للأيام دي تاني جلبي مش هيستحمل فوراج حد منيكم يا ولدي هموت فيها يا موسي كفايه عليا وچع جلبي علي أبوك

باس موسي راسها ومسح دموعها وحدي الله يا چليله ومتخافيش هعمل إللي إنتي عيزاه

چليله…جلبي مش مصدجك يا موسي وخابره أنك هتعمل اللي في راسك

موسي…لاه يا أما أطمني بصتله چليله بشك لكن مكانش في حاجه في أيدها غير أنها تصدقه..

عدي كذا يوم وفي خلال الايام دي كان كل يوم نساء البلد يروحوا عالقصر لمده ثلاث أيام متواصله ويتعاد المشهد من جديد صوات وندب وتعديد وكأن الميت لسه مقتول.

…….

اما عند بخيته فا من يوم ما وهبه مات وهي في حاله حزن وصمت الكل كان مستغربها لكن كانت بتقول انها تعبانه وحزينه علي رقدت عتمان..

عرفت عطر بموت وهبه من بدر حزنت وفضلت تعيط كتير كان نفسها تشوف موسي عارفه أنه أكيد حزين لكن ما باليد حيله محبوسه في أوضتها ومعهاش موبايل وممنوع حد يدخلها كانت حاسه ان الموت ليها أهون من حبستها وعذابها.

……..

في غرفه سهير كانت راحه جايه تفكر ازاي تخلص من كذبتها وأزاي هتنفذ فكرتها الشيطانيه فقررت انها تنفذ عشان تخرج من الكذبه دي وبالطريقه اللي هي عيزاها وبمجرد ما سمعت صوت هنيه بره هي وهاجر خرجت

بصت سهير من بعيد لقتهم واقفين ينادوا علي عطر ويطمنوا عليها فقررت ان هو ده الوقت المناسب خصوصا انها معرفه الدايه بكل حاجه.

هنيه….ردي عليا يا عطر صوتك وحشني يا خيتي

هاچر…هنفضلوا سايبينها إكده

هنيه…بجولك أيه بدر مش معاه مفتاح الباب ده

هاچر…لاه المفتاح مع حمدان

هنيه…طيب بجولك ايه اني بفكر اچيب أي حاچه نفتحوا بيها الباب ده وندخلوا نطمن عليها واللي يوحصل يوحصل

هاچر…لاه يا هنيه هيبه ما هيسكتش وهيطين عيشتك

سهير…بتعملوا ايه عنديكم

هاچر…هااا لاه ما هنعملش

سهير…عايزين تكسروا الباب وتكسروا كلام حمدان وهيبه

هاچر…وطي صوتك أبوس يدك وتعالي نبعدوا من إهنه أحسن هيبه وحمدان يصحوا ويسمعوا شدتها هاچر بعيد عن الاوض ووقفوا قرب السلم

سهير…ولما أنتوا بتخافوا إكده كيف عايزين تكسروا كلمتهم وأنتي يا ست هنيه عامله فيها زعيمه عصابه ما خيفاش أجول لحمدان ولا هيبه چوزك لو عرف هيجتلك ويخلصنا منك

هنيه…بغضب لاه مخيفاش اللي معاه ربنا ما هيخافش يا سهير خافي انتي ربنا البت چوه بتموت وانتوا معندكوش رحمه

سهير….هتجولي ايه يابت مين دول اللي ماهيخافوش ربنا انتي عايزه تتربي باين عليكي قربت منها سهير مسكتها من راسها بعنف وفضلت تضرب فيها وهنيه تحاول تبعدها وهاجر تفصل بينهم وخايفه صوتهم يعلي أكتر واللي في البيت يحسوا فضلت سهير تشد فيها وتحاول تقرب من السلم ابتدت هنيه تدفعها عشان تبعدها عنها وفجأه وقعت سهير نفسها من السلم

صرخت هاچر وهنيه وخرج علي صواتهم كل اللي في القصر

بخيته…يامري ألحج مرتك يا حمدان

جري حمدان وهيبه وبدر علي سهير كان في كدمات ودم في وشها من اثر الوقعه العنيفه اللي كانت قصداها

حمدان….حوصل ايه سهير ردي عليا فيكي ايه

وقفت هاجر وهنيه بصدمه هما متأكدين ان محدش فيهم وقعها

سهير…ألحجني يا حمدان هنيه زجتني من عالسلم

اتصدم الكل

هنيه…لاه ماحصلش هي اللي وجعت والله

بخيته….حوصل ايه ياسهير

سهير….شوفتها بتحاول تكسر الباب عشان تطلع عطر وتهربها لما منعتها أتهچمت عليا ووجعتني من عالسلم ألحجني ياحمدان في حاچه هتنزل مني بيني بسجط

بخيته…ضربت علي صدرها يامري أچري يا حمدان هات الدايه بسرعه

هيبه…بغضب اه يا بنت الكلب هجتلك بيدي عايزه تهربي عطر وتحطي راسنا فالطين راح عليها بكل غضب وفضل يضرب فيها

هنيه…والله ماحوصل يا هيبه

جري بدر فضل يشد في أخوه

هيبه….والله لا هجتلك

هاچر…صدجني يا هيبه هنيه ما عملتش إكده أحنا كنا بنادي علي عطر عشان نتوكد انها كويسه وكنا عابزين ندخل نطمنوا عليها لكن والله هنيه ما كنتش هتهربها

بخيته…وسهير هتكدب ليه ومين اللي وجعها مش هي

هاچر…والله يا حماتي سهير اللي بدأت وأتهچمت علي هنيه هنيه كانت بتحاول تبعدها عنيها لكن ما وجعتهاش

هيبه..أدعي ربنا العيل ما ينزلش عشان لو نزل هجتلك بيدي

عدي وقت بسيط وجه حمدان بالدايه شال حمدان سهير وطلعها علي الاوضه ودخلت معاها الدايه وبعد وقت بسيط خلصت كشف عليها كان الكل بره وهنيه واقفه مرعوبه

خرجت الدايه مع بخيته

الدايه…ربنا يعوض عليك يا حمدان بيه

بخيته…موتي الواد يا بنت الكلب

حمدان…مرتك جتلت ولدي ياهيبه

راح…هيبه بكل عنف فضل يضرب فيها هو وبخيته

مسكها من شعرها وصوت صراخها جايب القصر كله ومحدش عارف يخلصها من ايده شدها علي الاوضه وقفلت بخيته عليه الباب وقفت سندت عالباب بايدها الاتنين عشان تمنع اي حد من الدخول انه يحوشها

فضل هيبه يضرب وهي تصرخ

هاچر…بدموع بدر اعمل حاچه ابوس يدك والله هنيه ما عملت اي حاچه أبوس يدك يا حماتي حوشيها من يده

بدر….يا اما اللي بيوحصل ده ماهينفعش حرام هنيه ماهتعملش إكده

بدر….بتعوم علي عوم مرتك سيبه يجتلها😡

…..في غرفه حمدان

سهير…بدموع هنيه موتت ولدي يا حمدان

حمدان….اني هخلي هيبه يرمي عليها اليمين وإلا ميبجاش ولد أبوي

سهير…واني هستفاد ايه لما يطلجها دي هتفرح دي لازما تتعذب وتعيش إهنه كيف الخدامه وتحت رحمتي

حمدان…هيوحصل اللي انتي رايداه بس هدي حالك وبلاش بكا عاد.

سهير….بتمثيل ودموع كان نفسي أچيبلك الواد الرابع يا حمدان

حمدان….هنچيبه تاني يا سهير انتي بس تجومي بألف سلامه وتشدي حيلك..

……

عدي حوالي 3 ايام هيبه كان حابس هنيه ورايح جاي يضرب فيها

زاد كره بخيته لهنيه وده كان مفرح سهير الكل اتعاطف معاها وقدرت تخرج من كذبتها وتكرههم في هنيه عشان ميبقاش في غيرها هي وبس.

في قصر وهبه..

خرج موسي من القصر لقي فرحه واقفه وحزن الدنيا في عينها قرب منها

موسي…واجفه ليه إكده يا فرحه

فرحه….مفيش يا أخوي جولت انزل أشم هوا الدار بجت توخنج وكل شبر فيه حزين

موسي….عايزك تركزي في دراستك يا فرحه

فرحه…بدموع مش جادره يا موسي أتوحشت أبوي جوي وحزينه علي امي حساها هتتچنن عشانه

موسي….خابر يا فرحه أمك بتحاول تبان جويه لكن اني عارف الحزن اللي في جلبها عشان إكده عايزك انتي كمان تجوي شوي وتحاولي تخرچيها من حزنها

فرحه…هي حابسه حالها ديما في الاوضه ولو خرچت بتفضل شارده معرفاش أعملها أيه.

