 |
الحلقة السادسة والسابعه والثامنه
حبيبي المجهول
شيمو
كامله على مدونة النجم المتوهج للروايات
ادهم دخل لقي حد بينادي عليه
ادهم ادهم استني
بص لقي واحد مش عارفه بس فاكر انه شافه قبل كده
ادهم: افندم
الراجل: انت مش فاكرني؟؟؟ انا صاحب المطعم اللي جنبكم ده
فاكر لما جيت انت وعم حسين تسألني علي البنت اللي خبطتها العربيه ليلي اللي شغاله في محل الرياضة ده
ادهم: اه اه افتكرت افندم خير؟
الراجل: معلش لو مفيهاش غلاسه هو انت تعرف ليلي دي كويس؟؟؟
ادهم اتردد يقوله ايه بس افتكر ليلي لما حذرته انه يقول انهم مرتبطين
ادهم: اه اعرفها شويه يعني عادي جيران شغل
الراجل: اه طيب تعرف اخلاقها ايه؟
ادهم: اخلاقها؟ حضرتك اسئلتك غريبه بس هيا انسانه محترمه بس ليه الاسئله دي؟
الراجل: ابني الكبير جالي هنا وكانت بتشتري اكل وشافها واتكلم معاها وعجبته قوي وعايز يتعرف عليها اكتر ويخطبها فقولت اعرف انا عنها كل حاجه الاول قبل ماهو يرتبط بيها
ادهم بيسمع الكلام ده والنار بتولع جواه اكتر واكتر وسيطر علي نفسه بالعافيه علشان ما يضربش الراجل ده
ادهم: اممم طيب انا معرفش حاجه عنها بعد اذنك
سابه ومشي لانه مش ضامن نفسه لو وقف اكتر هيعمل ايه
طلع مكتبه زي المجنون رايح جاي وكل ما حد يدخله يطرده بره
افتكر عم حسين وهو بيقوله لو ضاعت منك هتندم واهو فعلا هيتجنن
بيتخيلها تضحك وتهزر مع واحد تاني غيره ده ممكن يقتلها
ايه ده من امتي هو غيور كده؟؟؟ ماهو ارتبط ببنات قبل كده بس عمره ما حس بنار جواه كده؟؟؟ عمره ما حس انه عايز يقتل حد قبل كده؟؟؟
ابوه دخل عليه ولسه ادهم هيزعق
ادهم: قولت مش عايز حد
قاطعه علي: ده انا في ايه مالك؟
ادهم: اسف مفيش
على: هتولع في الناس والشركه وتقول مفيش مالك فيك ايه!؟؟؟ مره مبسوط ومره فرحان ومره عاقل ومره مجنون فيك ايه؟
ادهم: قولت لحضرتك مفيش
على: مين هيا؟؟؟
ادهم: مين هيا ايه؟
علي: اللي عامله فيك كل ده؟؟ انت ابني وانا عارفك اكتر من اي حد؟؟ ومفيش حاجه تجنن الراجل غير واحده فمين هيا اللي قلبتك حالك كده؟؟؟
ادهم: _____
على: ايه مش هتقول لابوك؟
ادهم: مش حكايه مش هقول بس الموضوع انتهي فملوش لازمه الكلام
على: ومين اللي نهاه ونهيتوه ليه؟
ادهم بعصبيه: علشان هيا متخلفه ___ متخلفه وغبيه وغبيه
على: متخلفه مرتين وغبيه مرتين اممممم ده الموضوع كبير بقي طيب ايه رايك لو تحكي لابوك الراجل العجوز الموضوع من اوله وتسيبني انا احكم اذا كانت هيا المتخلفه و الغبيه ولا انت؟؟؟
ادهم: انا مش غبي ولا متخلف
علي: انت هتقولي ما انا عارفك
ادهم: قصدك ايه بقي هاه؟
علي: مقصديش احكيلي الاول
ادهم: انت عندك شغل
على: في داهيه الشغل المهم ابني حبيبي ميبقاش هيتجنن كده قولي الحكايه من اولها
ادهم فضل مع ابوه وحكاله من اول يوم لحد النهارده
ادهم: بس وهو ده اللي حصل من اول يوم لحد النهارده مين بقي اللي غلطان؟؟؟؟
علي: سيبك من مين الغلطان انا هسالك سؤال واحد تجاوبني عليه بصراحه
ادهم: اتفضل
علي: انت بتحبها ولا هيا مجرد بنت عاديه؟؟؟؟؟ ودولي دي ايه بالنسبالك انت تعرفها اهو من كام سنه وكل سنه كانت بتسافرلك وتقضي معاك كام اسبوع ولا شهر
ادهم: دولي دي سوري بس just for fun
No thing serious
علي: طيب وهيا عارفه كده؟
ادهم: عارفه وكل يوم بقولها ان انا مبحبهاش
وهيا مجرد _____ يعني انت فاهم اكيد
علي: فاهمك طيب وليلي؟؟؟
ادهم: ليلي!!! ليلي حاجه مختلفه! مختلفه عن اي شيئ مريت بيه او حسيت بيه
عندها مقدره غريبه انها تخرجني من قمه الحزن لقمه الفرح والعكس بتجنني بلحظه
مش عارف اقولك ايه عنها مجنونه هيا؟؟ تخيل بترفض دعوتي في مطعم five star علشان تروح محل كشري او تركب عربيتي وتتنطط في مواصلات غريبه انسانه غريبه
علي: كده انت جاوبتني علي سؤالي
هيا انسانه بسيطه بترضي بحاجات بسيطه وانت كدبت عليها وفهمتها انك زيها فليه مستغرب دلوقتي؟ وبعدين انت عشت في وسط متحرر جدا وده يمكن يكون غلطي انا
انا خليتك تعيش معظم حياتك بره مصر وده خلاك تتطبع بطباعهم وتنسي طباعنا هنا
وللاسف يا ادهم انا سيبتك بره كتير ومكنتش اب كويس لاني معلمتكش اهم مبادئ دينك وعرفتك الحرام والحلال وسيبتك وقولت اهو شاب خليه يعيش سنه بس للاسف كان المفروض اعلمك الحرام والحلال
اللي انت بتطلبه من ليلي ده مش ثقه ده بالنسبالها هيا بتتخلي عن دينها و قيمها ومبادئها
ادهم: ماهي دولي اهي بتتمني بس اشاره مني وهتبقي في السرير معايا
علي: دولي عايشه في نفس الوسط بتاعك ولا قيم ولا اخلاق
علاقتك اللي بدولي اللي بتسميها
Just for fun
دي حرام جدا ومن اكبر الكبائر كمان اما ليلي فدي بنت نظيفه ولسه بريئه حافظ عليها هتصونك وتحافظ عليك
وبعدين انت قرفان منها ومش طايقها ليه بقي عايز ليلي تبقي زيها؟؟؟
ادهم: انا مش عايزها زيها بس عايزها تسمحلي اقرب منها اكتر
علي: مش هتسمحلك وده اللي مجننك عليها ولو بتحبها صح هتقبلها كده زي ماهيا
اتمني انك تعرفني عليها بس ده اكيد بعد ما تكشف ورقك قدامها
ادهم: مش دلوقتي لو كشفته هخسرها مش دلوقتي.... هكمل معاها واشوف هتوصلني لحد فين
علي: وابقي طمني عليك
ادهم حاول يكلم ليلي بس هيا رفضت حتي تديله اي فرصه علشان يكلمها فيها
اخيرا استناها وهيا مروحه بيتها واول ما خرجت من المحل لقته بيشدها من دراعه ويسحبها بعيد عن اختها وصاحبتها ويدوب صاحباتها هيلحقوها فماجده منعتهم وقالتلهم يسبوهم لوحدهم يصفوا امورهم
ادهم: سيادتك ما بترديش عليا ليه؟
ليلي: وارد عليك ليه؟ انت كنت واضح في كلامك لما مشتني وطردتني بره عربيتك ولا نسيت؟
ادهم: ده كان اختيارك انتي؟
ليلي: اه صح نسيت اصل انا اللي شرط عليك يا اما ارضي مزاجك ورغباتك يا ما تلزمنيش
ادهم: انا مقولتش كده ابدا
ليلي: ده معني اللي طلبته مني
ادهم: ماعلينا مش ده اللي عايزك فيه
ليلي: امال سيادتك جاي ليه؟
ادهم: يا الله منك.... المهم انتي ايه اللي بينك وبين ابن صاحب المطعم؟؟؟
ليلي: مطعم ايه وابن مين انت بتتكلم عن مين؟