موسي….الچرح لساه ماطابش يا فرحه لساته بينزف ربنا يصبرنا كلنا

فرحه…صحيح يا موسي حمدان الهواري اللي عملها

موسي…ملكيش صالح بالحديت ده يا فرحه اني عايزك بس تركزي في مستجبلك عشان تريحي أبوكي في تربته

فرحه…حاضر يا أخوي

موسي…اني خارچ رايح لحد الارض هخلص شويه شغل وانتي خلي بالك علي امك ولو حوصل اي حاچه بلغيني

فرحه…حاضر ..موسي

موسي…نعم يافرحه

فرحه…دير بالك علي روحك الله يخليك مبجاش لينا كبير غيرك يا أخوي

خدها موسي في حضنه وفضل يطبطب عليها ومشي عالارض.

……..

في قصر عتمان

كان الكل متجمع في ساحه القصر دخل حمدان عليهم

هيبه…كنت فين كل ده

حمدان…كنت مع رضوان ولد

عاشور

هيبه…ليه؟

حمدان…طالب يد عطر واني وافجت

بدر….كيف يعني وافجت

حمدان…كيف الناس جولتله موافج ايه عنديك أعتراض؟

بدر…ايوه عندي ومش هجولك ياسيدي تاخد رأي عطر بس هجولك تاخد رأي ابوك.

بص حمدان لابوه اللي اعد علي كرسي متحرك .

حمدان…وماله يابدر بيه أيه جولك يا أبوي موافج؟

هز عتمان راسه بالموافقه

حمدان..بأبتسامه أستفزاز أهه ابوك موافج

بدر..بصدمه ابوي كيف توافج علي رضوان حرام يا مش ده الراچل اللي عكر تستاهله وهي ماريداهوش

هيبه….رايده صاحبك اللي أستغفلك صوح؟

بدر..اني ماهردش عليك ياهيبه بس متنسوش ان عطر أختكم كيف يعني ترموها الرميه دي رضوان متچوز بدل الواحده تنين وعنديه عيال طول عطر

بخيته…وماله توبجي التالته رضوان من عيله وعيلته كبيره وعالأجل نخلصوا من جرست أختك

بدر….يا أما حرام عليكي دي بتك الوحيده

بخيته…حرمت عليها عيشتها

حمدان…أظن الرد وصلك يا بدر بيه اني جولت لرضوان كتب الكتاب بعد سبوع هيكون تاني يوم العيد

بدر…بصله بغضب وقام وقف وسابهم وخرج.

هيبه…سيبك منيه المهم لازما الكل يعرف بچواز عطر من رضوان وأولهم موسي

حمدان…هيحوصل أنهارده بكره رضوان هياچي يجرا فتحتها وچيبلها شبكتها ومهرها و كل البلد هتعرف وهنعملولها فرح تتحاكي عليه كل النچوع.

بخيته..لاه يا ولدي فرح ايه عاد ووهبه لساته مكملش سبوع سكتت شويه أجصد يعني الناس تاكل وشنا ويشكوا فينا ان احنا اللي ورا جتله

هيبه….خلي حد يفتح خاشمه هكون طاخه عيارين

حمدان…كيف ما هيبه جالك يا اما اللي يجدر يتحدت يورينا حاله قام وقف بجول ايه اني طالع أبلغ ست الحسن والچمال بفرحها

طلع حمدان عشان يبلغ عطر

و خرج بدر بكل غضب وهو قاصد أرض موسي🙆‍♀️🙆‍♀️🙆‍♀️😳أ

الحلقة 5 

.

.

ست الدار

رواية ست الدار الحلقة الخامسة

خرج بدر بكل غضب وهو قاصد أرض موسي…وطول الطريق حاسس ان في بركان بيفور جواه عايز يساعد عطر وموسي بأي طريقه حتي لو هيأذي نفسه ومع كل خطوه كان بيتردد كلام عطر في ودنه…….فلاش باك.

بقلمي ………………أميره أسامه

بدر….هات مفتاح اوضه عطر يا حمدان.

حمدان..وهو حاطط رجل علي رجل ببرود ليه؟

بدر…هو ايه اللي ليه ممنوع أشوف خيتي

حمدان…أيوه ممنوع اني جولت محدش يدخل عنديها وتفضل كيف الكلبه إكده محدش يدخلها.

بدر…اللهم طولك يا روح هات يا حمدان وأغزي الشيطان ماعيزش كل شويه أتعارك أني وانت علي حديت فارغ محناش عيال صغيره عايز أطل عليها أحسن يچرالها حاچه

حمدان…يبجي ربنا بيحبنا عموما ماشي يابدر بس متعوجش عنديها وتخلص وتديني المفتاح

بدر….ماشي يا حمدان بيه.

خد بدر المفتاح وطلع لعطر لقاها نايمه علي جمبها وسانده راسها علي المخده ودموعها نازله وكل وشها أزرق ومليان كدمات.

دخل واعد أدامها علي الكرسي..كيفك ياعطر.

قامت عطر بمجرد ما شافته أتعدلت بتعب وارهاق واضح وفضلت حاطه وشها فالارض مكسوفه منه.

عطر…الحمد لله يا خوي

بدر…أرفعي وشك ياعطر متنزليش راسك أبدا.

عطر…بدموع لساك غضبان مني يابدر.

بدر…ايوه يا عطر مش عشان بس اللي عملتيه بس عشان خبيتي عليا طول عمري كنت أجرب واحد ليكي وبتحكيلي علي اي حاچه چواكي

عطر…مكنتش أجدر يابدر أجولك

بدر…عشان شايفه ان اللي عملتيه غلط ولا عشان موسي صاحب عمري

 

 

عطر….لاه عشان موسي صاحبك يابدر ومكنتش عيزاك تزعل وياه واهه اللي عملت حسابه لجيته وعارفه أنك مضايج من موسي ومش بعيد تخسروا بعض عشاني

بدر…لاه ياعطر تبجي غلطانه اني عمري ما أخسر موسي مش بس عشان صاحب عمري لكن عشان هو أخوي اللي عمري ما أحتاچته وملاجتهوش واجف في ضهري عمري ماحسيت أني غريب عنيه طول عمري بحس بالغربه وسط أخواتك وبلاجي نفسي لما أكون مع موسي حچات كتير جوي ياعطر لو جعدت أجولك عليها هتعرفي ليه ما أجدرش أخسره لكن زعلي منيه كيف زعلي منيكي أنتوا التنين خبيتوا عليا يا عطر

عطر…هو خاف يخسرك واني مكانش عندي الشچاعه أني أجولك والاهم يا بدر اني كنت خايفه عادتنا بتحكم ان البت تتچوز من الهواره عكسكم انتوا الرچاله يابدر تتچوزوا من اي بنته وموسي مش من الهواره كنت خايفه متوافجوش

بدر…يمكن اللي بتجوليه صوح والبت بتتچوز من الهواره مش من أي عيله تانيه بس كان هيكون ليها حل عموما خلاص اللي حوصل حوصل ياعطر وكل الحديت اللي هتجوليه ده ماهيمنعش أنكم غلطوا

عطر…بدموع غلطنا ليه يا أخوي عشان حبينا بعض عشان جلوبنا أختارت بعض لو مكنتش اعرف انت بتحب هاچر كد أيه كنت جولت أنك متعرفش حاچه عن الحب اني معملتش حاچه غلط يا بدر معملتش حاچه تكسرك انت او اخواتك حافظت علي شرفي وشرفكم صدجني يا بدر اني كل اللي عملته اني حبيت فتحت عيوني عالدنيا لجيتني بحبه عارف يا بدر مشكلتنا الوحيده هي أيه العادات والتجاليد اللي اتربينا عليها البت ما ينفعش تحب والراچل مسموحله يعمل أي حاچه فالاخر بيتجال أصله راچل لو الحب حرام يا بدر مكنش ربنا زرعه في جلوبنا هيبجي حرام لو تخطينا حدود دينا لكن احنا ممسيناش الحدود ديه حبينا بس والله حبينا بس.. لكن كيف احب وكيف أختار الراچل اللي يكمل معاي حياتي المفروض أبجي كيف البهيمه المنساجه أنفذ وبس وكل ده ليه عشان العادات والناس ملعون ابو الناس اللي تخليني اعيش مع راچل جلبي رافضه ليه ينجال عني خاطيه وليه ينجال عليا فاچره عشان حبيت يابدر

بدر….بحزن حس انه مش عارف يقول اي كلمه

عطر…بدموع رد عليا يا أخوي ايه الغلط الواعر اللي عملته عشان يحصول فيا كل ده هاچر لما كانت بتحبك من زمان كانت خاطيه يابدر كانت فاچره حط روحك مكاني يابدر جولي اني غلطانه وشاور بيدك عالغلط

بدر…بأبتسامه حزن انتي ست البنات يا عطر وجطع لسان اي حد يمسك بكلمه اني هفضل وياكي انتي وموسي أطمني هعمل اي حاچه عشان تفضلوا مع بعض صدجيني.قام بدر وقف عشان يخرج

ابتسمت عطر من بين دموعها..بدر

بدر…بصلها نعم

عطر…متجساش علي موسي موسي بيحبك جوي أكتر بكتير ما هو بيحبني لما سألت موسي في مره لو حبنا لبعض هيأثر علي علاجتك ببدر واضطريت أنك تختار بينا هتختار مين…جالي انتي حبيبتي بس بدر روحي واني مجدرش أستغني عن روحي.