ادهم: متعمليش فيها عبيطه انتي عارفه انا بتكلم عن ايه
ليلي: لا مش عارفه انت بتتكلم عن ايه
ادهم: اه امال ابن صاحب المطعم عايز يخطبك كده لله في لله كده ولا اتسحر من نظره
ليلي: انا مش فاهمه انت بتتكلم عن ايه وبعدين انا مش ملزمه اوضح لحضرتك اي حاجه بعد اذنك
ويدوب هتمشي مسكها من دراعها جامد
ادهم: انا مخلصتش كلامي ردي علياايه اللي بينك وبينه وعايز يخطبك ليه لما هو ما يعرفكيش؟
ليلي: اولا مفيش حاجة بينه وبينه
ثانيا مش كل الناس زي سيادتك لازم يجربوا الاول قبل ما ياخدوا خطوه جديه في ناس بتكفيها الاخلاق والسمعه
ادهم: قصدك ايه هاه؟ وبتلمحي لايه سيادتك؟
ليلي: ما بلمحش ولعلمك لو فعلا ابن صاحب المطعم اتقدملي هوافق عليه بعد اذنك
ادهم: بقي كده ماشي براحتك بس لعلمك انتي انا كل يوم في الفتره اللي فاتت كنت بنام في حضن واحده وبتديني كل اللي عايزه مش مجرد بوسه او مسكه ايد بعد اذنك
سابها ومشي وهيا اتجمدت مكانها
ايه اللي قاله ده؟؟؟ هو معقوله ده؟ هو في ناس كده؟ لألأ ممكن بيقول كده بس علشان يضايقها زي ماهيا قالت انها هتوافق علي غيره علشان تضايقه ايوه اكيد كده اكيد كده
ماجده جت واخدتهاوروحو وهيا طول الطريق ساكته مصدومه مش عارفه تتكلم
ادهم ركب عربيته وساقها ولقي نفسه علي الكورنيش في المكان اللي قعد فيه مع ليلي اخر مره واتخانقوا فيه وبيسال نفسه
هو ليه قالها كده؟ هو من يوم ما عرفها ما لمسش واحده ابدا وندم علي اي علاقه عاشهاقبلها؟؟؟ ليه بدال ما يصالحها زعلها اكتر؟ هو بس كان ناوي يقولها قد ايه بيحبها وبدال كده جرحها
ليلي طول الليل تعيط واصحابها مهما يقولو او يعملوا معرفوش يخرجوها من حالتها
واخيرا كل واحده راحت بيتها
وفاء وهيا داخله بيتها لمحت محمد جاي ابتسملها اول ما شافها وهيا ردتله ابتسامته
محمد: ده ايه الصدف الجميله دي؟
وفاء: اخبارك ايه؟ وشغلك اخباره ايه؟
محمد: الحمد لله تمام هانت اهي
وفاء: ايه هيا اللي هانت؟
محمد: يعني اخلص شويه التزامات وحاجات كده وساعتها هعرف اخد خطوه
وفاء: خطوه ايه بالظبط؟
محمد: خطوه اقرب فيها من اللي عايزه
وفاء: وايه هو اللي انت عايزه؟
محمد: مش ملاحظه ان اسئلتك كتير؟؟ ؟
وفاء: مش ملاحظ ان كلامك الغاز ؟؟؟؟
محمد: ولا الغاز ولا حاجه كلامي واضح بس للي بيفهم
وفاء: واللي ما بيفهمش؟؟
محمد: يستني بقي الايام تفهمه
وفاء وفاء
وفاء: ايوه يا ماما حاضر طالعه
مامتها: اطلعي يا بنتي الوقت اتاخر
محمد: مساء الخير يا ست الكل
مامتها: مساء النور يا شكوكو ما تتطلع
محمد: لا زي ما حضرتك قولتي الوقت متاخر
تصبحوا علي خير
وفاء: صح قبل ما تدخل شوف ليلي وحاول تتكلم معاها
محمد: هيا كانت كويسه ايه اللي حصل تاني؟
وفاء: اتكلم انت معاها تصبح علي خير
طلعت لامها اللي واقفه مستنياها
مامتها: يعني لو حد شافكم واقفين كده في نص الليل مع بعض يقول عليكي ايه؟
وفاء: اولا محدش شافنا وبعدين احنا جيران ومحدش هيتكلم علينا
غير كده بقي مش مهم اي حد
مامتها: ومالك مبسوطه قوي كده هو قالك ايه؟
وفاء: هو ما قالش بس لمح انه هياخد خطوه
مامتها: هياخد خطوه مين قالك ان الخطوه دي بقي لصالحك؟؟
وفاء: هو قال ان الحدق يفهم تصبحي علي خير
محمد دخل لاخته وفضل يرغي معاها شويه وهيا مسهمه ومش بترد
محمد: الظاهر ان انا بتكلم مع نفسي
ليلي: اسفه يا كوكو بس متضايقه حبتين
محمد: هو ادهم اخباره ايه مفيش جديد؟
هنا ليلي اتفجرت في العياط
محمد: هو ده بقي السبب اللي واخدك مني احكيلي ايه اللي حصل
حكتله ليلي علي الحوار اللي دار بينهم
محمد: بصي بقي احنا مش عايزين نسبق الاحداث بس معني انه يتجنن كده لما يسمع ان حد اتقدملك انه لسه بيحبك وعايزك هو بس محتاج وقت يراجع فيه نفسه
ليلي: واللي قاله انه كل يوم مع واحده!!!
محمد: ليه دنجوان هو!!!!! لا هو بس قال كده علشان يغيظك زي ما انتي غيظتيه وقولتيله انك هتوافقي علي الراجل لو اتقدملك هو واجهك بنفس السلاح اللي واجهتيه بيه الغيره
ليلي: يعني مفيش بنات؟
محمد: ما اظنش وبعدين هيجيب منين بنات كل يوم
ليلي: وهيا البنات قليلة انت اصلا ما شفتوش هو شكله ايه اصلا
محمد: شكله ايه يعني؟ اهو راجل زي اي راجل
ليلي: لا طبعا ادهم امور جدا شعره طوله عرضه لبسه ابتسامته طريقه كلامه كله علي بعضه كده بيسحر
محمد: بتتكلمي علي واحد من بتوع السيما سيادتك
ليلي: اهو شبهم كده عامل زي احمد عز بطوله وعرضه بس علي احلي
محمد: احلي كمان لا ده الموضوع كبير كل ده وسواق
ليلي: ساعات بحس انه مش سواق اصلا عامل زي الناس الارستقراطيين كده
زوق اتيكيت طريقه اكله لبسه كلامه غريبه
محمد: انا فعلا من كلامك كده مش حاسه سواق ابدا
بس يمكن يكون ابن ناس يعني من الطبقه المتوسطه ولا غني ولا فقير واتعلم كويس
ليلي: ممكن تقريبا كده هو خريج مدارس لغات لانه بيتكلم انجليزي كتير وبطريقه حلوه
محمد: يمكن علي العموم نامي دلوقتي والصبح ربنا يسهلها
ادهم الليل كله بيتخيل ليلي بفستان ابيض طويل وواقفه قصاده واول ما بيقرب منها بتجري وتروح لغيره وكل شويه يقوم من نومه مفزوع ومستني النهار يطلع باي طريقه
ليلي بتحلم طول الليل بادهم وحواليه بنات كتير وكلهم في حضنه وكلهم بيبصولها ويشاورو عليها ويضحكوا وهو بياخد واحده وري التانيه في حضنه
اخيرا انتهي الليل بكوابيسه قامت هيا واختها ونزلو شغلهم واول ما وصلت لقت ابن صاحب المطعم مستنيها واسمه امجد واول ما شافته افتكرته هيا كانت نسياه خالص هيا فعلا اتكلمت معاه مره او اتنين مش اكتر وهيا بتجيب اكل
امجد: صباح الخير انسه ليلي
ليلي: صباح النور
امجد: انا امجد ابن
قاطعته: انا عارفه حضرتك خير
امجد: كنت عايز اتكلم معاكي شويه
ليلي: اتفضل قول
امجد: لا هنا مش هينفع
ليلي: وغير هنا مش هينفع برضه
امجد: يبقي في بيت حضرتك اديني عنوانكم وهنيجي انا والدي البيت ونخليه ينفع ايه رايك؟
ليلي: افندم؟؟؟ انت بتقول ايه؟
امجد: بقول لحضرتك اديني العنوان