أبتسم بدر وسابها وخرج.

بقلمي ………………..أميره أسامه

بااااااااااااك

وصل بدر ارض موسي

لقاه اعد شارد وباصص عالزرع بحزن وهريدي اعد عالارض معاه خشبه بيحفر بيها فالارض..

بدر..موسي

موسي…تعالي يابدر أجعد

بدر…بغضب مش وجت جاعده جولي لساك عايز تتچوز عطر.

بصله موسي بصدمه .

بدر…هتبحلج فيا كتير لييه جول اه ولا لأ

موسي…طيب فهمني في ايه

بدر….حمدان چايب لعطر عريس رضوان ولد عاشور وأتفج معاه فرحهم يبجي تاني يوم العيد

صدمه كبيره حلت علي موسي.

 

 

 

بدر….لاه مش وجت صدمات وحيات أبوك مفيش وجت

موسي…عايزني أعمل ايه يا بدر

بدر….تكتب علي عطر انهارده او بكره بالكتير عطر مارفضتكش يا موسي حمدان عرف ان عطر جابلتك أهنه في ارضك

نزل موسي عينه بعيد عن بدر بأحراج..

بدر …وهو اللي رفض وجالك إكده عشان عارف أنك متجدرش تجوله انه كداب حبسها وضربها وخد منيها المحمول لما شاف رجمك عنديها ومن يومها وهو حابسها يا موسي

موسي بحزن حجك عليا يا صاحبي

بدر…مالهوش عازه الحديت ده الوجت خلينا في اللي بجولك عليه

موسي…واني في يدي ايه يا بدر لو روحت بردو هيرفضوا

بدر…عارف عشان إكده أني چايلك اني موافج تتچوز عطر يا موسي ههربها وتكتب عليها واني هبجي وكيلها ووجتها محدش فيهم هيجدر يتكلم

موسي…اخواتك ماهيسكتوش يا بدر

بدر…متخافش عليا المهم الوجت نلحجوا عطر

موسي…بس ابويا لساته ميت يا بدر

بدر…عارف يا موسي بس مفيش حاچه في يدنا فكر يا صاحبي ولو موافج هننفذوا

ههرب عطر بكره وهبلغك جبلها تكون چايب المأذوون عنديك وتكتب عليها ولما تبجي مرتك محدش هيجدر ينطج

بعد وقت من الكلام مشي بدر وسابه في دوامه تفكيره

………

فالوقت ده بلغ حمدان عطر بجوازها من مهران لكن اللي أستغربوه أنها وافقت

عطر…موافجه يا أخوي بس الله يخليكم كفايه ضرب فيا وكفايه حابسه عايزه اشوف ابوي

حمدان…بابتسامه اهو إكده تعچبيني واني موافج يا عطر أخرچك كمان عشان تچهزي وتلحجي تداري الضرب اللي في وشك ده

…..

خلال ساعات كان كل البلد عرفوا بخبر جواز عطر. موسي كان هيتجنن وخايف اتفاقه مع بدر ميكملش وخايف علي بدر من الخطوه دي خصوصا بعد ما البلد كلها عرفت انها هتتجوز من رضوان طيب لو هربها وجوزهاله هيبقي في نظر اخوهم فضحهم اكتر كان حاسس ان دماغه هتتشل من كتر التفكير.

…..

 

 

اما في قصر عتمان كان بدر هيتجنن من موافقه عطر بعد ما اخبرته بنفسها من موافقتها أدامهم

فالوقت ده قدرت عطرت تفهم هاچر بخطتها أنها تهرب وتروح لموسي وان موافقتها علي الجواز كانت عشان بس يخرجوها وتقدر تروحله فالبدايه كانت هاجر خايفه لكن قدرت تساعدها وتأمن خروجها ومن غير ما عطر تحس بوظت كل حاجه اتفق عليها بدر وموسي عشان مصارحتش بدر بخطتها.. فضلت عطر تجري بكل قوتها لحد ما وصلت قصر موسي قالت للغفير انها عايزه تقابله وصلها لحد جوه

كان موسي اعد مع أخواته وأمه بيقولهم اللي حصل بينه وبين بدر

الغفير…موسي بيه ست عطر بنت عتمان بيه الهواري عايزه تجابلك

وقف موسي بصدمه متخيلش سرعه تنفيذ بدر . وحلت الصدمه عليهم كلهم لما دخلت عطر بمنظرها ووشها اللي مش باين ملامحه من الضرب

جريت عليه عطر.

موسي…عطر؟!😳

عطر…الحجني يا موسي اخواتي عايزين يچوزوني لرضوان بعد سبوع أعمل حاچه ابوس يدك اني جولتلهم اني موافجه عشان يخرچوني وأعرف أچيلك

چليله…هربتي ياعطر..

عطر…بدموع مكانش فيدي حل تاني ياخاله چليله أبوس يدك ساعديني ووافجي

چليله…اوافج علي ايه يا عطر اللي بتعمليه ده هيجوم الدنيا ماهيجعدهاش أخواتك لو عرفوا انك خرچتي وجيتي أهنه هيجتلوكي

موسي…بدر اللي خرچك يا عطر

عطر…لاه بدر ما يعرفش اني هربت

بصلها موسي بصدمه وحس انها بوظت كل حاجه بعملتها الغبيه..

موسي…بعصبيه انتي أتچنيتي كيف تعملي إكده ضيعتي كل حاچه ياعطر

عطر…تجصد ايه عايز تهملني ياموسي

موسي…بعصبيه مفرطه أهملك ايه وهباب ايه دماغك دي بتفكر كيف انتي بعملتك المهببه دي ضيعتي كل حاچه اتفجت عليها اني وبدر ..بدر اخوكي كان متفج معاي يهربك بكره واكتب عليكي تجدري تجوليلي بعد عملتك دي هننفذ كيف لو عرفوا انك مش فالجصر الوجت هيعملوا فيكي ايه

عطر…بصدمه بس بدر مجاليش حاچه

موسي…عشان هو لسه جايلي من كام ساعه

سالم…أهدي يا موسي براحه عليها يا أخوي مش شايف حالتها كيف

موسي…بعصبيه أهدي كيف انت واعي للي هي هببته دي كانت اخر فرصه ليها وليا يا سالم ضيعتها بغبائها الوجت اخواتها يعرفوا ومش بعيد ياچو الوجت ويلاجوها إهنه وهيبجي حجهم اي حاچه يعملوها.

چليله…بالهداوه يا ولدي يبجي عطر تروح بسرعه جبل ما حد ياخد باله انها هربت

عطر…بدموع قهر وذل طيب جولولي اعمل ايه واني هعمله نوريني ياخاله ابوس يدك واني والله هنفذ اللي هتجولوا عليه وكملت بضياع عايزني أعمل أيه ياموسي.

قرب منها موسي بحزن علي حالتها والذل اللي شايفها فيه وهي بتتحايل عليهم يقولولها حل

موسي…لاه ياعطر بلاش توچعيني إكده كفايه الوچع اللي چوه جلبي ماجدرش أشوفك مكسوره أرفعي راسك متعودتش أشوفها محنيه

عطر….بدموع متهملنيش يا موسي اهلي رافضين واني مفيش في يدي حاچه اوعاك تهملني ليهم

چليله…روحي ياعطر يابتي الوجت جبل ما يعرفوا انك هربتي ويجتلوكي

عطر…بدموع ولو رچعت الوجت هيجتلوني ياخاله چليله

موسي..أرچعي ياعطر جبل ما حد يشوفك او يحس انك خرچتي واني وبدر هنتصرف

عطر..بدموع حاضر هروح بس ابوس يدك ياخاله متسبينيش أبوس يدك ياموسي أعمل حاچه لو بجيت لراچل غيرك هموت روحي

موسي…بحزن أطمني يا عطر بس يلا عاد أمشي ونده بعلو صوته…هريدي واد يا هريدي

دخل هريدي جري.

هريدي…أيوه يا موسي بيه

موسي….تمشي من بعيد ورا عطر لحد ما تتوكد انها دخلت الجصر متهملهاش لحالها

هريدي..حاضر ياموسي بيه

خرجت عطر بسرعه من القصر..وهريدي وراها

بقلمي …………….أميره أسامه

 

 

 

 

أعد موسي بحزن وحمل الدنيا كله فوق كتافه.

راحت چليله أعدت جمبه وحطت ايدها علي ضهره مش هتحدت معاك في حاچه ياولدي بس اللي هيحصول ده غلط ياولدي حمدان وهيبه ما هيسكتوش وبدر اول واحد هيطوله شرهم فكر ياموسي زين أنت طول عمرك عجلك يوزن بلد

بصلها موسي بحزن واللي بيحصول فينا ده يا أما مش حرام عيزاني أهمل عطر لراچل تاني

چليله…مجولتش إكده بس كمان اني أم وخايفه عليك انت فاكر ان عطر لو بجت مرتك حمدان وهيبه هيرضوا بالامر الواجع ويسكتوا لاه ياولدي ده وجتها الدم هيبجي للركب.فكر يا موسي زين

بصلها موسي بتفكير وأستأذن وطلع علي اوضته.

…..

فضلت عطر تمشي بسرعه عشان توصل القصر قبل ما حد يحس بيها ولسوء حظها لمحها هيبه وهي بتمد بسرعه من ناحيه قصر موسي وهريدي وراها.. فضل هيبه ماشي وراها من بعيد لحد ما دخلت القصر فالوقت ده كان هيبه بلغ حمدان فالموبايل واتأكد حمدان أنها فعلا مش فالقصر وبمجرد ما دخلت القصر.

مسكها حمدان وجه من وراها هيبه ومسكوها من شعرها جروها لحد ما طلعوها الاوضه وقتلوها من الضرب حاول بدر يدخل لكن قفلوا الاوضه ومقدرش يدخل

هيبه…بتروحي برچليكي عنديه يافاچره اني هجتلك وهجتله

حمدان…بتجولي موافجه عشان اخرچك وتهربي يا فاچره

عطر…موسي مالهوش ذنب اني اللي روحتله عشان يلحجني وهو اللي جالي أرچع ورفض

حمدان…كمان هو اللي رفضك يا خاطيه

فضلوا يضربوا فيها وقرروا انهم يحبسوها لحد معاد فرحها.

فالوقت ده بدر فقد الامل انه يقدر يساعدهم بعد ما عطر بوظت كل حاجه بغبائها مره تانيه

….

عدي يومين تاني والحال كما هو عليه راحله بدر في القصر وحكاله عاللي حصل هو وچليله وأخواته فالوقت ده حس موسي ان عطر راحت منه للأبد.سابهم موسي وطلع علي الدور بتاعه اللي فيه أوضته وبمجرد ما طلع كسر موسي ڤازه طويله في ممر الاوض

أتفزع الكل من الصوت

وقبل ما يطلع مهران وسالم وبدر ليه منعتهم چليله.

چليله..بدموع لاه ماحدش فيكم يطلع هملوه لحاله موسي ولدي جلبه بيتجطع ومعيزاش حد فيكم يشوفه في حالته ديه وقف الجميع وطلعت چليله وكان كل اللي همها ان محدش يشوف موسي في حالته دي ومش حابه حد يشوف ضعفه حتي لو كان الحد ده أخواته وصاحب عمره..

فضل موسي يكسر اي حاجه يقابلها وكأن البركان اللي بيحاول يهديه ثار وعلي وشك الأنفجار

دخل أوضته ودخلت وراه چليله من غير ولا كلمه وقفت دموعها علي خدها وهي شيفاه بينهار أدامها.

موسي…ليه يا چليله بيحصول فيا إكده ليه عطر تروح مني عشان ايه عشان كره وحجد عشان تار حوصل زمان ملناش ذنب فيه جوليلي يا چليله كان المفروض أعمل ايه لما عطر چاتني أمبارح كنت وافجتها وأتچوزتها ولا اللي عملته صوح عشان اني الكبير وماهينفعش الكبير يغلط جدام الخلج الكبير لازمآ يكون حكيم وبيفكر صوح الكبير لازمآ يلغي الحب من جلبه ويفكر بعجله الكبير لازمآ يتخلي عن البني ادمه اللي جلبه أختارها بسهوله ويشوفها في حضن راچل تاني وهو المفروض يبجي هادي ثابت ماهيتهزش الكبير المفروض يعمل حساب الناس والعادات والتجاليد ويدوس بالچزمه علي البني ادمه اللي وجعت في عرضه وطلبت مساعدته وهو رفض يمدلها يده جدرت أساعد كل الناس لكن اكتر حد جلبي حبه وطلب مساعدتي مجدرتش أجف معاه وكل ده ليه عشان اني الكبير اللي ماهينفعش يغلط.ملعون ابو الناس ملعون ابو الكبير ملعون ابو العادات والتجاليد ملعون ابو التار اللي الكل بيدفع تمنه من غير اي ذنب.

قربت منه چليله وهي دموعها نازله شدته لحضنها عشان تحاول تهدي الثوران اللي هو فيه..

……..

 

 

 

 

بعد الحاله اللي موسي وصلها وبعد شحنت الغضب اللي طلعت أدام چليله رجع تاني موسي زي ما كان قوي وثابت وتخلي عن حالت الضعف لكن دخل في حاله حزن وكان تقريبا مش بيتكلم مع حد غير بسيط ويا أما في الارض او فالاوضه بتاعته حاولت چليله تكلمه كتير لكن حزنه كان أكبر من اي طبطبه تقدمهاله چليله.

…….

في غرفه هيبه دخل عشان يلبس ويخرج يسهر كالعاده كانت هنيه اعده شارده ومش معاه وطول الوقت اللي فات كانت بتتعامل اسوء معامله بسبب سهير.

فتح هيبه الدولاب يجيب الجلباب بتاعه لبسه وفتح الدرج اللي داخل الدولاب عشان يجيب ساعته كانت العلبه بتاعت الساعه شابكه في اخر الدرج حاول يجيبها وبدل ما يطلعها وقعها ورا الدرج…

هيبه…بغضب ناجصك اني يابنت المركوب سحب الدرج كله بنرفزه خرجه بره ومد ايده عشان يجيب ساعته اللي وقعت ورا الدرج لقي شريط برشام شكله غريب طلعه بص فيه وشك انه مانع حمل حطه في جيبه من سكات ومد ايده خد ساعته لبسها وخرج وهو ناوي يسأل عن البرشام ده..عدي وقت بسيط وصل ادام صيدليه بعيده شويه عن مكان القصر ودخل فيها.

هيبه…سلام عليكم

الصيدلي..عليكم السلام

هيبه…وحيات ابوك يا دكتور عايز اي مسكن للصداع

الصيدلي…من عنيا

هيبه….ومعلهش أذا سمحت يعني تعرفني البرشام ده بتاع ايه لجيته في شنطه العلاچات بتاعتي بس مش فاكر بتاع ايه

الصيدلي…لاه ده مش علاچ ليك عاد ده برشام منع حمل

حس هيبه بالصدمه مع انه كان شاكك.

هيبه…متوكد يا دكتور

الصيدلي…ايوه متوكد برشام منع حمل

هيبه….طيب شكرا يا دكتور خرج هيبه بسرعه.

الصيدلي…طيب المسكن

مردش عليه وركب عربيته وساق بأقصي سرعه عالقصر

دخل زي المجنون

بقلمي ………….أميره أسامه

بخيته…في ايه ياولدي هتچري ليه وأيه اللي رچعك مردش عليها وطلع عالسلم زي المجنون

بخيته…. هيبه يا هيبه

دخل الاوضه وقفل وراه وهما طلعوا بسرعه يشوفوه

رزع هيبه الباب وهو باصص لهنيه بغضب اتفزعت هنيه من صوت الباب

هيبه…رفع الشريط ادام عينها

ايه ده؟

بلعت هنيه ريقها برعب وهي باصه لشريط البرشام

ده ده مسكن

نزل هيبه علي وشها بالقلم ومسكها من شعرها بعنف وهي صرخت في ايده.

هيبه…لساكي بتكدبي عايشه معايا كل السنين ديه وانتي بتاخدي مانع للحبل معيزاش تخلفي مني يافاچره مفهماني طول الوجت ده انك مبتخلفيش وانتي اللي مانعه حالك

هنيه…اسمعني ياهيبه الله يخليك

فضل هيبه يضرب فيها بكل قوته وهي تصرخ وهما يخبطوا عالباب لكن من غير اي فايده.

حمدان…افتح يا هيبه

بدر….افتح هتموتها في يدك

بخيته…في ايه يا ولدي.

بعد وقت بسيط فتح هيبه الباب وهو بيتنفس بسرعه

 

 

 

حمدان…في ايه عملت ايه هنيه

هيبه….طول الوجت اللي فات مفهماني ان مفيش نصيب انها تحبل مني والفاچره بتاخد برشام عشان تمنع الحبل.

أتصدم الجميع

هيبه…البت دي متخرچش من إهنه لا تدوج أكل ولا حد يديها نجطه مايه.😡

قفل عليها بالمفتاح وخرج بغضب من القصر راح لمكان متعود يسهر فيه ديما..

اما هنيه فكانت مش قادره تقوم من الارض وشها كله جايب دم وجسمها تاعبهامن الضرب.فضلت تفكر ازاي تخرج من اللي هي فيه ده وقررت انها تهرب.

في نص الليل كان القصر هادي والكل نام رجع هيبه لقي هنيه نايمه غير هدومه وراح عالسرير بتعب ونام

وراح في سابع نومه.