ليلي بتضحك باستغراب وشيئ لا ارادي خلاها تبص حواليها لمحت ادهم وافق بعيد ساند علي عربيته بيتفرج عليها والنار طالعه من عنيه بصتله نظره طويله قبل ما تجاوب علي امجد
ونكمل بكره
ادهم هيعمل ايه؟
ليلي هتجاوب امجد بايه؟
ShiMoOo
الحلقة السابعه
حبيبي المجهول
ليلي واقفه مع امجد وهو مستني اجابتها انها تديله عنوانهم وبصت وراها لقت ادهم واقف ومراقب الموقف بصتله نظره طويله وبعدها بصت لامجد ساعتها عرفت انها عمرها ما هتقدر تكون مع اي حد غير ادهم وبس
امجد: هاه عنوانكم ايه؟
ليلي: انا اسفه يا استاذ امجد بس انا في حد في حياتي فمش هقدر ادي لحضرتك العنوان
امجد: امممم يا بخته المحظوظ ده
ليلي: الله اعلم بقي اذا كان يا بخته ولا امه داعيه عليه
ضحكوا هما الاتنين وبعدها امجد مد ايده يسلم علي ليلي
امجد: على العموم فرصه سعيده جدا يا ليلي
ليلي: انا اسعد واسفه
امجد: لا لا ما تتاسفيش المهم اشوفك علي خير وابقي اعزميني لما تاخدوا خطوه
ليلي: باذن الله
طبعا ادهم شاف ضحكهم وشاف ايديهم في ايدين بعض فعرف ساعتها انه خسرها وانه هيبدا يندم انه ضيعها من ايده
عطاهم ضهره ومشي
ليلي بصت وراها بس ما لقتش ادهم واقف مكانه فجريت علي المكان يمكن تلحقه بس مالقتلوش اثر
وقفت مكانها تفكر تعمل ايه؟ تدخله تسال عليه ولا ايه بالظبط؟
ويدوب هتدخل سمعت ماجده بتنادي عليها
راحتلها
ماجده: وبعدين صاحب الشغل كل شويه يسال عليكي انجزي ادخلي
ليلي: عايزه اشوف ادهم فين الاول
ماجده: مش وقته خالص ادخلي وبعد شويه
ابقي اخرجي تاني
فضلت ليلي اليوم كله عينها علي المكان اللي ادهم ديما بيقعد فيه بس ما ظهرش
حاولت تتصل بيه موبيله مقفول
واخر النهار حاولت برضه تشوفه معرفتش او يفتح تليفونه بس برضه مفتحوش
الليل كله بتحاول تكلمه بس نفس النتيجه
واول ما النهار نور نزلت جري وراحت وقفت قدام مدخل الشركه بحيث تشوفه اول ما يوصل فضلت مستنيه والكل بيبصلها باستغراب والكل بيسال واقفه ليه هنا وعايزه ايه يا تري؟
اخيرا عربيه ادهم شافتها وقف قدام الشركه وركن العربيه كان معاه باباه ومامته
نزل من العربيه وواقف فلمح ليلي واقفه وللحظه معرفش يعمل ايه بس بعدها راح ناحية ابوه اللي راكب جنبه فتحله الباب وفتح لمامته الباب
علي: ده ايه الادب ده كله؟
مامته: روح قلبي حبيبي
الاتنين بيضحكوا وهو جامد ملامحه
ليلي: لو سمحت يا ادهم ممكن للحظه؟
الكل بصلها باستغراب ويدوب مامته هتتكلم فادهم بص لابوه انه يلحقه
طبعا ابوه شك ان دي ممكن تكون هيا حبيبه ابنه فابتسم
علي: يالا يا ريري بينا فوق وانت خلص بسرعه وتعال عايزك
ادهم: حاضر ثواني
ريهام: ايه ده لحظه؟؟
علي: تعالي عايزك فوق يالا
سحبها ابوه ومشي لانه عارف ان مراته مش هيعجبها اي شيئ من اللي بيحصل
اول ما طلعوا وسابوهم
ادهم: انتي اتجننتي؟؟؟؟ واقفه هنا ليه؟ وعايزه ايه؟
ليلي: انت قافل تليفونك من امبارح ليه؟
ادهم: اعتقد ان ده شيئ ما يخصكيش
ليلي: لا طبعا يخصني،، اي شيئ يخصك يبقي يخصني
ادهم: يا سلام!!! وده من امتي؟ وسي امجد يطلع ايه ان شاءالله؟
ليلي: يطلع مجرد واحد طلب ايدي واترفض مش اكتر ولا اقل
ادهم بصلها بانتباه ولمعه في عينه
ادهم: اترفض؟؟؟؟؟
ليلي: ايوه اترفض
ادهم: ورفضتيه ليه؟ مش هو واحد بيفهم صح ويتصرف صح واحسن مني!؟؟؟
ليلي: مفيش حد في الدنيا دي كلها احسن منك فاهم؟ مفيش حد ابدا ابدا ممكن يحل محلك في قلبي
اول ما بصتلك امبارح وانت واقف بعيد وعينك عليا عرفت ان عمري ما هحب حد غيرك ابدا
عرفت اني بحبك انت وبس
ليلي بتتكلم وادهم واقف وحاسس ان الدنيا هترجع تضحكله من تاني بعد الكابه اللي عاشها ليله امبارح
لمح كذا عربيه بتقف قدام الشركه فمسك ليلي من ايدها وشدها وراه
اخدها عند المدخل الخلفي للشركة في المكان اللي بيتقابلو فيه بس المره دي فتح الباب ودخلوا جوه
ليلي: حد ممكن يجي هيبقي شكلنا وحش
ادهم: لا ما تقلقيش السبب الوحيد اللي خلاني اختار المكان ده لما احب اهرب انه معزول ومحدش بيجي فيه ابدا المهم خلينا في المهم
ليلي بتقرب منه: وايه هو المهم؟
ادهم: انتي مش قد القرب ده ونتيجته فخليكي بعيد احسنلك
ليلي: وحشتني قوي يا ادهم
ادهم: وانتي كمان وحشتيني الفتره اللي فاتت عرفت اني مقدرش ابعد عنك ابدا وان حياتي من غيرك فاضيه وملهاش طعم انا عايز افضل جنبك باي شكل او طريقه انتي تحدديها
ليلي: لا شكل ولا طريقه كل اللي عيزاه انك تفضل جنبي وموجود في حياتي وبس
ادهم: وده نفس اللي انا عايزه خلاص؟
ليلي: لا مش خلاص
ادهم: ايه تاني في ايه؟
ليلي: انت قلتلي انك كل يوم كنت في حضن واحده شكل وانك نمت مع بنات تانيه ده صح؟
ادهم: انتي شايفه ايه؟
ليلي: انا مش شايفه انا بسالك
ادهم: لا يا ليلي اه روحت وسهرت في اماكن زي كده واتعرض عليا بس معرفتش ابص لواحدة تانيه غيرك صورتك كانت قدامي طول الوقت ما فارقتنيش ابدا
ليلي: انت كنت عايز تنام مع واحده تانيه بجد؟
ادهم: مش حكايه انام مع واحده تانيه الحكايه اني كنت عايز اثبت لنفسي انك مش مهمه قوي في حياتي وفشلت فشل ذريع
ليلي: وانت متضايق انك فشلت؟؟؟
ادهم ابتسم: لا مش متضايق اينعم كنت متضايق ساعتها بس حاليا انا مبسوط اني فشلت
ليلي: ما تيجي تسكن عندنا؟؟؟
ادهم: افندم؟ ؟ اسكن فين؟
ليلي: في شقه جنبنا فضيت وطقت في دماغي اقولك تيجي فيها
ادهم: شقه جنبكم؟؟؟؟
ليلي: هيا مش شقه شقه يعني؟؟
ادهم: مش فاهم يعني ايه مش شقه شقه؟؟؟
ليلي: اولا هيا دور ارضي
ثانيا هيا اوضه واحده واسعه وطرقه فيها مطبخ وحمام وبس
ادهم مستغرب هو في ناس ممكن يعيشوا في اوضه واحده وبس
ادهم: اممم اوضه واحده؟؟؟
ليلي: انت واحد وبعدين هنكون مع بعض الصبح في الشغل قصاد بعض واخر النهار برضه قصاد بعض ايه رايك؟ ؟
ادهم: اديني فرصه ادرس الموضوع وارد عليكي
ليلي: هترد امتي علشان نكلم صاحب البيت؟؟
ادهم: اخر النهار اوك
ليلي: اوك هسيبك بقي واروح شغلي باي
ادهم: خليكي معايا شويه
ادهم مسك ايدها وهيا المره دي سابته لانها خافت انه يسيبها هيا لو سابت ايده
ادهم: غريبه ما سحبتيش ايدك ليه؟
ليلي بصت للأرض: علشان!!!
ادهم: علشان ايه؟
ليلي: علشان خايفه
ادهم قربلها ورفع راسها بايده بكل رقه علشان تبصله
ادهم: خايفه من ايه؟
ليلي: خايفه تزعل مني وتسيبني تاني
ادهم مسك وشها بايده الاتنين وبصلها في عنيها وهو قريب منها قوي
ادهم: شوفي انا مش هنكر اني بتضايق لما تسحبي ايدك من ايدي او تحطي مسافه بينا اه بتضايق واه بتخنق بس عمري يا ليلي ما هسيبك علشان حاجه زي كده ومهما ابعد هرجع تاني فاهمه؟ من هنا ورايح مش عايزك تعملي حاجه غصب عنك ولا تخالفي دينك ومبادئك وتربيتك حتي ولو علشاني انا فهمتيني حبيبه قلبي؟؟
ليلي: حبيبه قلبك؟ بجد يا ادهم حبيبه قلبك؟
ادهم: واكتر كمان
ليلي سندت راسها علي صدره وسحبت نفس طويل مليان ارتياح وهو واقف عايز يضمها جامد بس خايف من رد فعلها فيدوب ايده حواليها براحه كانها شيئ هش
ليلي شيئ جواها بيترجاها تتمادي اكتر واكتر وتضمه اكتر واكتر
ادهم حس بالحرب اللي جواها فسهلها عليها وبعد هو عنها
ادهم: روحي شغلك دلوقتي وهبقي اكلمك
ليلي بتبصله باستغراب
ادهم: ايه مستغربه ليه؟
ليلي: علشان انت كنت عايز ده
ادهم: ومازلت عايزه بس عايزه برضاكي من غير الحرب اللي جواكي دي عايزك لما تسلميلي نفسك يبقي برضا واقتناع وفي مكان طبعا غير ده
ليلي: في بيتك صح وقدام الكل مش سرقه
ادهم ابتسم: في بيتي وفي النور ان شاءالله
اديني بس فرصه وانا هظبط كل حاجه بس المهم انك توعديني انه مهما يحصل تفضلي جنبي اوعديني
ليلي: اوعدك انك طول ما بتحبني وعايزني في حياتك عمري ما هبعد عنك ابدا اوعدك
راحت ليلي شغلها وهيا الدنيا مش سايعاها من الفرحه
ادهم كمان طالع فرحان ابوه فهم انهم اتصالحوا لكن الفضول هيقتل امه اللي ادهم رفض يعرفها اي حاجه وقالها انها مجرد بنت عايزه حاجه وخلاص
ادهم قال لابوه علي عرض ليلي انه يسكن عندهم
علي: هههههه هههههههه هههههههه
ادهم واقف ايديه في وسطه ومستغرب
ادهم: ممكن اعرف انت بتضحك ليه؟
علي: عليك طبعا؟ انت تسكن في مكان شعبي ولوحدك وفي اوضه؟؟؟ انت اتجننت ولا ايه؟
ادهم: اتجننت ليه؟ فين المشكله؟؟ هروح يدوب علي النوم
على: هتاكل ازاي؟ هتنظف المكان ازاي؟ هتعيش ازاي؟
ادهم: سيادتك ناسي انا عشت كام سنه بره لوحدي ولا ايه؟
علي: لا مش ناسي بس حضرتك الظاهو انك ناسي ان انت كنت قاعد في فيلا فيها خدم وحشم وطول بعرض مش اوضه ولوحدك
ادهم: هجرب مش هخسر حاجه
على: الموضوع بيكبر والكدب بيكتر وده مش حلو ابدا انت عايز توصل لايه؟
ادهم: عايز اعيش حياتها واشاركها فيها قبل ما اخدها هيا لحياتي
على: وانت هتاخدها فعلا لحياتك؟؟؟
ادهم: طبعا انا بحبها بجد
علي: لا بس هيا مزه الصراحه
ادهم: مزه؟؟ بقي في اب يقول لابنه علي حبيبته انها مزه ابهات اخر زمن
على: خلاص يا عم ما تزقش المهم والدتك مش هتتقبلها بسهولة
ادهم: اممم وهنا يجي دور سيادتك انت تقنعها
على: امك مش هتقبل واحده عاديه تدخل عالمها
ادهم: والله هيا مش هيكون قدامها خيارات اصلا يا تقبلها يا تخسرني
على: ربنا يستر
ادهم كلم ليلي وقالها موافق يسكن عندها وهيا كلمت محمد اخوها علشان يقابل صاحب البيت مع ادهم ويتفقوا وفعلا اخر النهار ادهم راح معاهم وقابل محمد وشاف الاوضه وكانت صدمه عمره
الحيطان واقعه والارض بلاط ومكسر وكل حاجه متبهدله واستغرب ازاي في ناس عايشه كده؟
اتفقوا وادهم فعلا اجر الشقه ومحمد اخدوا البيت عندهم
اخيرا ادهم بقي في بيت ليلي
بيتهم كان بسيط جدا 3 اوض صغيرين
اوضه لليلي وماجده واوضه لابوهم واوضه لخالد ومحمد وصاله صغيره فيها كنبه وتليفزيون وكراسي بلاستك والارض مفروشه حصاير شقتهم كلها كانت قد اوضه نومه بس
ابوي ليلي كان شخصيه كوميديه جدا
راجل طيب وبيحب الهزار والضحك وعلي طول اي قعده هو فيها بيبقي الكل بيضحك
ادهم حس باحساس دافي في بيتهم البساطه وعدم التكلف واحساس العيله عجبه قوي
وطبعا عم فتحي ابو ليلي عجبه جدا بخفه دمه وهزاره
ليلي كانت خايفه من مقابله ادهم لعيلتها بس الكل حبه وهو حب الكل
طبعا صاحباتها كل واحده بتيجي باي حجه علشان تشوفه
ادهم اي تردد جواه ناحيه الاوضه اختفي بعد مقابلته لاهل ليلي
طبعا جاب عمال يحولو الاوضه لمكان يصلح للسكن
العمال شغالين وفعلا الاوضه بدات تتغير
وجه وقت الدهان
ليلي معده في الشارع كان الشباك مفتوح فوقفت لقت ادهم واقف وبيدهن بنفسه الحيطان
ليلي: الشده
ادهم: افندم؟
ليلي: امم عمي الامريكاني ازيك قصدي
ادهم: كويس وانتي رايحه فين كده؟
ليلي: مالكش فيه
ادهم: افندم؟
ليلي: ايه افندم افندم اللي طالعلي فيها دي؟
ادهم: رايحه فين؟
ليلي: هشتري حاجه من على الشارع هجيب اكل هاه ارتحت
ادهم: تحبي اروح انا؟
ليلي: تسلم بس لا المهم بتدهن بنفسك يعني؟
ادهم: هوايه بس غريبه انتي واقفه كده عادي
هيا ام امل مش قاعده في محلها ولا ايه؟
ليلي: لا مش قاعده ولا هيا ولا جوزها وبعدين دي بقاله صغيره مش محل المهم
ادهم: قولي يا عيوني المهم
( بقاله ام امل في وش شباك ادهم بالظبط وام امل دي شخصيه طيبيه بس حشريه حبتين وعندها كل اخبار الشارع)
ادهم قرب من ليلي ومسك ايدها وباسها
ليلي استغربت واتفاجئت وسحبت ايدها بسرعه
ليلي: انت بتعمل ايه؟
ادهم: انا عملت وخلاص المهم قولي المهم بتاعك
ليلي: امم عايزه الاوضه لونها موف في بينك معرفش ازاي وعايزه في الحيطه اللي في وشي دي قلب كبير موفي غامق وتحته هيكون السرير والحيطه دي اللي جنبي يبقي فيها ورد والحيطه اللي في وشها الدولاب
وهنا تحت الشباك كنبه كده مريحه وهنا جنب الشباك شاشه كبيره والناحيه دي التسريحه
اما الطرقه بره تحط فيها تربيزه سفره صغيره
ادهم بيسمعها بابتسامه عريضه
ليلي: ايه مالك مش عاجبك كلامي؟
ادهم: لا ياقمر عاجبني بس حسستيني انها الشقه اللي هنتجوز فيها
ليلي: وماله فيها ايه نتجوز فيها انا موافقه
ادهم: موافقه تتجوزي في اوضه؟؟؟
ليلي: اه موافقه المهم ابقي معاك وبس
ادهم: انتي غريبه
# ازيك يا ليلي # ازيك يا ادهم
ادهم: اهلا يا ام امل اخبارك ايه؟
ليلي: ازيك يا ام امل هاه حد عايز حاجه من علي الشارع؟
ادهم: لا متشكر
ام امل: شكرا يا حبيبتي
ليلي جريت بسرعه وسابتهم
يوم وري يوم بيعدي وادهم قافل شباكه ومش بيفتحه نهائي ومشغول كمان عن ليلي
وفي يوم ليلي راجعه هيا وماجده من شغلها لقت الشباك مفتوح وصاحبتها شرين وهبه ووفاء بيتفرجوا وقفت معاهم واستغربت من اللي شافته
شافت كل حاجه زي ما قالت بالظبط
القلب الموف المرسوم الورود اللي طلبتها
اوضه النوم كانت وهم
كل الالوان متجانسه مع بعض بطريقه اجمل من اللي اتخيلتها
وفاء: دي بقت تحفه ايه ده!!!