قامت هنيه براحه بصت في وشه اتأكدت انه نام من أنتظام نفسه نزلت براحه من علي السرير سحبت العبايه بتاعتها وراحت عالباب فتحته براحه وخرجت بهدوء من غير ما يحس فضلت تبص شمال ويمين عشان تتأكد ان كله نايم نزلت براحه من علي السلم وراحت عالمطبخ خرجت من الباب اللي فيه علي المكان الخلفي للجنينه عشان الغفر ما يشوفوهاش مشيت بهدوء لحد ما وصلت للبوابه الخلفيه لمحت واحد من الغفر اعد علي دكه من الخشب ورايح في سابع نومه قربت بهدوء وهي قلبها بيدق بسرعه خايفه يصحي ويشوفها وساعتها هتبقي ميته لا محاله.فضلت تتسحب براحه لحد ما خرجت من جمبه بهدوء وطلعت علي الشارع غطت وشها بطرحتها ورغم تعب جسمها فضلت تجري باقصي سرعه عندها البلد كانت هاديه تماما ومفيش غير صوت الحشرات اللي طالع من الزرع كانت مرعوبه لكن ماكنش في ادامها غير الهروب بعد جري وتعب وقفت بضعف دموعها كانت مغرقه وشها مش عارفه تروح فين لو راحت لاهلها هيبه هيوصلها وأهلها رغم اللي هي فيه مش هينصفوها وهيسلموها بايدهم لهيبه يعمل فيها ما بداله ومتعرفش حد تروحله ولو سافرت هتروح فين ولمين وازاي وهي مش معاها فلوس قررت انها تروح لموسي مكانتش عارفه ليه بس مكانش ادامها غيره وبالرغم من انها عرفت اللي عمله مع عطر لما راحتله لكن راحت يمكن تقدر تقنعه وصلت ادام

القصر قابلها واحد من الغفر.

الغفير…بتعملي ايه أهنه يا حرمه

هنيه وهي مخبيه وشها الله يخليك عايزه اجابل موسي بيه

الغفير…تجابلي موسي بيه الوجت ده أكيد نايم روحي الوجت والصباح رباح

هنيه…الله يسترك ياشيخ دي مسأله حياه أو موت

الغفير….بتفكير طيب تعالي معايا أياك بس ميسمعنيش كلمتين عشان هجلج منامه

هنيه…انشالله يخليك

راح الغفير علي بوابه القصر خبط كذا مره وبعد وقت طويل من الخبط صحي اللي فالقصر كلهم نزل موسي جري عالسلم

چليله….اللهم أچعله خير مين اللي هيخبط فالوجت ده

موسي…ماعارفش افتحي الباب يا سعديه

راحت سعديه الشغاله فتحت الباب

سعديه…خير

الغفير…موسي بيه فين

موسي…من بعيد تعالي ياواد في ايه

دخل الغفير في واحده ياموسي بيه عايزه تجابل سعادتك

چليله…بصوت واطي نسبيا ماهنخلوصش يا عطر

اما موسي فا هو كمان اول حد جه في باله عطر

موسي…مين هي

الغفير…ماجالتش

موسي…دخلها

شاورلها الغفير قربت هنيه بسرعه ودخلت

موسي…بصلها بأستغراب واتأكد انها مش عطر..انتي مين؟؟

هنيه…اني واحده واجعه في عرضك يا موسي بيه بس ماهجدرش أتحددت إهنه

چليله…انتي مين يابت جولي

موسي…خديها يا أما وروحي عالمضيفه هغير خلجاتي وانزل وانت روح عالبوابه وانتي ياسعديه ادخلي نامي

الكل نفذ اوامره طلع موسي عشان يغير

مهران…مين دي ياموسي

موسي…ماعرفش هنشوف الوجت غير وأسبجني علي المضيفه

مهران…ماشي

……..

چليله…انتي مين يا بتي

هنيه…بدموع نزلت الطرحه عن وشها اني هنيه يا خاله

ضربت چليله علي صدرها مين عمل فيكي إكده ياهنيه

هنيه…هحكيلك يا خاله بس لما موسي بيه ياچي

ثواني بسيطه ونزل موسي ومهران وسالم

وبمجرد ما شافها موسي أتصدم

موسي…هنيه؟

 

 

 

هنيه…بدموع ايوه يا موسي بيه اني هنيه

موسي…مين عمل فيكي إكده. وعطر كويسه.

هنيه…بحزن هيبه اللي عمل فيا إكده وعطر مش كويسه لاه حابسينها ونازلين فيها ضرب وحالفين ما تخرچ من اوضتها غير علي بيت چوزها

چليله…اسمعي ياهنيه لو چايه بخصوص عطر فا موسي ولدي ما هيجدرش يعمل حاچه أخواتها رافضين وماهينفعش كبير البلد يتچوز واحده غصب عن أهلها

هنيه…لاه يا خاله اني عارفه ان موضوع عطر معجد واني مش چايه عشان إكده انا چايه واجعه في عرضك يا موسي بيه أحميني

موسي…احميكي من مين؟

هنيه…من هيبه

موسي…هيبه چوزك يا هنيه

هنيه….اني طالبه منك تحميني وتخبيني لحد ما اطلج منيه وبعدها همشي

موسي..انتي واعيه لحديتك يا هنيه عيزاني أخبيكي من چوزك وكمان أساعدك علي الطلاج بصفتي ايه وبعدين اني ملياش صالح واحد وحرمته بينهم مشاكل باي صفه أتدخل

هنيه…بصفتك كبير البلد وكبيرنا اني عيزاك تخبيني ومحدش يعرف طريجي لحد ما يطلجني

چليله…وانتي فاكره ان هيبه هيطلجك بسهوله

هنيه…هخلعه

چليله…يامري بتفكري ازاي أنتي يابتي كيف يعني تخلعيه انتي فاكره أنه هيسيبك في حالك

هنيه…اول ما حكم المحكمه يتنفذ همشي من البلد كلها وماهيعرفش مكاني بس أجفوا چنبي اني ملياش غيركم في الدنيا بعد ربنا

مهران…مرحتيش لأهلك ليه يا هنيه.

هنيه…اهلي هما السبب في اللي اني فيه ده يا سي مهران هما اللي غصبوني عليه ولو روحتلهم ماهيسموش عليا هيعملوا فيا أكتر من اللي هيبه عملوا وكمان هيودوني ليه بايدهم كل ده عشان الفلوس اللي بيديهالهم يعني بايعيني يا سي مهران

موسي…بس اني اسف يا هنيه دي امور عائليه ما هجدرش اتدخل فيها روحي لاهلك وخليهم يشوفوا عمل فيكي ايه واكيد يعني ماهيرموكيش

هنيه…تبجي مش خابر أهلي زين

سالم…بس ياهنيه موسي عنديه حج باي صفه يحميكي چوزك لو عرف انك هربتي اكيد هيبلغ المركز ولو عرفوا انك أهنه اول حد هيتحط في وش المدفع موسي

هنيه…صدجني يا دكتور سالم المشاكل اكبر بكتير من

من خناجه لواحد مع مرته اللي شوفته في البيت ده طول چوازي ما حدش يجدر يستحمله واللي شوفته من اهلي ماحدش يجدر عليه اني ملياش حد غيركم بعد ربنا أعتبره چميل بترده ليه يا موسي بيه.

موسي….چميل؟؟

هنيه…ايوه ساعدني كيف ما كنت بساعدك من أول ما أتچوزت هيبه سنين عدت معاه واني بساعدك من غير ما تعرف.. اي أذي من حمدان او هيبه كنت ببعده عنيك وبعرف عطر وبدر عشان يحذروك وكنت بجدر ألحجك اراضي كتير كان عايز ياخدها حمدان منيك كنت بعرف وأجول لعطر وبدر يخبروك اي مصيبه كانوا بيحاولوا يحطوك فيها عشان تصغر في عيون الناس كنت اني السبب فيها وكنت بعمل إكده عشان انت نضيف ومتستاهلش غير كل خير وعشان عطر بتحبك مكنتش محتاچه رد چميل منيك بس اني دلوك ده أكتر وجت في الدنيا محتاچه فيه رد الچميل أبوس يدك هيبه هيجتلني… لو رفضت تساعدي اني ماهرچعش ليه بردك همشي وأرض الله واسعه بس اني خايفه اسافر فين واني ملياش حد اروحله.

سكت الكل وفضل موسي متلغبط مش عارف يعمل ايه بيبص في عيون امه واخواته وشايف فيهم نفس الحيره وشايف نظره أشفاق في عيون چليله.

چليله…اهدي يابتي وبطلي بكا عاد.

موسي….ماشي يا هنيه هساعدك

ابتسمت هنيه بفرحه واتصدم اخواته وامه من موقفه رغم ان هنيه صعبت عليهم.

موسي….هساعدك وهخفيكي في مكان محدش يجدر يوصله في الجصر حتي لو هيبه بلغ وجم يفتشوا أهنه محدش هيعرف مكانك

هنيه…ربنا يخليك يا موسي بيه.

موسي…سالم أتوكد ان مافيش حد من الشغالين بره

خرج سالم بص لقي الدنيا هاديه.