سمر: بقي دي الاوضه المعفنه الكسره بقت كده!
هبه: دي ولا القصر بصوا اوضه النوم نفسها عامله ازاي ولا الشاشه كل حاجه تحفه
ماجده: بت يا ليلي انتي تنحتي ليه؟
ليلي: ما تخيلتش ابدا انه هيعمل زي ما قلتله
هنا ادهم كان خارج من جوه ولابس برنس الحمام واول ما شافهم ابتسم
ادهم: ده انا نسيت انه بث مباشر
البنات ضحكوا وجريو وباركوله وهما ماشين
ليلي وقفت لحظه
ادهم: عجبتك!؟؟!
ليلي: طبعا دي احلي من اللي كان في خيالي
كده انا مش هتنازل عنها ابدا
ادهم: مش يمكن اسكنك في قصر احلي منها مليون مره!!!
ليلي: دي عندي بمليون قصر سلام بقي دلوقتي
ادهم مستغرب منها ومن قناعتها باي شيئ بسيط
لازم بقي يواجهها بالحقيقه في اقرب وقت
اتعرف علي جيرانها واخواتها وقرب من الكل
وفي يوم لقي ليلي مصره تقابله بره
فخرجو مع بعض الصبح قبل الشغل
ادهم: خير اول مره تصري كده ان احنا نتقابل بدري كده؟
ليلي: عندي مفاجأة ليك
ادهم: ربنا يستر قولي
ليلي: بقولك مفاجاه
ادهم: خلاص ماشي اتفضلي قولي يا قمر
ليلي: انا واحد من اللي بابا شغال عندهم صاحب شركه كبيره هو بيعز بابا قوي وجه عندنا حتي البيت كذا مره وعارفنا كلنا
ادهم: اهممم وبعدين؟
ليلي: جه عندنا امبارح اتغدي معانا وانا كلمته عنك ووافق
ادهم: كلمتيه في ايه ووافق علي ايه بالظبط؟
ليلي: عنك انك تشتغل عنده بشهادتك
ادهم: ومين قالك اني عايز شغل؟؟
ليلي: هتشتغل مهندس يا حبيبي وبراتب كويس مش سواق
ادهم: وانتي مين قالك اني راتبي حاليا مش كويس؟ ولا انتي مش عايزه ترتبطي بسواق؟
ليلي: لا طبعا انت عارف ان ده مش قصدي بس دي فرصه كويسه تشتغل في مجالك وحتي لو براتب ااقل بس بشهادتك الفلوس مش مهمه يا ادهم
ادهم: يعني ايه الفلوس مش مهمه؟؟
ليلي: يعني مش مهمه المهم راحتك النفسيه وتشتغل في مجال انت بتحبه اكيد دخلت هندسه علشان تشتغل مهندس مش سواق ولا ايه! وبعدين جرب مش هتخسر حاجه روح شوف الشركه وقابل الراجل واتكلم معاه وبعدها قرر براحتك علشان خاطري وافق علشان خاطري
ادهم: ليلي حبيبتي خاطرك علي راسي بس انا مش عايز شغل انتي مش فاهمه حاجه
ليلي: طيب فهمني ايه اللي مش فهماه؟
ادهم: افهمك ايه بس؟ انا مش محتاج شغل
ليلي انا اصلا
ليلي: انت اصلا ايه؟ مالك متردد ليه؟
ادهم: توعديني الاول انك تفضلي جنبي مهما يحصل؟
ليلي: ايه لازمته الكلام ده دلوقتي؟
ادهم: اوعديني علشان خاطري انه مهما يحصل تفضلي معايا
ليلي: هو ايه اللي ممكن يحصل يا ادهم؟؟
ادهم: توعديني ولا لأ؟؟؟
ليلي: طبعا اوعدك اني افضل معاك علي طول مهما يحصل
طول ما انت عايزني جنبك هفضل
ادهم: وانا عايزك علي طول جنبي
ليلي: يبقي انا هفضل علي طول جنبك
ادهم قرر انه لازم يصارحها بكل حاجه وكفايا يخبي عليها بقي
ادهم: انا في حاجه لازم تعرفيها عني؟؟
ليلي: ايه هيا؟؟ متجوز؟
ادهم: لا طبعا
ليلي: اتجوزت قبل كده او كنت خاطب مثلا او
ادهم: بس بس الموضوع مالوش اي علاقه بالستات اصلا
ليلي: يبقي ما يهمنيش
ادهم: بس انتي لازم تعرفيه
ليلي: خلاص براحتك طالما انت عايز تقولي قوله بس خليك عارف ان مفيش حاجه تفرق معايا طالما ان انت بتحبني
ادهم: يعني ده المهم حبي ليكي؟؟
ليلي: طبعا ده الاساس
ادهم: طيب يا ليلي انا ابقي
ونكمل بكره
يا تري ليلي هيبقي رد فعلها ايه؟
ادهم هيقولها فعلا ولا هيتراجع؟
ادهم هياخد خطوه ولا لسه؟
امه هيكون موقفها ايه؟
ShiMoOo
الحلقةالثامنة
حبيبي المجهول
ادهم قرر انه يقول لليلي الحقيقة
ادهم: ليلي انا ابقي!! يعني انا مش مجرد --- انا اصلا
ليلي: انا ابقي انا مش انا مجرد في ايه مالك!؟ ماتتكلم علي طول
ادهم: انا ابقي
تليفونه رن وكان ابوه
علي: انت فين؟ سيادتك ناسي ان في وفد المفروض تستقبله في المطار ولا ايه؟
ادهم: لا مش ناسي حاضر هكون في المطار وهستقبلهم ومش هتاخر ما تقلقش حضرتك
خلص مكالمته وقفل السكه وبص لليلي
ليلي: يالا بينا وصلني الشغل او اخد تاكسي وانت روح علشان ما تتاخرش
ادهم: هوصلك الاول يالا
ليلي: اوعي تنسي معادك الساعه 3 العصر كلمني وهبقي اقولك العنوان
ادهم: ربنا يسهل يالا بينا
راح شغله وطول اليوم بيفكر بطريقه يقولها بيها الحقيقه
راح ادهم المقابله علشان خاطر ليلي وصاحب الشركه اعجب بيه جدا وبافكاره وبذكاؤه وطلب منه يشتغل معاه بالراتب اللي يختاره
ادهم وافق علي شغله الجديد كان تجربه جديده ليه، واحساس مختلف انه يبقي شغال عند حد
ليلي فرحت جدا بقراره ده
اختها ماجده اتجوزت وكان فرحها شعبي وبسيط وفي الشارع حضره الاهل والجيران وبس
ادهم كان مستمتع بجو الفرح جدا. كان كل الناس فرحانه مفيش تمثيل ولا تزيف ولا حد بيحضر لمجرد يجامل او عنده غرض
الناس دي كل اللي بيجمعها الحب وبس
كان مستمتع كمان بالاغاني الشعبيه اللي اول مره يسمعها واتفرج علي ليلي وصحباتها بيرقصوا عليها
قرب من ليلي وهمس في ودنها
ادهم: عقبالك يا قمر
ليلي: انا وانت ان شاءالله في كوشه واحدة
ادهم: قريب قوي ان شاءالله
ليلي رقصت بطريقه جننت ادهم فاضطر براحه كده يسحبها
ليلي: في ايه مالك؟
ادهم: كفايه رقص
ليلي: ده فرح اختي
ادهم: خلاص ورقصتي شويه كفايه
ليلي: انا عايزه ارقص
ادهم: ليه علشان كل واحد يبصلك شويه ويتخيلك بترقصيله شويه
ليلي اخدت بالها انه غيران وغيران جدا كمان وده عجبها قوي
ليلي: انا برقص علشانك انت
ادهم: وانا مش عايزك ترقصيلي قدام مليون واحد خلاص
ليلي: ما تقولها!!
ادهم: اقول ايه؟
ليلي: قول انك غيران
ادهم: غيران؟؟؟ مش حكايه غيره الغيره دي بتبقي من حد مثلا خايف انه ممكن يكون ند ليا او ياخدك مني
لكن دي مش غيره دي!!! دي!!!
مش عارف دي اسمها ايه؟ بس اللي عارفه ان ده مضايقني
ليلي ابتسمت: دي اسمها غيره بس غيره علي عرضك لو انت بتعتبرني ملكك!!
ادهم: ايه طبعا بعتبرك ملكي وبتمني بجد يجي اليوم اللي تلبسيلي فيه الفستان الابيض وهعملك فرح ما اتعملش لاي حد قبل كده وده وعد مني
ليلي: بجد يا ادهم؟؟
ادهم: بجد يا عيون ادهم وقلب ادهم وروح ادهم
ادهم مسك ايدها وباسها وهيا سحبت ايدها
لانها لمحت حد جاي اتوترت بس لقته محمد
محمد: انتو هنا خالد بيدور عليكي
ليلي: حاضر هروحله
مشيت ليلي وسابتهم ومحمد وقف مع ادهم
محمد: انت بتحبها بجد؟؟؟
ادهم استغرب ان محمد عارف علاقتهم
محمد: اه عارف علاقتكم ليلي ما بتخبيش حاجه عني
ادهم: اه بحبها بجد
محمد: ولما انت بتحبها بجد ما بتخافش عليها ليه؟
ادهم: انا مش بخاف عليها؟؟؟ ازاي بقي؟؟؟
محمد: لما تطلب منها حاجات مش من حقك وتهددها انك هتسيبها لو معملتوش يبقي ما بتخافش عليها ( ادهم هيتكلم فمحمد شاورله) اخلص كلامي الاول
لما توقف معاها في الظلمه وما يهمكش حد يشوفها ويتكلم عليها يبقي مش بتخاف عليها
ادهم: خلصت!؟ اولا الموضوع الاول خلص وانا اتاسفتلها وصلحنا الوضع ده
ثانيا انا مش قصدي اقف معاها في الظلمه زي ما بتقول انا بس ضايقني رقصها وطلبت منها تبطل رقص
محمد: ده فرح اختها والموجودين اهل كلهم
ادهم: برضه مضايقني
محمد: ليلي متربيه هنا والكل عارفها وبيحترمها
ادهم: برضه مضايقني
محمد: طيب انتو حرين بس راعي ان هنا منطقه شعبيه والناس ما بتصدق تتكلم
ادهم: حاضر هراعي ده واسف اوك
يوم وري يوم وادهم نفسه يخلي ليلي تقعد من الشغل بقي وخصوصا بعد جواز ماجده بس في نفس الوقت خايف ميعرفش يشوفها تاني
بتعدي الايام وري الايام وكل يوم ادهم بيحاول يقول الحقيقه بس ديما حاجه بتقاطعه
في يوم صاحب الشركه جه البيت وقابل عم فتحي وكان متضايق جداوبيزعق كمان
: بقي دي اخرت معروفي وجميلي فيكم انا دخلته علشان خاطرك انت وبنتك. ودي جزاتي
عم فتحي: اهدي حضرتك بس وقولنا في ايه انا مش فاهم حاجه؟
صاحب الشركه: اهدي؟ اهدي؟ انا خسرت شركتي بسببك وتقولي اهدي
خالد: جري ايه يا راجل انت!؟! انت جاي ترمي بلاك علينا ولا ايه واحنا مالنا ومال شغلك؟؟
عم فتحي: بس ياخالد انت واسكت قولنا بس يا باشا ايه اللي حصل؟
هنا ليلي دخلت البيت وشافت الجو متوتر
اول مره ترجع بدري كده بس كانت مصدعه شويه واستاذنت بدري
ليلي: في ايه اللي بيحصل هنا؟ خير؟
صاحب الشركه: خير وهيجي منين الخير بس
خالد: انت يا راجل انت يا تقول في ايه يا تتفضل من هنا
عم فتحي: قولت بس يا خالد
احنا بس عملنا ايه لحضرتك؟؟
صاحب الشركه: الراجل اللي انت وبنتك اترجتوني علشان اشغله عندي
ليلي قلبها بيدق بسرعه وخايفه من اللي هيتقال عن ادهم
بتردد سالت: ماله ادهم في ايه؟
صاحب الشركه: انتي لسه بتسالي في ايه؟ بتساعدوه علشان ينصب عليا وياخد مني شركتي؟ يخليني أآ منله وانتو تشكروا فيه وانا البس في الحيط صح؟ ياتري بقي قبضتو كام منه؟؟ علشان تبيعوني ليه؟؟؟ تهون عليك يا راجل العشره ده انا طول عمري بيتي مفتوح ليك؟
خالد: انت اكيد اتجننت نبيع ايه ونقبض ايه؟
عم فتحي: مش هقول تاني اسكت انت
يا باشا احنا مش فاهمين انت بتتكلم عن ايه خالص ولا بيعنا ولا اشترينا وادهم ده ولد غلبان ساكن جنبنا هنا بقاله فتره واحنا اتوسطناله في شغل ولا اكتر ولا اقل؟؟
صاحب الشركه: وانت متخيل ان انا هصدق كلامك ده وانك متعرفش ادهم ده يطلع مين؟
ليلي اخيرا نطقت
ليلي: ادهم سواق في شر كه الخطاب جروب جنبي في الشغل في وسط البلد وجه سكن جنبنا وهو انسان كويس وعلشان كده اتوسطناله في الشغل عندك ادهم انسان كويس
صاحب الشركه: يا سلام ماهو يا انتي هبله يا مشتركه معاه في نصبه؟؟؟
ليلي: نصب ايه بس؟؟؟
عم فتحي: يا بيه كل اللي نعرفه عن ادهم انه مهندس وشغال سواق
صاحب الشركه: يعني ضحك عليكم انتو كمان ادهم يا حلوين مش سواق في الخطاب جروب ادهم هو الخطاب نفسه هو صاحب الشركه كلها وحاليا استولي علي شركتي كمان
ليلي: استحاله ادهم يعمل كده؟
صاحب الشركه: استحاله؟ اهو عمل __ ياتري بقي هو هنا استولي علي ايه تاني؟ ولا وعدكم بايه؟
خالد: ولا وعد ولا استولي وتلميحاتك دي مش عجباني
صاحب الشركه مشي بعد ما عرف انهم ما يعرفوش حاجه عنه والكلام مالوش لازمه
هو مشي وساب حاله صمت مسيطره علي الكل
وفجأه ليلي خرجت وسابتهم وخالد جري وراها وبينادي عليها
خالد: استني هنا رايحه فين؟
ليلي: سيبني لو سمحت يا خالد ساعه وجايه
خالد: هتروحيله صح وبعدين؟
ليلي بتبصله باستغراب
خالد: ايه بتبصيلي كده ليه فاكراني مش عارف انك بتحبيه؟؟ انتي فاكراني مش واخد بالي منكم ولا ايه؟ ولا مش هعرف عيون اختي الصغيره لما تلمع وقلبها لما يدق؟؟
ليلي عنيه دمعت
ليلي: يبقي تسيبني لو سمحت اروح مشواري ده يا خالد
خالد: اولا محدش في الدنيا دي يستاهل دموعك
ثانيا هسيبك تروحي بس بشرط اوصلك انا
ليلي: خالد ارجوك سيبني لوحدي
خالد: لا مش هسيبك يا اوصلك يا مفيش خروج اصلا وبعدين معايا عربيه الشغل يالا
طول الطريق وهيا ساكته وخالد احترم سكوتها لانه حاسس بالحرب اللي جواها
اخيرا وصلو قدام الشركه وركن وبصلها.