خدها موسي وچليله وطلعوا في اخر دور في القصر واللي كان يخص موسي دخلها في اوضه وهي واقفه مش عارفه بيعمل ايه

 

 

شد موسي دولاب كبير كله تحف وانتيكات هو ومهران ظهر باب بيتسحب عالجنب بيخرج علي اوضه تانيه بصلها موسي حس انها مستغربه اللي بيحصل

موسي…بأبتسامه متخافيش الاوضه دي محدش يعرف مكانها غير اني وامي واخواتي وابوي الله يرحمه عملها چدي الله يرحمه عشان تكون امان لو حوصل اي حاچه خصوصا ايام عاركه زمان وبعدها ابوي ظبطها بطريجه احسن من چدي عشان تكون امان اكتر وبعد إكده اني اللي ظبطتها بالطريجه اللي انتي شيفاها دي ولو الچن الازرج چه ماهيعرفش يوصلك

دخل موسي الأوضه ودخلت هنيه وراه هي وچليله وأخواته

الاوضه كانت مبهدله شويه

چليله…معلهش الاوضه عفشه شويه عشان ما

حدش بيدخلها من زمان بس الصبح هشيعلك فرحه وفاطمه مرت مهران يظبطوها معاكي

موسي..ايوه يا أمي ماعيزش حد من الشغالين يلمحوها واني هنبه عالغفير لو حد سأل عليكي يجول ميعرفش

هنيه….ملهوش لزوم يا خاله تتعبيهم معاي اني الصبح هروجها وأخليها زينه كفايه انكم هتحموني

چليله…متجوليش إكده يابتي انتي كيف فرحه وفاطمه

هنيه…ربنا يخليكي بصت لموسي شكرا يا موسي بيه علي وجفتك معاي

موسي….لا شكر علي واچب هنهملك ترتاحي الوجت بس اكيد هتحكيلي ايه السبب اللي خلاكي تهربي

سكتت هنيه ومردتش

موسي…معاكي محمول

هنيه…كان معاي بس سبته فالجصر

موسي…بكره هبعتلك محمول صغير وهحطلك فيه رجمي ورجم امي عشان لو أحتاچتي حاچه تبلغينا او لو حسيتي بتعب المكان أهنه محدش هيسمعك لو ناديتي للصبح

هنيه…ماشي

موسي…يلا تصبحي علي خير

هنيه…بنظره حب تلاجي الخير

خرجوا كلهم من الاوضه وقفل عليها موسي ومهران من تاني

بقلمي ………………أميره أسامه

سالم….متوكد من اللي بتعمله يا موسي

چليله…وافجت ليه يا ولدي

موسي…كنتي عيزاني أعمل أيه يا چليله من ميته بهمل حد واجع في عرضي وبعدين ليه مرفضتوش چايين الوجت تسألوني وافجت ليه

چليله…بصراحه البت صعبت عليا

مهران…هنيه وهاچر غلابه مش كيف مرت حمدان حربايه وواخده حجها

سالم…بس واضح ان في سبب جوي عشان يعمل فيها إكده

موسي…ياخبر بفلوس يلا نروح نرتاح شكل بكره ماهيمرش مرور الكرام.

………..

عدت ساعات الليل بسرعه وطلع النهار واتقلب قصر عتمان بسبب أختفاء هنيه

واول حاجه عملها هيبه راح لأهلها يدور عليها ولما ملقهاش كسر البيت وهددهم لو مخبينها وخرج هو وحمدان وبدر قلبوا عليها البلد وراح هيبه بلغ الشرطه

ومرضيش يقول أنها مختفيه او هربت عشان هيقولوا انهم مينفعش يتحركوا غير بعد 24 ساعه فقرر انه يقول انها سرقت مبلغ كبير وبالفعل خرج معاه بعض افراد الشرطه قلبوا الدنيا لكن مكانش ليها أثر

حمدان….هيبه نطلعوا علي موسي هنيه ماخرچتش من البلد اكيد راحت لموسي

بدر…هو انتوا ملاجينش مصيبه تلبسوها لموسي عاد

حمدان…ايه شكلك عارف انه عنديه وخايف

بدر…لاه انت أتچنيت رسمي عارف ايه وخايف ايه وموسي هيخبي هنيه من الاساس ليه

هيبه…حمدان عنديه حج ما هنخسرش حاچه بلغ حمدان الظابط وبالفعل طلعوا علي قصر موسي

نزل موسي ومهران وسالم

موسي…خير يا حضرت الظابط

الظابط…اسف عالأزعاچ يا موسي بيه بس معانا أذن تفتيش

موسي…ايه تفتيش ايه عاد ومن ميته جصر الكبير بيتفتش

هيبه….ليه لاهو الكبير يكبر علي الحكومه.

 

 

 

 

أبتسم موسي لما فهم ان هيبه عايز يغلطه 👌لاه مافيش حاچه تكبر عالحكومه خير يا حضره الظابط هتفتش علي ايه

الظابط…هيبه بيه مرته أختفت وسرجت منيه مبلغ كبير وبندور عليها

موسي…ايوه بردو مش فاهم واني هخبيها مثلا ولا اكونش اني اللي جايلها تسرجه

هيبه…هنيه مطلعتش من البلد ومفيش دار مدورناش فيها وچه الدور علي الدار أهنه

موسي…والله الدار جدامكم دوروا فيها كيف ما تحبوا أتفضل يا حضره الظابط شوف شغلك

أمر الظابط العساكر بالبحث عن هنيه وفضل موسي واقف ساكت وعلي وشه أبتسامه ثقه وثبات الكل واقف مترقب

دقايق بسيطه عدت نزل العساكر…تمام يا فندم

مفيش حد

الظابط لموسي…اسف عالأزعاچ ياموسي بيه بس انت عارف ده شغلنا

موسي…طبعا طبعا يا حضره الظابط الدار دارك تاچي وجت ما تحب

الظابط…دايما عامر بحسك يا موسي بيه السلام عليكم

موسي…وعليكم السلام ورحمه الله وبركاته وقبل ما يخرج هيبه وحمدان نادي موسي علي هيبه..هييييبه

وقف هيبه وحمدان وبصولوا

موسي…مره تانيه تفكر ألف مره جبل ما تدخل دار الكبير روح دور علي مرتك في موطرح تاني او شوف الاول انت عملت فيها ايه عشان تهرب منيك وتچرسك

بصله هيبه بغضب وقبل ما يرد منعه حمدان

حمدان..وماله يا موسي بيه حجك برده وعموما هيبه هيلاجي مرته

موسي…بسخريه جول يارب

خرج هيبه وحمدان وكل واحد فيهم قايد في قلبه بركان من الغضب ومتأكدين ان موسي اكيد هو اللي مساعدها.

….

سالم…هيبه ماهيسكتش يا موسي

موسي…أعلي ما في خيله يركبه

سالم…طيب وهتعمل ايه مع مرته هتفضل مخبيها كتير إكده

مهران…أيوه صوح يا موسي الطلاج والخلع مش بالساهل واكيد هياخدوا وجت

موسي…معنديش حل تاني يا مهران واني وعدتها يا سالم اني أجف معاها البت غلبانه وأهلها للأسف كلاب فلوس مستعدين يبيعوها بأي تمن المهم يجبضوا تمنها

مهران…صراحه هنيه لو مش غلبانه وجلبها طيب كنت جولت أنها عملت ذنب عشان ربنا يرزجها بأهل كيف أهلها وچوازه كيف چوازتها

موسي..مش شرط يا مهران تكون عملت ذنب ده إبتلاء واكيد ربنا شايلها الاحسن

سالم…معاك حج بجول ايه صوح عايزكم تمهدوا لامي اني خلاص كلها يومين ورمضان يخلص ولازم أعاود علي القاهره عشان شغلي

موسي…خلاص ناويت تسافر

سالم…اني بجالي شهر تجريبا أهنه وسايب شغلي

مهران…طيب خليك لبعد العيد مچاتش عالكام يوم دول

موسي…مهران عنديه حج خليك كام يوم العيد وبعدين عاود

سالم…أن شاء الله اللي فيه الخير ربنا يجدمه.

بقلمي …………..أميره أسامه

……عدي كام يوم وخلص الشهر الكريم وهلت روايح العيد وفي خلال الكام يوم دول هيبه مكانش سايب شبر فالارض مبيدورش فيه عن هنيه مش حب فيها لكن كان عايز ينتقم منها ويقتلها

اما عند عطر كانت حاسه باستسلام رهيب خلاص معاد فرحها بيقرب وحاسه ان روحها بتتاخد منها مفيش حاجه في ايدها تعملها محبوسه بين أربع حيطان وكل ما يوم بيعدي وفرحها بيقرب بتحس ان كأنها مستنيه حكم الاعدام.