خالد: تحبي اركن عند الباب الخلفي؟
افتكرت ليلي كل مره اتقابلوا فيها هناك
ليلي: لأهنا احسن
خالد: اطلع معاكي؟؟؟
ليلي: لأ معلش انا محتاجه اواجهه لوحدي بعد اذنك
طلعت ليلي وهيا بتقدم رجل وتاخر رجل وكل لحظه عاشتها معاه بتمر زي الشريط قدامها
سالت واحد ماشي بصينيه علي كوبايات شاي
ليلي: لو سمحت مكتب المدير منين؟
الفراش: المدير الكبير ولا الصغير؟؟
ليلي: الصغير
الفراش: ثالث دور اخر الممر هتلاقي باب وهتلاقي السكرتير هو هيدخلك بس لو معندكيش معاد مش هتدخلي لانه ما بيقابلش اي حد
ليلي: متشكره قوي
طلعت ليلي زي ماقالها نادي الفراش عليها
الفراش: يا انسه في اسانسير اركبيه
ليلي: متشكره بس مش عايزه
ليلي عايزه ترتب افكارها او تحدد هتقول ايه او تقنع نفسها ان ممكن يكون في لبس في الموضوع وادهم مظلوم
مشيت ووصلت لحد قدام الاوضه
السكرتير: اي خدمه يا افندم حضرتك عايزه مين؟
ليلي: ده مكتب المدير؟
السكرتير: ايوه يا افندم بس حاليا في اجتماع مع مدراء الاقسام فلو حضرتك عندك معاد اتفضلي استني شويه
ليلي بصتله بس مش سمعاه كل اللي سمعاه مدير ومدراء ومعاد بس مش مركزه
بصت للباب وقدمت منه ومدت
السكرتير: انسه قولت لحضرتك مش هينفع تدخلي
قام من مكتبه علشان يوفقها بس هيا فتحت الباب بسرعه علي اخره ووقفت متنحه
الكل طبعا بصلها باستغراب اما ادهم فاول ما رفع راسه وشافها وقف بسرعه ولسانه اتعقد ما عرفش ينطق وهيا وافقه بتبصله ومش مصدقه ابدا
السكرتير: اسف يا افندم ___ اتفضلي حضرتك بالذوق يا اما هطلبلك الامن
ويدوب هيمد ايده يشدها
ادهم: سيبها يا محمود خلاص روح انت
السكرتير: انا اسف يا افندم بس هيا
قاطعه: قلتلك خلاص
ادهم: ليلي انا _____
ليلي: انت ايه؟ كداب ومخادع ونصاب كمان
الكل بيبص لادهم ومليون سؤال عن البنت اللي بتشتم المدير قدام ابوه كمان
ادهم: ليلي انا كنت هقولك بس في الوقت المناسب
ليلي: واديني عرفت... طيب انا وسيادتك بتتسلي و
قاطعها: انا ما بتسلاش
ليلي قاطعته: انت تسمعني وتسكت ما تتكلمش انا مش جايه هنا علشاني
انت نصبت علي الراجل ليه؟ بقي ده جزاته انه عمل خاطر ليا ولبابا؟
ادهم: راجل ايه ونصب ايه؟
ليلي: كفايه كدب بقي ورد على سؤالي
ادهم: انا ما بكدبش عليكي مش فاهم انتي بتتكلمي عن ايه؟ ؟
ليلي: عن الراجل اللي سمع كلامي ووافق يشغلك عنده وفي الاخر سيادتك تتطمع في شركته وتاخدها ايه ما بتشبعش؟؟ ولا اي حاجه بتشوفها بتبقي عايزها ولا ايه؟
ادهم: انا ما اخدتش حاجه ومش فاهم حاجه
ليلي دمعه نزلت غصب عنها ومسحتها بسرعه
ادهم: ليلي ارجوكي اديني فرصه اشرحلك
ليلي: احنا فتحنالك بيتنا واعتبرناك ________ (الدموع غصت صوتها) فارجوك رجع للراجل شركته وما تخليهوش يندم ان عرف بابا في يوم من الايام الراجل ده جمايله علينا كتير ارجوك مش هطلب من حضرتك اكتر من كده بعد اذنكم واسفه لو قطعت اجتماعكم
جريت ليلي وادهم وافق مش عارف يعمل ايه؟
اخيرا بص لابوه
ادهم: انا حكيتلك عن الشركه انت ليك دخل باللي هيا بتتكلم عنه ده؟ ؟
علي: انا بزنس مان ولما سنارتي بتغمس بشدها
ادهم: يعني ايه مش فاهم؟
علي: يعني شفت شركه كويسه وهتفدنا كتير في شغلنا فضمتها لشركاتي فين المشكله؟
ادهم: فين المشكله؟ وانا؟؟ مفكرتش فيا الاول؟؟
علي: اللعب والتسليه حاجه والشغل حاجه تانيه
ادهم: وهو مين اللي بيلعب وبيتسلي؟؟؟
علي: امال انت بتعمل ايه هاه؟ اللي انت فيه ده تسميه ايه غير تسليه لعبه جديده عجباك وبتتسلي بيها
ادهم: ليلي مش لعبه ابدا... افتكرت انك اكتر واحد قريب مني وفاهمني تقوم انت اللي تعمل فيا كده؟ طيب قولي الاول كنت اتصرفت ليه كده؟
علي: محستش انك جدي معاها
ادهم: هههه محستش سيبت شغلي هنا معاك وسيبت بيتي لمجرد اني ابقي قريب منها وتقولي ما حسيتش..... ليلي هيا حياتي ولو ما سامحتنيش يبقي مبروك عليك الشركه الجديده وياريت تكون مستاهله انك تدمر حياه ابنك علشانها
ادهم مشي وسابهم ونزل يلحق ليلي
علي الكل وافق بيبصله
علي: انتو واقفين كده ليه خلاص العرض خلص اتفضلو كل واحد يروح شغله
ليلي نزلت تجري ودموعها سابقاها وركبت بسرعه
ليلي: اطلع بسرعه ارجوك
طلع خالد ومشيوا وهيا طول الطريق بتعيط
خالد: ايه اللي حصل فهميني؟
ليلي: هو فعلا صاحب الشركه
خالد: ام طيب بطلي عياط خلاص
ليلي بتعيط اكتر واكتر
خالد: هو انتي بتعيطي ليه؟ انتي عملتي حاجه غلط معاه ندمانه عليها؟؟؟
ليلي للحظه مش فهماه
ليلي: انت ازاي تفكر كده اصلا!! لا طبعا ادهم ما لمسش شعره مني
خالد: عارف بس لما لقيتك بتعيطي قوي كده خفت تكوني ندمانه علي حاجه سلمتيهاله باسم الحب
ليلي: سلمتله قلبي ما ينفعش اندم عليه!!! انا حبيته قوي يا خالد قوي
خالد: هو من الاول كده يا ليلي ما كنش طبيعي في حاجات كتيره ما كانتش منطقيه
ليلي: ارجوك انا مش عايزه اتكلم دلوقتي
وصلو البيت وهيا اول ما وصلت دخلت اوضتها وفضلت تعيط
خالد قالهم اللي حصل وشويه والباب خبط
فتح خالد لقي ادهم في وشه
خالد: انت ليك عين تيجي هنا ؟
خالد بيتكلم بعصبيه وهيمسك في خناقه وفعلا ماسكه من هدومه
طلع عم فتحي: خالد بس افندم يا ابني
ادهم: عايز اوضح اللي حصل
خالد: واحنا مش عايزين توضيح اتطرق
عم فتحي: خالد عيب كده خليه يدخل انا عايز اسمعه
ادهم دخل ولقي الكل واقف في الصاله الصغيره بيبصوله باتهام واستغراب ولوم
محمد خالد ناديه ماجده وعم فتحي
ادهم: ما تبصوليش كده ارجوكم
عم فتحي: وانت عايزنا نبصلك ازاي بعد اللي عملته خنت ثقتنا وضحكت علينا واخرها تصغرني قدام الراجل اللي لحم اكتافي من خيره
ادهم: لا واحده واحده عليا
هنا ليلي فتحت الباب وخرجت
ليلي: انت جاي هنا ليه هاه يا سياده الباشا الكبير وبعدين البيت مش قد المقام
ادهم : ليلي ارجوكي
ليلي: سيادتك تترجي عيب ما يصحش انت اؤمر علي طول والعب بحياه الناس عادي
عم فتحي: اسكتي بقي وخليه يتكلم
ليلي: وانا مش عيزاه يتكلم ويبرر ويضحك علينا بكلمتين
ادهم: انا مش بضحك علي حد بكلمتين
ليلي: اه اسفه انت بس بتلعب بحياه الناس
ادهم: ما تسكتي بقي وتسمعيني الاول
خالد: واد انت ما تعليش صوتك عليها انت فاهم لقسما بالله اروح فيك اللومان
عم فتحي: وبعدين معاكم يا تخرسوا خالص يا كل واحد يدخل اوضته
اتكلم وقول اللي عندك
ادهم: اولا انا ما نصبتش علي حد ولا اخدت شركات حد
ليلي: اكدب اكدب براحتك
ادهم: ممكن تسيبيني اكمل وبعدها قولي اللي انتي عيزاه
الشركه انا كنت اتكلمت مع والدي عنها وهو اللي راح واشتراها ودفع تمنها ما اخدهاش او نصب زي ما انتو ما بتقولو ودفع اكتر من تمنها كمان وده تقدروا تتاكدوا منه بسهوله لو سالتو الاستاذ محمد عبد السلام اما ان انا ضحكت عليه فده محصلش ومخنتش ثقته فيا وانا روحتله الاول ووضحتله اللي حصل واعتذرتله عن سوء التفاهم ده وهو قبل اعتذاري واديته فرصه لحد بكره يقرر فيها لو عايز يحتفظ بشركته او يبعها فليه مطلق الحريه
ده بالنسبه للشغل ولحضرتك يا عم فتحي انا مصغرتكش قدام حد
ليلي: طيب ده الشغل وانا؟؟؟ ليه لعبت بيا كده؟ ؟
ادهم: ليلي انا ما لعبتش بيكي ابدا حبي ليكي حقيقي وواضح وضوح الشمس انا بحبك وانا زي ما انا مفيش اي شيئ فيا اتغير
انا ما غيرتش في طبيعتي او تصرفاتي معاكي انا كنت تلقائي جدا معاكي واكيد انتي لاحظتي كل اللي خبيته عنك هو اسمي وبس
انا كنت بطبيعتي بلبسي بعربيتي بشغلي كل حاجه كنت طبيعي فيها
حتي أكلي كمان مكدبتش عليكي ابدا
انتي كنتي بتفترضي اني بغلط او بنسي او بعيش عيشه مش بتاعتي ولا نسيتي
اول مره خرجنا فيها اخدتك فين؟ فاكره؟ المطعم اللي متعود اروحه وقولتلك انا باجي كتير ولما اخدتيني محل الكشري قلتلك دي اول مره ليا هنا كنت واضح في كل مره
انتي حبيتي تضحكي علي نفسك لانك من جواكي كنتي عارفه اني مختلف
انا عمري ما قلتلك اني فقير انتي افترضتي ده
الكدبه الوحيده اللي نطقتها لما قلتلك اني سواق وبس غير كده مكدبتش كدبه واحده
ليلي: في اول مره اتكلمت معاك فيها سالتك انت منهم قلتلي لأ مش منهم
ادهم: وانا فعلا مش منهم
عمري ما كنت بوشين ابدا ولا عمري حبيت المظاهر والمصالح انا مش من الطبقه اللي انتي بتكرهيها انا انسان عادي جدا وبسيط جدا غني اه وملياردير كمان بس عمري ما تعاملت مع حد بالاساس ده
عم حسين الراجل اللي انتي كنتي فاكراه مديري ده السواق بتاعي علي فكره بس انتي من خلال تعاملي معاه افتكرتيه مديري
انا زي ما انا مفيش حاجه فيا اتغيرت
ليلي: انا كنت تجربه جديده اه بت فقيره بياعه في محل طيب وليه لأ ما اجرب يمكن اتبسط واروح اعيش وسطهم واهو تسليه 24 ساعه ببلاش حد يطول
ادهم: تجربه جديده اه لكن تسليه لأ انا عمري ما اتسليت بيكي ابدا ابدا
ليلي: اه ولما سيبتني وبعدت عني علشان رفضت اخليك تمسك ايدي او تبوسني ده كان ايه؟
ادهم: ما كنش تسليه
خالد: اه كنت عايز تجرب هتعجبك البضاعه ولا لأ؟؟
ادهم: ده كان غلط اوك بس اللي ما تعرفيهوش عني ان انا قضيت معظم حياتي في امريكا وبالنسبالي موضوع انا ابوس البنت اللي انا مرتبط بيها ده شيئ عادي جدا ولما انتي رفضتي اتضايقت وقولت انك ما بتحبينيش بس بعدها اتكلمت مع عمي حسين وابويا وهما فهموني عادات وتقاليد هنا وان ده شيئ مش مقبول هنا فرجعتلك وتقبلت عاداتك وتقاليدك ومشيت معاكي فيها
ليلي: وبكده يعني المفروض اعذرك واقول اه عنده حق مكنش يعرف
ادهم: ليلي انا مش بقول ان انا ملاك انا ليا اخطائي وكتيره كمان بس مش ثمنها انك تبعدي عني
انا بحبك وده ثابت ما اتغيرش وعايز ارتبط بيكي ازعلي مني وخاصميني واعملي كل اللي انتي عايزاه عاقبيني بالطريقه اللي تعجبك وانا متقبل لكن ما تبعديش عني
ليلي: انا اسفه يا ادهم... انا حبيت انسان بسيط عادي زيي زيه --- كنت عايزه ابني حياتي معاه ونكبر واحده واحده
ادهم: انا زي ما انا ما اتغيرتش
ليلي: انت بتقول ايه؟ انت مش انت نهائي.. انت بتدخل مكان بيضربولك تعظيم سلام
انت عايش في وسط انا مش هعرف اشاركك فيه وبتتكلم نص كلامك ما بفهموش
ده كده وكنت مش بفهم مع انك كنت بتحاول تتكلم عربي علي قد ما تقدر امال لما تبقي علي طبيعتك
ادهم: مش هيا دي المشكله هتكلم علي طول عربي وهعلمك انتي انجليزي مش مشكله
ليلي: احنا مختلفين اسفه بس انا فقدت ثقتي فيك ومش هقدر ارجعها اسفه شوف واحده تناسبك وتليق بيك
ادهم: ليلي استني
عم فتحي: اعتقد ان احنا كده سمعناك ولا ايه؟
ادهم: عمي انا بحب ليلي وعايز اتجوزها وعمري ما لعبت بيها
عم فتحي: وانا مصدقك بس انت خبيت كيانك كله انت بتقول ما كدبتش ممكن تكون صح ما كدبتش غير كدبه واحده بس الكدبه دي بنت فوقها حاجات كتير
فيه فرق كبير قوي انك تكون سواق بسيط وزينا وانك تكون صاحب شركه وليك وزنك ده انا اهو نفسي مش عارف اتكلم معاك ما بالك هيا اللي المفروض انها تعيش معاك
انت شايف ان مفيش حاجه اتغيرت
لكن احنا شايفن انك في لحظه كنت واقف جنبنا واللحظه اللي وراها بقيت واقف فوق جبل عالي جدا لدرجه ان احنا اصلا مش شايفينك انت بتتكلم ازاي؟
روح يا ابني لحياتك وسيبنا لحياتنا
ادهم: بس يا عمي انا
عم فتحي: ارجوك ما تخلينيش اقفل بابي في وش اي حد بعد كده بيتي طول عمره مفتوح متخلينيش اقفله ارجوك
مشي ادهم وحس ان حياته واحلامه كلها بتتهد فوق راسه وهو بيتدفن تحتها
مش عارف يروح فين او يعمل ايه؟
مفيش في باله غير مكان واحد ممكن يروحه وفعلا راح ودق الباب واتفتحله
"" كنت عارف انك هترجع بالمنظر ده ادخل ""
دخل والباب اتقفل
ونكمل بكره
ياتري ادهم راح فين ومين ده؟
ليلي هتسيب ادهم خلاص ولا هتحن ولا هتنتقم منه؟
ShiMoOo
تكملة الرواية من هنا 👇👇👇👇👇👇