اما موسي كان بيحاول يلاقي اي حل لكن كانت مقفوله خلاص وفي خلال الكام يوم دول مكانش بيشوف هنيه خالص واللي كانت بتطلعلها فاطمه وفرحه وچليله وكانوا مهونين عليها كتير وبيحكولها اللي بيحصل اول بأول

عدي اول يوم العيد وفي المساء أتنصب صوان الفرح

اهل البلد كانوا مضايقين منهم عشان الفرح ولسه وهبه مكملش حتي أسبوعين لكن موسي معترضش وسابهم عشان حسابهم يتقل اكتر

صباح تاني يوم العيد اليوم المشؤوم علي كل من عطر وموسي.

دخلت بخيته وسهير وهاچر علي عطر.

بخيته…يلا يا عطر جومي أتسبحي البلانه چايه كمان نص ساعه عشان تچهزك وادي فستانك اهه

عطر..بدموع الله يخليكي يا أما بلاش الچوازه دي وليكي عليا ماعيزاش أتچوز واصل بس ساعديني

بخيته….يلا يابت جومي اعملي اللي جولتلك عليه بلا چلع بنات اني حايشه عنيكي أخواتك بالعافيه

عطر…الله يخليكي يا أما

 

 

 

بخيته…عدي ليلتك يا عطر بدل ما أشيعلك حمدان ولا هيبه يشوفوا شغلهم معاكي

ساعديها يلا يا سهير

هاچر…بعد أذنك يا حماتي هساعدها اني

بخيته…ماشي يلا يا سهير معاي وأنتي يا هاجر چهزيها بسرعه

خرجت بخيته وسهير واترمت عطر في حضن هاچر

هاچر…بكفياكي يا خيتي بكا عاد وشك أتبدل

عطر….خلاص يا هاچر أمي وأخواتي حكموا عليا أعيش طول حياتي في عذاب

هاچر…مش يمكن ربنا شايلك الخير يا عطر

عطر…وهياچي منين الخير لهو انتي متعرفيش رضوان زين وحتي لو هو راچل زين اني جلبي مش رايده يا خيتي

حضنتها هاجر بدموع صعبانه عليها كسره قلب عطر لكن مش عارفه تعملها أيه..

هاچر…طيب جومي يلا عشان أچهزك مبجاش كتير وامك لو عرفت انك مالبستيش هتدخل بنفسها تلبسك بالغصب جومي يا خيتي الله يرضي عنيكي.

مسحت عطر دموعها بقله حيله وقامت وقفت مسكت فستانها بأيدها عشان تلبسه وكأنها ماسكه في أيدها شوك

هاچر…علي فين يا خيتي

عطر…هغير وألبس الفستان

هاچر….ماهتعرفيش تلبسيه فالحمام وكمان لحالك

عطر…لاه هعرف اطمني

خدت عطر فستانها وراحت علي دولابها طلعت ورقه صغيره وقلم أستغربت هاجر لكن سابتها علي راحتها

دخلت عطر لبست ومسكت الورقه والقلم كتبت رساله لموسي ومع كل حرف كانت دموعها بتنزل تتسابق علي خدها بقهر وتنزل علي رسالتها..وبعد وقت بسيط خلصت ومسحت دموعها وخرجت من الحمام.

هاچر…كيف الجمر يا خيتي

اعدت عطر علي السرير من غير ولا كلمه.

هاچر….انتي منيحه يا خيتي

عطر…اني طالبه منيكي طلب يا هاچر

هاچر..عيوني ليكي ياعطر

حطت عطر رسالتها في ظرف وحطتها في ايد هاچر.

هاچر…ايه ده ياعطر

عطر…دي رساله عيزاكي تديها لموسي

هاچر…بفزع وه كيف يعني ورساله ايه دي

عطر…بودعه يا هاچر

ضربت هاچر علي صدرها يامري انتي عايزه تموتي حالك

ضحكت بسرعه عطر من وسط دموعها اموت حالي ايه ياخرفانه انتي بس انتي خابره ماهينفعش اشوفه او اجابله تاني بعد ما اتچوز واني عندي حديت كتير كان نفسي أجولهوله يا خيتي اني ملياش غيرك يساعدني غيرك انتي وهنيه وانتي خابره هنيه مشيت وهملتنا ومعرفش مكانها مبجاليش غيرك

هاچر…ايوه بس اديهاله كيف

وميته

عطر….كيف اكيد هتلاجي الف طريجه ميته دي بتاعت ربنا بس اكيد هتشوفيه جريب يا هاچر

هاچر…مكانتش فاهمه كلامها

هتتكلمي بالالغاز يا عطر

 

 

 

عطر…ولا ألغاز ولا حاچه كل حاچه مترتبه عند اللي لا يغفل ولا ينام بس جولي انك هتساعديني ومن غير ما حد يعرف

هاچر…هساعدك يا خيتي أن شاء الله خبط باب الاوضه في الوقت ده ودخلت سهير

وبخيته ومعاهم البلانه

بخيته….زين لبستي خلاص خيريه البلانه چات يلا يا خيريه عيزاكي تزوجيها وتخليها كيف الجمر وتداري الزرجان اللي علي وشها ده.

خيريه…بس إكده اني هخليها أحلي عروسه فالنچع كلاتها..

خرجت بخيته وسهير وسابت معاها هاجر وخيريه البلانه..

فضلت خيريه تحط علي وشها مساحيق تجميل وتمكيچ فيها وتجهزها لليله فرحها.وفضلت عطر باصه علي نفسها فالمرايه بثبات وهدوء رهيب وكأنها جسم أتسلبت روحه منه💔

بعد وقت بسيط خلصت و فضلت خيريه تزغرط

دخلت بخيته وأبتسمت برضا علي شغل خيريه وادتها فلوس في ايدها ومشيت

بخيته….هتفضلي إهنه لحد ما أجولك تنزلي يكون النسوان كلهم موچودين

يلا يا هاچر معايا عشان أجفل عليها.بصتلها عطر بحسره وقلب مقسوم نصين علي قساوه قلبها لكن ألتزمت الصمت

هاچر…بحزن اني خارچه يا خيتي عايزه حاچه.

عطر…تسلمي ياهاچر

وقربت منها فجأه وحضنتها بقوه

دب الخوف في قلب هاجر

بخيته….وه ما كفايه چلع عاد مسافره انتي إياك

بصتلها عطر بوجع كانت تتمني امها تحضنها لكن القساوه أتخلقت لقلب بخيته

خرجت بخيته وهاچر وسهير وقفلت عليها بخيته بالمفتاح.

نزلت دموع عطر بمجرد ما خرجوا وانهارت من العياط.وخدت قرارها اللي لايمكن ترجع فيه💔😔

بقلمي ……………أميره أسامه

فالوقت ده كان موسي في اوضته قافل علي نفسه واعد فالضلمه وحاسس أن قلبه بيتقطع وهو سامع صوت ضرب النار مسمع البلد كلها عشان فرح عطر خبطت چليله ودخلت فتحت النور وراحت أعدت جمبه.

أبتسم موسي اول ما شافها وباس ايدها عشان يحاول انه ميحسسهاش بقلبه اللي بينزف.

چليله…بأبتسامه وجع مش هجولك كيفك عشان أني عارفه اللي فيك ولا هجولك ان ضحكتك في وشي وراها وچيعه وحزن الدنيا بس هجولك أن ربنا ماريدش يا ولدي ان عطر تكون ليك مش نصيبك يا سيد الناس.

موسي…بأبتسامه حزن تعرفي ياچليله اللي واچعني بچد أني مجدرتش أكون كد كلمتي معاها لما چاتني عطر في منامي جالتلي أنها خايفه وجالتلي متهملنيش اني ملياش غيرك أوعاك تهملني لراچل غيرك جولتلها اني عمري ماههملك ومفيش حاچه هتفرجنا غير الموت…ولما چاتني هربانه منيهم تستنچد بيا وشايف في عينها نظره خوف وضياع كنها عيله صغيره تايهه محتاچه تحس بالأمان جالتهالي تاني أوعاك تهملني لرضوان ياموسي..لاجدرت اكون كد كلامي في منامي ولا جدرت اكون كد كلامي فالحجيجه.

چليله…كان بيدك أيه تعمله ومعملتوش يا ولدي انت مجصرتش أهلها اللي رافضين أنت طلبتها ودخلت البيت من بابه ومحدش فينا أعترض وهما مش موافجين نعملوا ايه عاد دي ناس معندهاش جلب ولا حتي يعرفوا الاصول مستنوش ابوك حتي يعدي الاربعين عشان يجهروك ويجهرونا كلنا وحتي بتهم مصعبتش عليهم.

موسي…جوليلي يا چليله اني غلطت لما چاتني عطر عشان أتچوزها ورفضت ورچعتها.كان المفروض أني أستغل الفرصه وأتچوزها أو أخبيها كيف ما خبيت هنيه

چليله…لاه ياولدي اللي عملته ده عين العجل وهي دي الأصول ألراچل ياولدي ما يتچوزش البت من ورا أهلها وانت راچل من ضهر راچل انت الكبير يا موسي والكبير بحكمته وبتصرفاته وأنت أتصرفت صوح يا ولدي ومحدش يجدر يجول غير إكده..

هز موسي راسه بهدوء وحزن

چليله…بدموع معيزاش أشوفك إكده يا ولدي جلبي بيتجطع عشانك

موسي…سلامت جلبك يا ست الدار اني زين أهه متخافيش عليا ولدك زين ياچليله

چليله…طلع اللي چواك يا موسي عشان ترتاح

موسي….بأبتسامه اللي چوايا بركان ياچليله لو طلع مفيش بحر هيطفيه سيبي البركان نايم يا چليله متصحيهوش عاد

حضنته چليله بدموع وفضلت تطبطب عليه.وتحضنه بقوه عدت ثواني بسيطه وفجأه سمعوا صوت صوات جاي من الشارع وضرب النار وقف

 

 

 

چليله..بفزع يا ساتر يارب أيه صوت النواح ده

موسي…ماعرفش تعالي نشوف في ايه.

نزل الكل علي الصوت وخرجوا بره فالجنينه

راح موسي للغفير

موسي…في أيه عاد أيه الصوات ده

الغفير…ماعرفش يا كبير بس تجريبا في حاچه في جصر عتمان بيه

موسي…بأستغراب هيكون في ايه عاد

الغفير…شكله مات

عدي وقت بسيط وبسرعه أنتشر خبر موت عطر اللي صدمته كانت ليها وقوع خاص علي موسي وفضل ساكت في حاله صدمه ومش مصدق وبسرعه لبس ومعاه اخواته وجريوا علي قصر عتمان ومع كل خطوه كان بيخطيها كان حاسس ان روحه بتتسحب منه بيكدب ودانه وقلبه وعقله أجتمعه علي عدم التصديق سامع صوت الصوات بيقرب.

وصل ادام القصر اللي كان ظاهر عليه مراسم الاحتفال وفجأه أتحولت المراسم دي لحزن كان واقف حمدان وهيبه وبدر وحواليهم رجال كتير

مهران…خير يابدر في ايه

وقف موسي تايهه وحاسس انه مش معاهم مستني بس بدر ينطق.

بدر…بحزن ودموع بتلمع جوه عينه وصوت ماليه القهر.عطر ماتت يامهران بص لموسي عطر انتحرت يا موسي موتت حالها.

وكأن جمله بدر زلزال هز جميع أجزاء جسمه وحس كأن جميع ألأيادي البشريه أتجمعت وشقت صدره ومسكت قلبه بين كفوفهم وعصرته

سالم…كيف ده يابدر بتجول أيه؟؟

قرب حمدان وهيبه منهم وبعدوا عن الرجاله اللي حواليهم

هيبه….كيف دي تجولها لاخوك اللي غوي أختي وكان السبب في موتها

مهران…عيب الحديت ده يا هيبه ما يصحش

هيبه…هو ايه اللي يصح وميصحش يا مهران مش دي الحجيجه

حمدان…بصوت خشن هيييبه ممنوش عازه الحديت ده ياولد أبوي وبص لموسي اللي تقريبا مكانش معاهم عالأجل مش الوجت الحساب بعدين نخلصوا من الفضيحه اللي أختك الرخيصه حطتنا فيها وبعدين نشوف مين السبب.

بصله موسي بغضب بمجرد ماسمعه بيتكلم عن عطر.وكأنه غلطه فيها فوقه

سالم حس ان في مشكله ممكن تحصل يلا يامهران يلا ياموسي خلينا نروح الوجت من إهنه.

بدر…روح ياموسي يلا يامهران انت وسالم مشوه من إهنه

مشي مهران وسالم وخدوا معاهم موسي وكأنه طفل ماشي معاهم من غير اي أعتراض عقله رافض يستوعب الصدمه او لسه مترجمهاش.

……

اما قبل لحظات من موت عطر.

فلاش باك.

بخيته…تعالي ياسهير معايا انتي وهاچر نچيب عطر النسوان بدأت تسأل عليها

سهير…يلا يا حماتي

طلعوا وفتحت بخيته عليها الباب وبمجرد ما فتحت أتصدموا لما شافو عطر واقعه عالأرض غرقانه في دمها وفستانها الأبيض أتحول للون الأحمر جريت عليها بخيته وفضلت تصوت ووقفت سهير عالباب تصوت وجريت عليها هاجر رفعتها من الارض وهي بتصرخ.

هاچر…ليه كده يا خيتي عملتي ليه إكده ياعطر حرام عليكي يا خيتي حرمتيني منيكي ليه ياعطر.

ثواني والقصر كله أتقلب وبسرعه جاب بدر دكتور بلغهم بالوفاه واتحول القصر فجأه من صوت الزغاريط والطبل لصوت الصوات والقرآن

باك..

 

 

 

عدي الوقت بسرعه البلد كلها كانت عرفت خبر موت عطر

وبالرغم من ان اغلب الناس كانت بتحب عطر إلا انهم كانوا شمتانين فيهم عشان مقدروش حاله الحزن علي موت كبيرهم وهبه..وعشان مكانش ليهم حق الرفض انهم يحضروا فرح عطر ويجاملوا فيه لكن حضروا بالغصب والتهديد من حمدان وهيبه.

وصل موسي عالقصر وفضل ماشي مش دريان بحد ولا بيرد علي حد

چليله …بدموع وقهر علي حاله ابنها موسي ..موسي ياولدي رد عليا

عدي موسي من جنبها وسابها وطلع

فرحه …بدموع سييه يا اما في حاله ربنا يجويه علي اللي صاب جلبه

فاطمه…بدموع عيني عليكي ياعطر وعلي شبابك ياخيتي

طلع موسي علي أوضته قفل عليه بالمفتاح نزل الشال من علي كتفه بأهمال وشال من علي راسه العمامه ودخل علي الحمام وقف تحت الدش بهدومه كان حاسس ان في نار صابت جسمه وحاسس بصهد غريبه خارجه منه حس ان الميه هتطفيها لكن مكانش عارف ان الصهد دي جوه قلبه مش في جسمه كان واقف يهز راسه تحت الميه مش قادر يستوعب حاسس انه بيحلم

خرج موسي من تحت الميه راح وقف ادام المرايه يكلم نفسه.

موسي…كيف يعني موتي ياعطر اني جولتلك ان مفيش حاچه هتفرجنا غير الموت بس كنت جاصد موتي اني ياعطر مش موتك كيف چالك جلب تفارجيني ياعطر..كد إكده موتك أهون عنديكي من فراجي

أختارتي تموتي حالك ولا أنك تكوني لراچل غيري طيب انتي أرتاحتي هعمل أيه اني من غيرك طيب لو مصعبش عليكي حالك اني مصعبتش عليكي ياعطر

ليه ليه لييييييه كسر موسي بأيده المرايه وأتعور وخرج

زي البركان اللي بينفجر فضل يكسر في كل حاجه تقابله

وفضلت چليله وأخواته يخبطوا عليه..

موسي…ياعطررررررر ياعطرررررر سبتيني ليه ياعطر هانت عليكي روحك ليه ..طب ليه لما هربتي وچيتيلي وطلبت منك تمشي ليه مجولتيش لاه ليه مصممتيش تفضلي ليه سمعتي حديتي ياعطر شجيتي جلبي بيدك ومشيتي ليه طيب أرچعي واني مش هسيبك أبدا وصدجيني هكون كد كلامي المرادي ومش هفكر في اي حد أرچعيلي وملعون أبوووووو النااااس ملعون أبو العادات ملعون أبو الأصول

أرچعيلي يااااااعطر.

مع كل كلمه كان بيقولها كانت چليله بتنهار بره وهي حاسه بوجع قلبه

چليله…أفتح ياولدي ماتوچعش جلبي عليك أفتح ياسيد الناس الكسره والوچع مش ليك يا ولدي.

ليله من الدموع والحزن والوجع كتبت عطر نهايتها

بدمها💔😔

بقلمي ……………..أميره أسامه

عدت الساعات وكل حاجه خلصت بسرعه اتدفنت عطر.

وأتعملها العزا وحضره موسي واخواته حتي چليله راحت تعزي هي وفاطمه وفرحه.

الحزن كان ظاهر عليهم كلهم

فضلت بخيته تصوت وتنوح

وفجأه حست ان بنتها اتخطفت من بين أيدها وكأنها فاقت لما خسرتها كانت هتطرد چليله لكن منعتها سهير عشان الفضايح.

فضل الستات كلهم يصوتوا بحزن علي عطر

 

 

وبخيته ترد عليهم وتعدد.

بخيته….ياعود طري ميل ومال عالأرض إمبارح كان وسطنا والليله تحت الأرض.

….

يا جبر چايلك عروسه محنيه الكفوف والكعب..خدت معاها الفرح وسابت وچع الجلب.

فضلت تعدد والستات يصوتوا وحالت الحزن كانت كبيره.

خلص العزا بعد وقت طويل وطول الوقت ده موسي كان في دنيا تانيه مش مركز في نظرات حمدان وهيبه اللي بتخترقه. لكن كان واقف بثبات عكس اللي جواه عمره ما توقع انه يكون واقف في عزا اللي دخلت القلب وملكت الروح💔

يتبع ….